Наргиз Гюлечова
Улихьна йигъари Каспийск шагьриъ «Дагдизель» заводдин улихь хьайи майдандиин генералиссимус Иосиф Сталиндин ччвур иливбахъди аьлакьалу вуйи серенжем гъабхьну. Майдандиз И.Сталиндин ччвур тувбан гьякьнаан къарар Каспийск шагьрин администрацияйи 2025-пи йисан 25-пи мартди кьабул гъапIнийи.
Му гьядиса Ватандин Аьхю дявдин Гъалибвалин 80 йисаз бахш дапIнайиб вуйи. Шадлугънан мярака хябяхъган сяаьт хьубди, янаки заводдиан пишекрар удучIвурайи вахтна ккебгънийи. Серенжемдиз лап хайлин инсанар уч гъахьнийи, гьадрарин арайиъ шагьрин администрацияйин вакилар, Каспийскдин военный комиссар Марат Пашаев, шагьрин гьюрматлу ватандаш генерал-майор Герман Кириленко, республикайин профсоюзарин комитетдин председатель Муртазяли Муртазялиев, «Дагдизель» заводдин улихьдин генеральный директор Николай Покорский, «Дагълари кIваъ уьбхюра» шагьрин тешкилатдин кIулиъ айи Межид Аьлимягьямедов ва хъанара жарадар.
Му жюрейин серенжемар ачмиш апIруган, гимдилан ккебгъри аьдат ву. Гимдин мукьам мяналу серенжемдиз дуфнайи военный оркестри гъивнийи ва дидин кьяляхъ дуфнайи хялари заводдин улихь хьайи майдандиз Сталиндин ччвур тувбан мянайиканра гъапнийи.
«Дагдизель» заводдин генеральный директорин заместитель Руслан Кьасумовди гъапиганси, дявдин вахтари Сталинди Ватандин улихь фидакарвалиинди гъуллугъ апIбаз лигну, гъийин му мярака дугъан рюгьяриз улупурайи гьюрмат ву.
«Вари дюн’яйиз машгьур гъахьи Иосиф Сталиндин рюгьназ бахш вуйи кIваин уьрхбан тахтайиинди учу, заводдин гъуллугъчйири, дамагъ апIурача. Гъи гьаму ухьу дийигънайи йишв’ин, 182-пи нумрайин завод тешкил апIбан жягьтлувализ кюмек туву кас Сталин вуйи. Гьадмуган му завод ачмиш гъапIундайиш, гъи Каспийск шагьурра хьуб мумкин дайи», – гъапнийи Руслан Кьасумовди.
Республикайин проф-союзарин терефнаан серенжемдиз дуфнайи Муртазяли Муртазялиевди гъапиганси, гъи ригъ алабхъру терефнаъ айи ихь душмнариз ихь уьлке хайиш апIуз ккунди айиган, ухьу вари сатIи духьну Ватандин Аьхю дявдиъ гъалибвал гъадабгъу ихь игитарикан зарбди улхури ккунду.
«Тарих уьбхюб, ихь гьарурин буржи ву. Гъийин йигъан, ихь уьлкейин эскрар хусуси метлеб айи дявдин операцияйин женгариъ чпин жанар фида апIури айиган, Сталиндин ватанпересвалин идеййир лап чарасуз ву. 80 йис улихь Ватандин Аьхю дявдиъ душмнар терг апIури чпин абйири фици гьунарар улупнуш, гъи ихь эскрари гьацдар гьунарар хусуси метлеб айи дявдин операцияйиъ улупура», – гъапнийи Муртузяли Муртузялиевди.
Серенжемдин аьхириъ Сталинди гъапIу ляхнар кIваинди уьрхюри, гьязур гъапIу ва заводдин цалик кебхнайи тахтара ачмиш гъапIнийи. Дидлан перде Каспийскдин главайин заместитель Гусейн Ункиловди ва Герман Кириленкойи алдабгънийи. Хъасин серенжемдиз уч духьнайи касари тахтайихъ кюкйир дивнийи.
