Зубайдат Шябанова

Мартдин вазлин 15-17-пи йигъари Урусатдин Президент ктагъбан сечкйирин кампания аьхирихъна гъюбан ва сесер тувру участокар хъяркьбан кьяляхъ, Табасаран райондин глава Мягьямед Къурбановди райондин агьалйириз сесер тувуз гъюбаз ва дурарин уьмрин жанлу позицияйиз чухсагъул мялум гъапIну.

 

Дугъу къайд гъапIганси, сечкйириъ иштирак хьувал – му ватанпервервал ву, уьлкейихъанна багъри Ватандихъан юкIв убгурайивал ву.
«Сечкйирин йигъари ихь агьалйир уьмуми саб метлеб айи, саб кьаст айи, багъри райондин артмиш’валикан ва мублагъваликан фикир кайи саб команда вуди гъахьну. Сечкйирин участокариз гъюри учву ичв сес ичв кIваз хуш вуйи кандидатдихъанди тувунчва. Му, йиз фикриан, мюгькам ватанпервервалин лишан ву.

Шубуд йигъандин арайиъ узу, сесер тувбан кампания фици гъябгъюраш ахтармиш апIури, хайлин участокариина гъушнийза. Узуз сесер тувуз дуфнайи СВО-йиъ гъийиху ва, гьамусяаьт ихь уьлкейин маракьар уьрхюри, женгнаъ айи эскрарин багахьлуйирра алахьунзуз. Мидланра савайи, чпин хулаъ сесер тувуз мумкинвал ашра, сечкйирин участокариз йишв’ина дуфнайи агьли касарихъдира гюрюшмиш гъахьнийза. Дурарра кIул’инди аьхю гьюрматназ лайикьлу ву. Фицики дурари ихь жигьилариз чпин чешнелу гьяракатариинди ва ляхнариинди ужуб нумуна улупура.

Сечкйирин кампанияйиъ гьарсаб сес важиблу вуйивал гьисс дапIну, учву ичв ихтиярар ишлетмиш апIури, сесер тувуз гъювал лапра ужуб ляхин ву. Чухсагъул учвуз варидариз», – гъапнийи Мягьямед Къурбановди.

Дугъу гьацира агьалйирикан гележегдиъра райондин жямяаьтлугъ уьмриъ жанлуди иштирак хьуб ккун гъапIну.