Айгуль Мягьямедова
19-пи майди, БицIидарин жямяаьтлугъ тешкилатарин йигъан Дагъустандин Глава Сергей Меликовди «Сарпидарин гьяракат» («Движение Первых») тешкилатдин региондин отделениейихъди аьлакьа уьбхюрайи Координационный советдин заседание кIули гъубхну. Заседаниейиъ Урусатдин бицIидарин ва жигьиларин «Сарпидарин гьяракат» тешкилатдин правлениейин председатель, Урусатдин Игит Артур Орлов иштирак гъахьну. Дидин гьякьнаан республикайин кIулиъ айирин мялуматарин гъуллугъну хабар тувра.
Сергей Меликовдин гафариинди, Дагъустандиъ «Сарпидарин гьяракат» тешкилатдиз 337 агъзур иштиракчи дахил шула. Республикайиъ дидин 1535 сифтейин ва 52 ерли отделенйир ляхник кирчна апIура.
Му живанарин ва жигьиларин тешкилатдин региондин отделениейи жанлу ляхин гъабхури, 2 йистIан артухъ ву. Гьаму йисан эвелианминара баяр-шубари хайлин ляхин дубхна, бицIидариз ва жигьилариз тербия тувбан, тарихи гьядисйир кIваин уьрхбан ватанпервервалин проектариин лихурайидарин кьадар артухъ шула.
Сергей Меликовди Дагъустандин 19 агъзур хизан иштирак гъахьи «Тарих уьбхрудар», «Учу Урусатдин ватандашар вуча» проектар ва «Гъалибвалин унчIвар» акция кIваин гъапIнийи. «Думу ихь аьдатариз апIурайи гьюрмат ву. Ухьуз, бицIидаризра, аьхюдаризра, ихь тарих кIваинди имбували ва дид’инди дамах апIурайивали юкIв шад апIура», – гъапну дугъу.
Гъийин «Сарпидарин гьяракатну» советарин деврин мектебдин ужудар аьдатар давам апIура, хъа асасуб – абйирин гьунарар кIваинди уьрхюра. БицIидарин тешкилатарин йигъан Мягьячгъалайиъ Гъалибвалин ирс гъурубкьдарин парад гъабхьну. Думу параддиъ 2500-тIан артухъ бицIидар, жигьилар ва дурарин насигьятчйир иштирак гъахьну.
Мидланра савайи, 19-пи майдиъ «Зарница2.0» дявдинна ватанпервервалин тамшийин региондин пайнан натижйир гъивну.
«Финалин пайназ учву Урусатдин Игит Энвер Набиевдиз теклиф апIбакан гизаф шад вуза. ЦIиб вахтназ отпускдиз дуфнайи дугъаз гьаму серенжемдиъ иштирак хьуз мумкинвал гъабхьну. Ихь жигьилар гъалибчйирин наслар ва хусуси метлеб айи дявдин операцияйин иштиракчйир вуйи гьаму деврин игитарин ккабгъуз даршлу рюгьнан аьлакьайин гъавриъ а», – къайд гъапIну Сергей Меликовди.
Республикайин Главайин ватанперверваликан вуйи суалназ заседаниейиъ иштирак шулайи Табасаран райондин Сарпидарин советдин председатель Алина Къарахановайи (Вариурусатдин илимдин жигьиларин «Гележегдиз гам» форумдин финалиъ гъалиб гъахьи Алина Къарахановайикан газатдин саб нумрайиъ макьала тувнийча) дерин жаваб тувну. Дугъу чан гьиссарикан гьамци гъапну: «Ватанпервервал – жвуван Ватан ккун апIуб, жвуван ватанагьлийириинди дамагъ апIуб, уьлкейин кьудратлувалиин умудлу хьуб ву. Ихь игит жигьилар рякъюри, ухьу гъалиб шлувалиин умудлу вуза».
Сергей Меликовди жигьил риш ватанпервервалин мянайин гъавриъ айивализ заан кьимат тувну. Дагъустандин Главайин фикриинди, уьлкейин кьудратлувал, халкьдин аьдатар ва Ватан уьбхбакан ветеранарин насигьятар гьисс апIури женгнан сенграриъ айиган, ватанпервервалин гьякьлу мяна аьгъю шулу.
Дагъустандин кIулиъ айири июндин садпи йигълантина бицIидарин сагъламвал за апIбан кампания ккебгърайиваликан, хъа гьамусяаьт гьязурлугвалин ляхнар гъягъюрайиваликан ктибтнийи. БицIидарин рягьятвал гъадабгъру лагерариъ, мектебариъ тешкил дапIнайи лагерариъ «Сарпидарин гьяракатнан» сменйир гъахуб планламиш дапIна.
«Ихь жигьилари вариурусатдин дережайиъди гъахру му гьяракатнан серенжемариъ республикайин ччвур бисиди. Учу, гьюкмин вакилари, учву гъабхурайи ляхниз, кюмек вуди, уч’ан удукьруб вари апIурача. Учвуз сагъвал, кьувват, зигьим ва вижнасуздар дархьувал ккун апIураза», – кIури, илтIикIну Сергей Меликов гьяракатнан иштиракчйирихьна.
