Зубайдат Шябанова
Майдин 17-ди Табасаран райондиъ ЧвулатI гъулан йигъ яркьуди къайд гъапIну. Му гъул ухьуз бажаранлу инсанариинди, политикариинди, аьлимариинди ва машгьур спортсменариинди машгьур вухьуз.
ЧIвулатI гъулан тарих, жилар тIурчIвбан кьяляхъ агьалйир кюгьне гъуллан гьамусяаьт айи йишваз алдаъган, 1966-пи йисхъанмина ккебгъра. Мидкан узуз ЧвулатI гъулан мектебдин директор Гюляли Жамаловди ктибтнийи.
ЧвулатI гъул Рубас нирин дерейиъ ерлешмиш дубхьна. Райондин центриан думу гъулаз гъюру кьюб рякъ а: Къара-къуй терефнаанмина ва ТинитI гъул’анмина. Гъулаъ саки 1300-дихьна агьалйир яшамиш шула. Душваъ 227 хизан а. Гъулан 200-дихьна хизанар республикайин вая Урусатдин шагьрариз кюч гъахьну.
1929-пи йисан гъулан мистаъ ккергъбан классарин мектеб абццнийи. Душваъ лихури гъахьи сарпи мялимар Гъарахан Гъараханов ва Абас Алкьадари вуйи. 1936-пи йисан гъулаъ «Чулатский» колхоз тешкил гъапIну. Дидин председателди Шихмердан Аьгьмадханов ктагънийи. Ватандин Аьхю дяви ккебгъиган, гъул’ан 79 кас дявдиз гъушну. Дурарикан 40 кас дявдин женгариъ гъийихну вая бейхабарди гъудургну.
Гъи ЧвулатI гьаму деврин успагьи хулар дивнайи, яркьу кючйир айи мублагъди артмиш шулайи гъуларикан саб ву. Гьамусяаьт мушваъ кьялан мектеб, ФАП, культурайин хал, библиотека, мист, 6 тукан, спортдин дарамат, футболин майдан ва сейир апIру багъ а. Гъулаъ 16 игит-баб ва гизаф бицIидар айи 45 хизан яшамиш шула.
Жамаловди гъулан уьмуми даягъ вуйи ватандашарин ччвурарра гьюрматниинди ктухнийи. Дурарин арайиъ Имам Имамов, Гьяжиаьли Аьлимурадов, Гьяшим Гьяшимов, Ханмягьямад Аьбдулязизов, Къурбан Пашаев, Зейдулла Гьяшимов, Гьюсейбег Гьяжиев, Сабир Гюлев, Асланбег Асланбегов, Мартин Сефербегов ва хайлин жарадар а.
Майдин 17-пи йигъан ЧвулатI гъулан аьхю машквраъ, Табасаран райондин глава Мягьямед Къурбанов кIулиъ ади, райондин поселенйирин главйир, райондин идарйирин ва карханйирин гъуллугъчйир, ЧвулатI гъул’ан жара йишвариз кюч духьнайи вакилар, мектебдиъ урхурайидар ва гъуландар иштирак гъахьну.
«ЧвулатI гъулан агьалйир зегьмет зигуз гизаф юкIв хъайидар ву. Му гъул’ан вуйи хайлин ватандашари багъри райондин артмиш’валик баркаллу пай кивна. Гъул арайиз дуфну бицIи вахттIан даршра, жямяаьтлугъдинна политикайин машгьур касари, депутатари, спортсменари, аьлимари ва духтрари гъул, райондизси, вари республикайизра адлу гъапIну.
Гъи аргъаж шулайи наслиз гъулаъ вари шараитар арайиз духна. Ухьу яваш-явашди гъулан кючйирра къайдайиз хурахьа. Дурарикан кьюбдиин асфальт улубзна. Гъулаъ гъийин деврин мектеб, бицIидарин багъ, ФАП, футболин майдан ва бицIидарин майдан цIийи алаъна. Культурайин хулан ва гъулан администрацияйин дараматар къайдайиз хуз имийихь. Гъулан 60 йисандин юбилейиз сабсана кючейиин асфальт улубзидихьа.
Гъи ЧвулатI гъулан 100-дихьна жигьил баяри, игитвал ва Ватандиз вафалувал улупури, хусуси метлеб айи дявдин операцияйиъ иштирак шула. Ухьу дурариз гъалибвал гъадабгъну, сагъ-саламатди хизанарихьна кьяляхъ гъюб ккун апIурхьа! Гъуландариз – ислягьвал ва хушбахтвал ибшри!» – гъапнийи Мягьямед Къурбановди чан тебрикнан улхбаъ.
Шадлугънан серенжемариз гъюрайи хялар ЧвулатI гъулан поселениейин глава Герейхан Мирзахановди къаршуламиш апIури гъахьну. Хъа машквар ЧвулатI гъулан мектебдиъ урхурайидарин ялхъвниинди ачмиш гъапIнийи.
Му йигъан гъулан жямяаьтлугъ уьмрик баркаллу пай киврайи вакилар гьюрматнан грамотйириинди ва пешкешариинди лишанлу гъапIну.
Серенжемдин аьхириъ табасаран эстрадайин артистар вуйи му гъулан вакилар Бесханум Гюльмягьямедовайи, Эльвира Аьгьмедхановайи ва гьацира мектебдиъ урхурайидари гьязур дапIнайи концерт улупну.
