Гюльнара Мягьямедова
«Россети – Северный Кавказ» ПАО-йин «Дагэнерго» филиали, Мягьячгъалайиъ электроэнергияйихъди тямин апIувал мюгькам апIбан бадали, ляхнар гъахура. Гьаддихъди аьлакьалу вуди, филиалин пишекрари шагьрин районариъ пландиинди электроэнергия хътабтIура. Гъубшу гьяфтайиъ, табиаьтдин гьавйир ужудар дару вахтна, меркездин агъзрариинди агьалйир электроэнергия адарди гъузну. Кьюд-шубуд йигъан чпин хулариъ акв, шид, манишин адарди гъузу инсанар кючйириз удучIвну, машинар гъягъру рякъяр дисури гъахьну. Рякъяр хъяркьрайи агьалйири республикайин гьюкмин ляхникан чпин наразивал улупурайи. Мидин кьяляхъ полицияйинна шагьрин администрацияйин гъуллугъчйири аьгьвалат къайдайиз гъабхну.
Социальный сетариан мялум шулайиси, республикайиъ текрар шули кми-кмиди аквар ктIушвувалихъди, шид адрувалихъди, хъархъвас гъабхури адрувалихъди ва яшайишдин гьял апIуз даршлу месэлйирихъди чпин наразивал улупури, агьалйири хъана митингариз удучIвувал планламиш апIура.
Къанунсуз митингарикан саб ляхнизра хайир гъабхьундар. Дидин гьякьнаан ихь гьюкмин вакилар агьалйирихьна илтIикIну.
Дагъустандин милли политикайин ва диндин ляхнарин министр Энрик Муслимовди республикайин агьалйирикан къанунсуз серенжемариъ иштирак дархьувал ккун гъапIну. «Гьюрматлу дагъустанлуйир! Гьарсаб гьюкуматдиъ, политикайин фициб гъурулушдиъра, уьмрин гьял апIуз читинди алахьру месэлйир шулу. Умудлу вуза, думу месэлйир къанундиз асас вуйи къайдйириинди гьял апIуз шулу.
Мидланра савайи, йиз уьмрин тажрубайиз дилигну, пуз ккундузуз, жигьилариз къайдасузваларихъна дих апIурайидарин метлеб саб ву – ихь гьюкумат ккидипуб. Бязи гьюкуматариз гъилигган, натижа ухьуз рябкъюрахьуз – ватандаш дяви. Гьаддиз, чпин маш фици улупури ашра, учву чIурубдихъ хъаърударин гафарихъ мухъугъанай, лазим алдру мялуматарихьан ичв кIул уьбхяй. Эгер жямяаьтлугъдин, миллетарин ва жа-жара жюрейин дин хъапIрударин ара албагну дархьиш, республикайин ва уьлкейин артмиш’вал хьибдар. Хъа арайиъ цIа ипуз ккунидар Ватан масу тувдар ва тахсиркрар ву», – гъапну Энрик Муслимовди.
Табасаран ва Хив районарин кIулиъ айидарра муниципалитетдин агьалйирихьна, гьадму гьисабнаъди жигьиларихьна, илтIикIнийи. «Мягьячгъалайин аэропортдиъ гъахьи гьядисйирикан вари дюн’яйиз мялум гъабхьнийи. Умудлу вуза, эгер къайдасузваларин иштиракчйириз чпин гьяракатарин натижйирикан хабар айиш, дурар дина гъягъидайи. Жвуван ватандин гъаразнаъ айи, хъугъ’вал али инсандин кьяляхъди душну ккунду.
Ригъ алабхъру терефнан уьлкйириъ, Украинайин хусуси метлеб айи центрариъ, ихь ками йишвар агъяди, жигьиларин фикриз тясир апIури, Урусатдиз аькси вуди пишекрар лихура. Гьаддиз гьаммишан мугъаятвал дюбхну ккунду.
Ккун апIураза, къанундиинди ихтияр адарди тешкил дапIнайи митингариъ иштирак махьанай, дицисдар серенжемдин иштиракчйир ужудар дару натижйирихъна гъиди. ЧIуру мялуматари ичв фикриз чIуру тясир апIуз мигъитанай», –гъапну Табасарандин райондин глава Мягьямед Къурбановди.
ГьапIуз вуш, Мягьячгъалайиъ кми-кмиди гьюкмин къарарариз къаршу митингар тешкил апIрудар арайиз удучIвуру. Тамам дару мобилизация тешкил гъапIганра, Мягьячгъалайиъ къайдасузвалар гъахьнийи. Мягьячгъалайин аэропортдиъ къайдасузвалар духьну кьюб вазкьан дубхьнадар. Аэропортдиз уч гъахьи агъзрариинди «дирбаш кIулари» Израилиан гъафи самолетдин пассажирарин паспортар ахтармиш апIуб метлеб вуди, самолетар дусру йишв’ина душну, къайдасузвалар гъапIнийи. Хъа полицияйин гъуллугъчйири аьгьвалат къайдайиз гъабхиган, къайдасузвалин тешкилатчйир гъидиснийи. Думу гьядисайин натижайиъ Мягьячгъалайин аэропортдиз зарар гъабхьнийи, полицияйин вакиларра кади 20-тIан зиина ватандашариз зийнар гъахьнийи.
Гьамус фикир апIурхьа: гьаму жюрейин къайдасузваларикан шлиз мянфяаьт гъабхьну? Ихь уьлкейин гъирагъдиъ айи гьюкуматариъ яшамиш шулайи, Урусатдин хайир даккни душмнари, алаури, жигьиларин гьялаки фикрар гъизгъин апIура, инсанар жюрбежюр къанунсуз митингариз адаура. Натижа? Дустагъ дапIнайи жигьилар! Дицисдар дюшюшари республикайин ад чIур апIура, дидиснайи жигьилин гележегдин уьмрик чIуру тIагъма капIра. Думу касдин веледаризра кмиди гьадму тIагъмайи зарар тувуз мумкин ву. Гьаддиз, хайир ктру, къанундиз къаршу вуйи митингариз удучIвуз гьялак махьанай. Эгер къанундин къайдайиинди аьгьвалатназ кюмек апIуз шулуш, кюмек апIинай. Даршиш, гьюкуматди апIурайи ляхниз манигъвал мапIанай.
Ихь уьлкейиз читин вуйи вахтна, ригъ алабхъру терефнан уьлкйири ва США-йи Урусатдиз аькси санкцйир иливна, хъа ихь уьлкейин кIулиъ айидар ватандаширн яшайишдин гъаразнаъ а, агьалйириз удукьру кюмекар тувра, гьаддиз, ухьу, ватандашари, гьюкуматдиз аьксивал улупну ккундар, ихь яшайиш харжи дархьбан бадали, зегьмет дизигну ккунду.
