Гюльнара Мягьямедова
Дагъустандиъ хусуси метлеб айи дявдин операцияйин иштиракчйириз вуйи «Дагъларин жюрэтлувал» образованиейин программайин иштиракчйирин дарсар ккергъна. Аьгъювалар тувбан сабпи пай Дагъустандин Глава Сергей Меликовди ачмиш апIували региондиз вуйи проектдин важиблувал улупура.
Сергей Меликовди урхувалихъ хъюгънайидар тебрик гъапIну ва дурари гележегдиъ гьюкуматдин ва республикайин муниципальный гьюкмин органариъ лихругандиз аьгъювалар гъадагъуб чарасуз вуйиваликан гъапну.
«Дагъларин жюрэтлувал» образованиейин программайин иштиракчйирин сабпи пай (модуль) ккебгъна. Гьюкуматдин политика ва идара апIбан гъурулуш аьгъю апIбаз бахш дапIнайи курс сад йисан давам хьибди ва диди академический 502 сяаьт дидисна.
Курс тажруба айи аьлимарин ва экспертарин кюмекниинди РАНХиГС-дин гьюкуматдин управлениейин Заан мектебди уьмриз кечирмиш апIиди.
Проектдиъ иштирак хьуз аьрзйир туву 1500-кьан касдикан тестар ва сюгьбатар гъахури, военный 35 гъуллугъчи гъядягънийи. Дурар урхбахъ хъюгъна. Резервдин дахилназ 62-сан кас гъадагъна.
Сентябрин 8-пи йигъан «Дагъларин жюрэтлувал» программайин сабпи модулин иштиракчйирихъди швнубна саб серенжем кIули гъухну. Дурарихъди гвачIнинган Тюбе поселокдиъ «Сарыкум» комплексдин базайиъ машгьур спортсменди физический культурайин дарс гъубхну. ЦIиб кьандиси урхурайидарихъди улихьна йигъандин асас натижйир йивури, гъийин йигъан дапIну ккуни ляхнин план дюзмиш гъапIну.
Пландиинди уьлкейин тарихдикан дерин аьгъювалар тувуз хъюгъну. Дурариз «Урусат – йиз тарих» тарихи паркдиъ «Урусат гьюкуматдин тарих» темайиан интерактивный лекция гъубхнийи.
Лекцияйин кьяляхъ урхурайидарин десте Дагъустандин милли музейиз гъушну. Душваъ Халкьдин Собраниейин комитетдин председатель Артур Исрапиловди республикайин гьюкмин органарин гъурулушдикан яркьу мялуматар тувну. Дагъустандин тарихи ирснахъди таниш апIбан дахилнаъди программайин иштиракчйириз музейин экспонатар улупру экскурсияра тешкил гъапIнийи.
Йигъандин хябяхъ шули, алапIнайи цIихъ хусуси пишекарвалин гьякьнаан урхурайидарихъди насигьятчйири ачухъ сюгьбатар гъухну.
«Дагъларин жюрэтлувал» программайин выпускникар Дагъустандинси, вари Урусатдин важиблу гъуллугъарин кIулиъ духьну, дурар агьалйирин гъайгъушнаъ шул кIури, умуд кивурхьа.
