Умгьанат Сулейманова

 
28-пи августди Дагъустандин Огни шагьрин культурайин дараматдиъ шагьрин мялимарин августдин совещание кIули гъубшнийи.

Совещание шагьрин мэр Замир Гьяжимурадовди ачмиш гъапIнийи. Дугъу чан улхбаъ образованиейин цирклин гъуллугъчйир, мялимар улубкьурайи цIийи урхбан йисахъди тебрик гъапIнийи: «Мектебдихъди аьлакьа адру хизан Огнийиъ бажагьат ашул. Баяр-шубариз урхбаъ, мялимариз чпин жавабдар ва гьюрматлу ляхниъ хъуркьувалар ккун апIураза.

 
БицIидар ихь гележег ву. Дурари заан ери айи аьгъювалар гъадагъбак мялимари лайикьлу пай кивра. Ихь веледар лайикьлу инсанар хьпан, дурари ужудар аьгъювалар гъадагъбан, хъуркьувалар гъазанмиш апIбан бадали, гьюкумат вари жюрейин шараитар яратмиш апIуз чалишмиш шула. Хъуркьуваларра адарди дар. Мектебар, деврин техникайихъди тямин апIури, расвалин ляхнар гъахури, йислан-йисаз уткан шула. Гележегдиъра хъана артухъ мумкинвалар агидихьа. Дупну ккундуки, милли проектарира образованиейин идарйириз хайлин гъулайвалар гъахну. Гъюру йисазра мектебар, бицIидарин багъар къайдайиз хпан ляхнар планламиш дапIнахьа».
Мялимарин августдин совещаниейиъ Огни шагьрин образованиейин гъуллугъчйири ккудубшу урхбан йисандин натижйир гъивнийи ва цIийи урхбан йисан улихь дийигънайи месэлйирикан гъапнийи.

 
Дагъустандин Огни шагьриъ кьялан образованиейин 8 мектеб ляхник ка. Гьаму мектебариъ 2026/2027-пи урхбан йисан вари 6100-диинакьан баяр-шубари урхура. Думу кьадарнакан гьаму йисан 550 бицIир сабпи классдиз урхуз дуфна, ОГЭ тувру 9-пи классариъ 650, хъа ЕГЭ тувру 11-пи классариъ 270 касди урхура.