Нариза ТIаибова
Дишагьлийин уьмур фуну вахтнара гьякалсиб ву: марцциб, гьадму саб вахтна назукубра…
Гьяйифки, гьелелиг сарихьанра вахтназ улихьна кьисматар фицдар шулуш аьян дубхьну, уьмрин рякъяр ккабалгуз удукьуб дар. Ав, бахт я масу тувуз, я масу гъадабгъузра шулдар.
Кьисмат…Му гафназ фукьан дерин мяна айкIан?!
Йиз макьалайин игит Бедиржигьан бабан уьмурра читинвалариинди «девлетлуб» гъабхьну. Дугъу, чан назук гъюнариин алахьу вари гъагъар баркаллуди аьгь дапIну, уьмрин саламат рякъ ккабалгну.
Бедиржьигьан Рамалданова 1947-пи йисан Табасаран райондин Вечрикк гъулаъ бабкан гъахьну.
Дявдин кьяляхъ вуйи читин йисари гъулариъ айи баяр-шубарин бицIи вахтарикан артухъ дарпишра, аьгьвалатнан гъаври хьуб читин дар. Хъа му читинваларилан савайи, Бедиржигьан баб учв лап бицIиди имиди дадайихъра мягьрум гъахьну.
– Йиз байвахтнакан, яркьуди дарпишра, гъаври хьуб читин дар. Йитимвал, касибвал… Думу вахтари шубариз, гьамусси, уьмур ккабалгуз я ихтиярра, я мумкинваларра адайи. Шуран кьисмат аьхюдари албагури аьдат вуйи. Гьаци, узура сифте ТIюрягъ гъулаз жилириз хъаънийи. Амма душваъ йиз бахт ярхиб гъабхьундар…Сар риштIан адрувал себеб вуди, учу жара хьуз мажбур гъахьнийча.
Кьяляхъна узу кьисматну Хив райондин Лика гъулаз алдаъну. Узу хуруган, йиз жилириз, уьмрин юлдаш кечмиш духьну, ургур велед айи. Йиз гъюнариин аьхю хизандин гъайгъушнар алахьну. ИкибаштIан, читинваларра гизаф алахьунчуз, вушра вари аьгь гъапIиган, узуз мушваъ гъудубкьу хизан гъабхьунзуз. Аллагьди мушваъ узуз, кьюр байна кьюр ришра тувунзуз, дадавалин манишин деринвалиан гьисс апIру мумкинвалра тувунзуз.
Йиз уьмур хизандин гъайгъушнариккди гъубшну. Азад вахт гъабхьиган, артилиз халачи убхузра гъягъюйза, – ктибтура чан уьмрикан Бедиржигьан бабу.
БицIидар саб гьял аргъаж хьайизра, дугъан уьмрин юлдашра кечмиш гъахьну. Амма фукьан читинвалар алахьнушра, дугъу саб вахтнара кIул ис гъапIундар. Баяр-шубарира варидари чпин уьмрар ккабалгну.
Бедиржигьан баб гъулаъ чан бицIину бай Ризвандин хизанарихъди дуланмиш шула. Украинайиъ дявдин гьяракатариз кюмек жалб апIбан метлебниинди 2022-пи йисан мобилизация мялум гъапIиган, Ризванна чан дуст Ферзяли райондиан дина чпин хушниинди сарпидарди гъушнийи. 2023-пи йисан январин эвелариъ душмандихъди гъахьи йивбариъ Ферзяли жюрэтлувалиинди уьмриан гъушну. Ризван, зийнар духьну, госпитализ гъахнийи.
Дидхъанмина думу хайлин вахтна, сагъламвал мюгькам апIури, жюрбежюр шагьрариъ госпиталариъ гъахьну. 2024-пи йисан 6-пи июли нубатнан ражари Каспийскдиз чав гъуллугъ апIурайи частназ гъягъюрайир кьисматнан инсафсузвали, машиндикк ккахъну, думу хатIа гъабхьи йишв’ин кечмиш гъахьну.
– Му завали йиз уьмриъ муганайиз алахьу вари читинвалар кIваълан гьархуз гъитунхьуз. Дявдин цIигъян дуфну, мициб аьжал шулу дупну, шлин фикриз гъюйихъа. Гьамус аьзиз Аллагьдикан анжагъ йиз хутлар сагъ-саламатди уьрхюб тIалаб апIури, йигъар-йишвар гьаъраза, – пашманвалиинди аьлава гъапIу бабу.
Ризвандин уьмрин юлдаш Кумсиятди субут апIурайиганси, хусуси метлеб айи дявдин операцияйиъ Ризвандин гьунарар гьисабназ гъадагну, «Дирбаш’вал улупбаз лигну» ва «Женгариъ жюрэтлувализ лигну» («За ратную доблесть») медалариинди лишанлу дапIна.
– Гъи ихь гьюкуматдиъ хусуси метлеб айи дявдин операцияйин иштиракчйирин, дурарин хизанарин гъайгъушнаъди натижалу ляхин гъабхура. Кюмекарра тувра, хъа учуз, наана илтIикIишра, думу хусуси метлеб айи дявдин операцияйиъ талаф гъахьир дар кIуру саягънан жаваб тувра. Гьелелиг дубхьнайи кюмекра адарчуз, – гъапну дугъу.
Шиклиъ: Бедиржигьан баб чан хтул риш Расимайихъди.
