Айгуль Мягьямедова
Республикайиъ «Россети Кафари Кавказ» ПАО-йин филиал «Дагэнергойи» жигьил энергетикариз вуйи «Дагъларин кьувват» кадрйирин конкурсдиъ иштирак хьуз ккнидариз дих апIура.
Конкурсдин метлебарикан улихьна йигъари гъабхьи пресс-конференцияйиъ РД-йин энергетикайин ва тарифарин министр Марат Шихялиевди ктибтнийи. «Дагъустандин энергетикайин циркли харжиди ляхин апIбан себебарикан саб заан дережа айи пишекрарин кьадар цIиб вуйивал, дурар гьязур апIру йишв адрувал ву. Гьаддиз, республикайиъ вари мумкинваларра айивализ дилигну, учу цирклиз пишекрар гьязур апIбан месэла гьял апIбахъ хъюгънача. Региондин Глава Сергей Меликовдира думу месэла швнуб-сабан гъитIибккури, Дагъустандиъ пишекрар гьязур апIбан ляхнин месэла гьял апIуб тIалаб гъапIнийи. Магьа цирклиъ арайиз дуфнайи аьгьвалат ужуб терефнахъинди илтIибкIбан бадали, «Дагъларин кьувват» кадрйирин конкурсдин программа уьмриз кечирмиш апIбан сабпи гамар алдагъурача. Конкурсдин метлеб энергетикарин пишейин аваза цIийи алапIуб, цирклиз лайикьлу шартIариъди ляхин апIуз гьязур вуйи заан аьгъювалар айи пишекрар жалб апIуб ву», – гъапнийи министри.
Конкурсдиъ иштирак хьуз 18 йислан 45 йис’ина яшарин, заан образование айи РФ-дин ватандашариз теклиф апIура. Хусуси метлеб айи дявдин операцияйин иштиракчйириз конкурсдиъ артухъ мумкинвалар тувна. Гьацира конкурсдин иштиракчйирихьан кадрйирин резервдиъ ляхнин тажруба гъадабгъуз, гележегдиъ Дагъустандин энергетикайин гъуллугъчйирин жергйириъ учIвуз хьибди. Конкурсдиъ иштирак хьуз аьрзйир 2025-пи йисан 1-пи апрелизкьан кьабул апIиди. Конкурсдин финал Пятигорскдиъ аьгъюваларин центр «Машукдиъ» гъабхуз пландиъ а.
«Дагъларин кьувват» конкурсдиз аьрзйир Дагъустандианси, уьлкейин жара регионарианра тувра. Гъийин йигъаз 60 касдихьан аьрза дуфна, дурарикан 6 аьрза хусуси метлеб айи операцияйин иштиракчйирихьан ву. Конкурсдин гъалибчйирихьан «Россети Кафари Кавказ» ПАО-йиъ стажировка гъабхуз, «Дагэнергойиъ» ляхниъ учIвуз, заан гъуллугъариъра дийигъуз хьибди. Конкурсдин вари паяриъ заан баллар гъадагъдарикан финализ 40 кас гъядягъиди», – гъапнийи «Дагэнерго» филиалин директорин вазифйир тамам апIурайи Арсен Гьяжиевди.
Учу газатдин улихьна нумрайиъ ЦУР-ин улупбар гъахнийча. Думу улупбариъ дупнайиси, улихьна йисариси дарди, гьаму йисан кьюрдну аквар кутIуршвнайивалин гьякьнаан гъюру аьрзйирин кьадар цIиб гъабхьну. Электричествойин симар хъудутIнайи йишвар, трансформаторный подстанцийириъ аварйир къайдайиз хури, рас апIбан ляхнар гьяракатниинди кIули гъухну.
Гележегдиъ агьалйир электроэнергияйихъди тямин апIбан ляхин хъана артухъ къайдайиз гъюр кIури, умуд киврахьа.
