Наргиз Гюлечова
Дагъустандин ругариин кьюбпи ражари Вариурусатдин жинснан марччарин ва цIигьарин выставка кIули гъябгъюра. Сач республикайин кIулиъ айидари, гъулан мяишатдин ва ипIру-убхъру сурсатарин министерствойи XXIII выставка лап маракьлуди тешкил гъапIнийи, дуфнайи хялариз думу гизаф кьабул гъабхьнийи. Гьаддиз XXIV выставкара Дагъустандиъ гъабхуз йикьрар адабгънийи.
Узу РД-йин гъулан мяишатдин ва ипIру-убхъру сурсатарин министр Мухтарбий Аджековдихъди улхьан йигъан гюрюшмиш гъахьи вахтна, дугъу гъюру йисанра гьаму выставка республикайиъ гъабхурхьа кIурайидар а, мумкин ву сабсан ражари му маракьлу, вариурусатдин дережайин серенжем ухьухь гъабхуз, кIури хабар тувнийи. «Му ражари выставкайиъ 24 региондиан вуйи швнуб-саб жинснан чарвйир ва цIигьар тумраз уьрхюрайи мяишатар иштирак шула. Выставкайин тешкиллувалра ужуб ву. Му проект уьмриз кечирмиш апIуз кюмек тувбаз лигну, Сергей Алимовичдиз ва Аьбдулмуслим Мухудиновичдиз чухсагъуз пуз ккундузуз.
Выставка кIули гъабхбан бадали, 18 миллион манат жара дапIнайи. Гъи магьа Урусатдин Кьибла регионар вари мина уч духьна. Ич асас метлеб гьамусдихъантинара чарвйирин циркил ужуди артмиш апIуб ву», – гъапнийи министри.
23-пи майди 24-пи ражари гъабхурайи Вариурусатдин жинснан чарвйирин ва цIигьарин выставка Каспийск шагьрин аьтрафариин ерлешмиш дубхьнайи Анжи Арена стадиондиин ачмиш гъапIнийи. Мина Урусатдин жюрбежюр регионариан, гьадму гьисабнаъди Запорожский ва Херсонский областарианра жинснан чарвйир ва цIигьар тумраз уьрхюрайи мяишатарин вакилар дуфнайи. Вари выставкайиз, дидин тешкилатчйирин мялуматариинди, 66 мяишатди 33 жинсан чарвйир ва цIигьар гъахну. Назук ччилар, зирек сумгар, аьхю рижвар хъайи гадар, гъатху, диркьи рангнан хьа али марччар, жюрбежюр жинсарин цIигьар, йиккун жинснан жердкьяр, гьар са-саб тоннатIан зина чIиви гъагъ айидар, бицIи дажар – мушваъ уч дапIнайи мал-къарайи инсандин улра, юкIвра тухъ апIуйи.
Дидлан савайи, шубуд йигъандин арайиъ выставкайиз дуфнайидарихьан ахалтеки жинснан гьяйвнариз, кавказдин жинснан гамшариз, девйириз тамаши апIуз, чарвйирин нисун, гъеебццу дулдурмайин тIяаьм дадмиш апIуз, яйлагъариъ арфари уч гъапIу йиччвухъди ерли укIарин чай убхъуз мумкинвал хьибди.
Ургуб районди выставкайиъ чпин майднарра ккабалгнайи. Гьадрарин арайиъ Хив райондин Мажвгларин халачйир урхру фабрикайин пишекрари табасаран халачйир, гьалвар, кюмесар гьатIарццнайи, аьшкь айидариз халачийик гугар китIуз улупурайи. Гьарсаб майдандиин милли мукьмар, мяълийир ерхьурайи. Мягьячгъалайин «Пягьливан» кIуру циркнан мектебдиъ урхурайидари пягьливнар илитбан сягьна улупурайи.
Серенжем республикайин Правительствойин председатель Аьбдулмуслим Аьбдулмуслимовди, Сергей Меликовдин ва чан терефнаан уч духьнайидариз ва республикайин хялариз саламар пувалиинди ачмиш гъапIнийи. Дугъу кьюдпи йисанра хъади-хъади му маракьлу выставка республикайин жилариин гъабхуз мумкинвал тувбаз Урусатдин гъулан мяишатдин министерствойиз ва Марччлихънарин милли союздиз чухсагъул гъапнийи.
«Дагъустан гъулан мяишатдин, хъа асас вуди малдарвалин цирклин республика ву. Чарвйирин циркил республикайиъ варжар йисариинди артмиш апIурайиб ву. Айи чарвйирин ва цIигьарин кьадарниинди, Дагъустан ихь уьлкейин варитIан кIакIначи регион вуди гьисаб дапIна. Гьамусяаьт республикайиъ 12 жюрейин жинсарин чарвйир артмиш апIура. Дагъустандин чарвайин йикк Урусатдин хайлин регионаризси, харижи уьлкйиризра машгьур дубхьна», – гъапнийи чан улхбаъ Аьбдулмуслимовди.
Выставка ачмиш апIбаъ иштирак шулайи гьюрматлу хяларикан сар, Урусатдин гъулан мяишатдин министрин заместитель Максим Увайдовдира уч духьнайидар му мяналу серенжемдихъди тебрик гъапIнийи.
«Шубуд йигъазди Дагъустан Урусатдин чарвйирин меркез дубхьна. Йиз фикриан, думу лап гьякьлу ляхин ву, фицики мушваъ ухьуз улупуз ужубра, чан гьякьнаан улхуз шлубра гизаф а.
Къайд апIуз ккундузузки, ккудубшу йисанра Дагъустандиъ кIули гъубшу XXIII Вариурусатдин жинснан чарвйирин ва цIигьарин выставкайи ужудар натижйир улупну. Умудлу вуза, ццира ихь жинснан мал-чарвйир артмиш апIурайи мяишатар чиб-чпин тажрубайихъди таниш хьиди.
Мидланра гъайри, выставка гъябгъюрайи йигъари циркил артмиш апIбан месэлйириз бахш дапIнайи жюрбежюр заседанйирра кIули гъя-гъиди. Гьаму Дагъустандиъси, гъи выставкайиъ иштирак шулайи имбуну регионариъра циркил ужуди артмиш апIури, жвуван уьлке хъанара кьувватлу ва кьудратлу апIбан бадали, гаф-чIал апIидихьа», – гъапнийи Максим Увайдовди.
Жинснан чарвйирин ва цIигьарин выставка 25-пи майдиз давам хьибди.
