Мейлан Нежефов
10-пи июли Хив райиондин Хив гъулан Сафарялиевдин ччвурнахъ хъайи кючейиъ айи Ярягьмадоварин хулар цIа кабхъну улдугну. Ихь халкьдин айтуйиъ дупнайиганси, багар-гурарихь цIа гъабхьиш, ухьук дидин кум хьнура кубкIди. Му бедбахтвалин хабар гъабхьибси, райондин жямяаьт, ликриин духьну, кюмекназ бакар гъахьну. Гьаци «Инсан» фонднан райондиъ айи отделениейи бедбахтвалиъ ахъу хизандиз кюмек вуди тешкил гъапIу акцияйиз 500 агъзур манат пул уч гъабхьнийи, ва думу хулар гъургу хизандин кIулар вуйи Ярягьмад ва Зулайнат Ярягьмадоварихьна гъурубкьнийи.
Табасаран халкьдин шаир Рягьимат ТIагьирова, чуччун хизандиз гъядябхъю завал деринвалиан гьисс апIури ва кюмекназ хил гьачIабкку ватандашариз чухсагъул мялум апIури, узухьна илтIикIнийи.
«Я Аллагь, душмнизкьан мициб мусибат дярябкъри. Швнуд-сад йисандин арайиъ чпин гьялал зегьметниинди дивнайи хулариз ва дизигнайи зегьметариз гьамциб завал гъядябхъюб…
Хъана шюкюр Худайиз, хулаъ яшамиш шулайи бейнавйириз саб артухъ фукIа гъабхундар. Думу вахтна хулаъ чуччун кьюр бицIир хъади аьхюну балин швушв ади гъахьну. Лисун апIбалан кьяляхъ гьарур саб йишвахьинди удучIвнайи, хъа швушву бицIидар ахуз ккаърайи. Гьамци чпин мадар апIурайи хизандин аку йигъ хябяхъдиз кIаруб гъабхьну. Токарилан юкьуб хал ва тегьлиз, айи гъаб-гъажагъра кмиди, кIан’ан-кIулиз рюкъ гъабхьну. Гьадму гьисабнаан, швушван халра. Саб фукIара чIатинди адабгъуз хъуркьундар. Кьюр набалугъ веледар хъайи швушву гьапIдихъа? БицIину веледдиз кумру гуж тувну, думу аьзарханайиъра дахъну гъахьну. Гьамусди дурар чпин Ватандин Аьхю дявдин иштиракчи Давуд абайин гъюрдарсдар хуларикк кка. Учура йиз веледарихъди, чуччуз кюмекар ва кIван сабур туври, жямяаьтдихъди гъургу хулариин лихурача. Халис ватандашариз баракаллагь! Магьа саб хайлин ляхин арайиз хура. Мидланра савайи, пулин дакьатарра уч апIура. ИкибаштIан, жвуван айибдик цIа кабхъну мициб пул саризра кьисмат дарибшри. Хъа гьапIрува? Тувси гъадабгъну ккун сарун! Эгер гъирагъдилан мициб кюмек гъабхьундайиш, валлагьи йиз чуччун юкIв тубкIуйи. Аьжузрин кьюр кIуру байра, уьмрин юлдашра бедендин шикаятвал кайидар ву гьа. Дугъу фици кIул адабгъуйихъа?!
Му читин йигъари чуччун хизандихъди сабси дурариз гъядябхъу учIврушин гьял апIури, даягъ гъахьи аьхюр-бицIириз чухсагъул. Дюн’яйиъ ислягьвал ади, гьарсар касдиз хизандиъ шадвал, бедендиъ сагъ’вал ва чан зегьметнакан мянфяаьт ктабгъуб ккун апIурaза», – гъапнийи чуччухъди ишурайи Рягьиматди.
