Гюльнара Мягьямедова

12-пи ноябри Дербентдиъ федеральный трасса Х.Тагъиевдин ччвурнахъ хъайи кючейик кибтIру рякъ ачмиш гъапIну. Думу рякъюн манзил 3,5 километр ву.

 

Серенжемдиъ РД-йин Глава Сергей Меликов, РД-йин транспортдин ва рякъярин мяишатдин министр Жамбулат Салавов, Дербент шагьрин мэр Аьгьмед Кьулиев ва хъана жарадар иштирак гъахьну.

Серенжемдиъ удучIвну улхури, Сергей Меликовди гъапиганси, ачмиш апIурайи рякъю Дербент шагьриъ учIвру йишвахь федеральный трассайиинди гъягъру машинарин кьадар цIиб апIуз мумкинвал тувди.
«Гъи ачмиш апIурайи рякъю шагьрин гьюлин гъирагъдихъ хъайи тарихи йишварихьна гъягъру рякъюн манзил цIиб апIиди. Республикайин артмиш’валарик машинар гъягъру рякъяри киврайи пай аьхюб ву. Лап багарихьди Дербент шагьрин гъирагъдиан гъябгъру федеральный рякъюн чIатху проект уьмриз кючюрмиш апIуз хъюгъдихьа. Думу рякъюз ккилигури, гизаф йисар вуйихь.

Гьаму рякъяр Дагъустандин ва Урусатдин вари кьибла терефарин артмиш’валин важиблу пай ву. Транспортдин Кафари-Кьибла коридорин артмиш’вали машинар гъягъру рякъяриъ энгел хьувалар даршлуваликан, машинар хъаъбан хатIасузваликан, гьяракатнакан, рягьятваликан кIура», – гъапнийи республикайин кIулиъ айири.

Аьгьмед Кьулиевди чан улхбаъ гъапиганси, ачмиш апIурайи рякъ Карьер ва Аэропорт микрорайонариъ яшамиш шулайи агьалйириз аьхю кюмек ву. «Гележегдиъ гьаму рякъюъди республикайин ва варихалкьарин спортдин серенжемар гъахру цIийи дараматдихьна гъягъюз хьибди. Гьацира «Аваин» район артмиш апIбан дахилнаъди думу рякъюн багахь цIийи хулар диврайи агьалйиризра аьхю кюмек ву. ЦIийи рякъюн мянфяаьтлуваликан гизаф пуз шулу», – аьлава гъапIнийи шагьрин мэри.
Проект юрутмиш апIбаз 600 ми-ллион манат деебтна.