Наргиз Гюлечова
Сентябрин 18 –22-пи йигъари Дагъустандиъ бицIидариз рякъяриъ хатIалувалар дархьбан вари Урусатдин гьяфта кIули гъубшну. Думу серенжем республикайин в муниципалитетариъ гъубхну. Дидин асас мяна, рякъяриъ шулайи аварйирин кьадар цIиб хьбан бадали, жямяаьтлугъдин фикир жалб апIуб ву.
Жиниб дар, гьар йисан республикайин рякъяриъ хайлин аварйир шули, бедбахтвалар арайиз гъюра. Ццийин йисан ккудубшу 8 вазлин арайиъ рякъяриъ гъахьи 1096 хатIасузвалариъ 21 бицIир гъийихну ва 158 бицIириз зийнар гъахьну.
Къайд апIуб лазим вуки, гьаму йигъари республикайин вари мектебариъ Госавтоинспекцияйин вакилари мялимарихъди ва абйир-бабарихъди рякъяриъ арайиз гъюрайи хатIасузваларин гьякьнаан, рякълан улудучIвруган бицIидари лазим вуйи къайдйир дюрхну ккунивалин гьякьнаан сюгьбатар гъахура.
Му серенжемарин гьякьнаан региондин Глава Сергей Меликовдира чан Телеграм каналиъ жвуван фикрар ачухъ гъапIну. Дугъу гъапиганси, рякъюъ айи касар мугъаятди, ихтиятди ва сар-сарихьна гьюрмат ади ккунду.
«Гьюрматлу дагъустанлуйир ва республикайин хялар! Гьамусяаьт вари Урусатдиъси, Дагъустандиъра рякъярин гьяракатнан хатIасузвал уьбхбахъди аьалакьалу вуйи вари Урусатдин гьяфта кIули гъябгъюра. Ццийин йисан асас фикир бицIидар иштиракчйир вуйи рякъярин хатIасузваларин профилактикайиз тувна.
Пуз ккундузузки, машин хъапIнайи гьарсар касди, учв рулихъ деубси, фициб жавабдарвал чаин алш, гьаммишан аннамиш апIури ккунду. Варидари уртахъди машинар хъаъри ишлетмиш апIурайи рякъ, талитнаъ ади гьялакди машинар хъаърайи трасса дар. Рякъюъ фикир дарапIди машин хъапIували, арайиз бедбахтвал хуб мумкин ву. Гьяйифки, дицдар дюшюшар фукьан вушра шула. Хъа варитIан асасуб гьадму вуки, аьхюдарин жавабдарсузвалиан бицIидар йихура.
Тербияламиш’вал, сабпи нубатнаан, хизандиан гъюрайиб ву. Гьаддиз, ухьу – аьхюдар ихь веледариз нумуна духьну ккунду. Гьарсар абайина бабу, рякъярин хатIасузваларин гьякьнаан, рякъярин къайдйир дюрхну ва инсан улдучIвру йишварихьна машин хъубкьруган ихтият духьну ккунивалин гьякьнаан чпин веледарихъди кми-кмиди гаф-чIал гъабхувал чарасуз ву. Велед, учв бицIи яшариъ имидитIан, рякъярин къайдйирихьна вижнасузди янашмиш хьувалиан гъайри кас сагъламвалихъ ва уьмрихъ мягьрум хьуз мумкинвал айивалин гъавриъ ади тербияламиш дапIну ккунду.
Рулихъ хъайидарихьна ва рякълан улдучIвурайидарихьна илтIикIури, нубатнан ражари пуз ккундузуз: рякъяриъ мугъаятди, ихтиятди ва сар сарихьна гьюрмат ади гъузай.
Умуд кивраза, республикайиъ рякъярин гьяракатнан хатIасузвал уьбхбан вари Урусатдин гьяфтайин дахилнаъди гъуху серенжемарикан файда дубхьну, аьгьвалат дигиш шул кIури. Ккун апIурза ихь рулихъ хъайидариз рякъяриъ ягъур хьуб, хъа бицIидариз — хатIасузвалар дархьуб», – кIура Сергей Меликовди.
