Зубайдат Шябанова

 
Гьаму йигъари Табасаран райондин глава Мягьямед Къурбановдин ччвурнахъ хусуси метлеб айи дявдин операцияйиъ варитIан улихь женгариъ иштирак шулайи ихь эскрарин гьякьнаан сабсана чухсагъул мялум апIурайи кагъаз гъафну.


Гьаци 98594-пи войсковой частнан вахтназ вуди командирин вазифйир тамам апIурайи капитан А. Стаценкойи Табасаран райондин Имшнигъ гъулан вакил, сержант Мурад Ярягьмадовдин тербияйиз заан кьимат туври, дугъу чан улихь дивнайи буржйир ва вазифйир вари нумуналуди тамам апIурайиваликан, хусуси метлеб айи дявдин операцияйин женгариъ дугъу учв игитси улупурайиваликан бикIура.

 
Кагъзиъ къайд апIурайиганси, Мурад Ярягьмадов Жуковдин медалиинди лишанлу дапIна. Дугъу гъуллугънаъ айи вахтна учв жавабдар ва низамлу къайдайиз тялукь вуйирси улупну ва, читинвалариз дилигди, чан улихь дивнайи табшуругъар гьял апIуз гьязур вуйиб тасдикь гъапIну. Вари командованиейи субут апIурайиганси, сержант Мурад Ярягьмадов заан пишекарвалин эскер ву, ва чахъди гъуллугънаъ айи эскрариз ватанпересвалин нумуна духьна.

 
«Ватан бадали учву киврайи пай ва хусуси метлеб айи дявдин женгариз гьязур ватанпреверарихъди тямин апIувал кьимат айиб дар. Ватандин улихь учву улупурайи жавабдарвал ва ватанпервервал хайлиндариз дарс дубхьна. Му важиблу ляхник учву киврайи пайназ вари командованиейин терефнаан баркаллагь кIурача», – дибикIна Чухсагъулин кагъзиъ.
Мягьямед Къурбановди къайд гъапIганси, гьаму жюрейин кагъзар райондин администрацияйиз кми-кмиди гъюра. Миди ихь ватандашари хусуси метлеб айи дявдин операцияйиъ чпи лайикьлу ватанперверар вуйиб тасдикь апIурайиваликан субут апIура. Хъа му, дураринси, дурариз тербия туву абйир-бабаринра, мялимаринра лайикьлувал ва гьунар ву.