Зубайдат Шябанова
Гьаму йигъари, улубкьурайи ЦIийи йисандин машкврахъди аьлакьалу вуди, Мягьячгъала шагьриъ Дуствалин хулаъ Дагъустандин глава Сергей Меликовди республикайиъ баркаллу зегьмет зигури лишанлу гъахьи ватандашариз Урусат Федерацияйин ва Дагъустан Республикайин гьюкуматдин наградйир тувбан серенжем кIули гъубшну.
Гьюкуматдин терефнаан пешкешар гъадагъдарин арайиъ духтрар, эскрар, образованиейин ва илимдин цирклин пишекрар, художникар, журналистар, муниципальный органарин гъуллугъчйир, артистар ва жарадар айи.
Серенжем ачмиш апIури, Сергей Меликовди, дагъустанлуйириз, уьлке ва республика артмиш апIбаъ баркаллу зегьмет зигбаз, чухсагъул мялум гъапIну.
«Гъи гьаму зализ жюрбежюр пишйирин вакилар уч духьна, ва ухьуз хайлин таза ччвурар ерхьиди. Урусат ва Дагъустан бадали учву гъабхурайи баркаллу ляхниз, жямяаьтлугъдин арайиъ сабвал уьбхбаз, жара регионарин арайиъ республикайин ад за апIбаз учвуз варидариз чухсагъул. Ичв зегьметниинди гизаф миллетар айи Дагъустандин сабвал улупурачва. Гъагъи йисари артмиш’валин аьхю месэлйир гьял апIбаъ ичв сабвал гьаргар бина ва асас шартI вуби гъахьну», – гъапнийи республикайин главайи.
Дугъу гьацира, улубкьурайи 2025-пи йис Урусатдиъ Ватан уьбхрударин йис вуди тяйин дапIнайиваликан мялумат туври, Ватандин Аьхю дяви ккудубкIну 80 йис шулайиваликан, 9-пи майди думу Гъалибвалихъди аьлакьалу серенжемар яркьуди гъахруваликан, думу дявдин игитарин гьунарариинди тербияламиш гъахьи ихь баяри гъи хусуси метлеб айи дявдин операция гъябгъюрайи йишваъ чпира игитарси улупурайиваликан гъапнийи.
Сергей Меликовдин хил’ан думу йигъан 46 касди пешкешар гъадагъну. Дурарин арайиъ Табасаран райондиан юкьур ва Хив райондин сар ихь ватанагьли айи. Акъа гъулан мектебдин директорин тербияйин цирклиан вуйи заместитель, биологияйин мялим, Урусат Федерацияйин уьмуми образованиейин гьюрматлу гъуллугъчи Мягьямедагъа Мурадханов «Дагъустан Республикайин лайикьлу мялим», Ярса гъулан агьалйир – Дагъустандин РЖД-йин кIулин инженер Ханпаша Мамаев «Дагъустан Республикайин транспортдин лайикьлу гъуллугъчи» ва Республикайин греко-римский кчIихбарин олимпийский резервдин спортдин мектебдин тренер Аьлимедет Исмяилов «Дагъустан Республикайин лайикьлу тренер» ччвурар тувбиинди лишанлу гъапIнийи.
Ич сюгьбатнаъ Мягьямед-агъа Мурадхановди къайд гъапIганси, му пешкеш дугъан сиягьнаъ сабпиб дар.
«Улихьна йигъари узуз республикайин главайин администрацияйин аппаратдиан зенг дапIну, серенжем айи йигъан Мягьячгъалайиз гъюбан теклиф дивнийи. ИкибаштIан, жвуву гъабхурайи ляхниз республикайин кIулиъ айидари заан кьимат тувруган, лихуз хъана артухъ аьшкь шулу.
Серенжемдин кьяляхъ узуз райондин глава Мягьямед Къурбановдира, тебрик апIури зенг гъапIнийи. Дугъу райондин образованиейин цирклиъ хайлин лайикьлу мялимар лихурайиваликан ва дурари гьарсаб гъулан агьалийин гележегдин мюгькам шибритI ипбаъ важиблу роль гъабхурайиваликан гъапнийи.
Дугъриданна, мектебдиъ лихурайи мялимари чпин дарсар кивбахъди сабси, урхурайи баяр-шубарин тербиячйир вуди, дурариз ватанпересвалин, эдебнан, намус-гъир’ятнан дарсарра кивра, жюрбежюр уьмрин дюшюшариъ кьатI’и фикир апIуз улупура», – гъапнийи мялимди.
Гьюкуматдин наградйир тувдарин арайиъ Урусатдин Яракьлу кьувватарин жергйириъ гъуллугъ апIурайи кьюр ихь ватанагьлира айи.
Сергей Меликовди Кьибла военный округдин 54-пи штабдин начальник, подполковник Ибрагьим Бебековдиз РД-йин варитIан заан награда – «Дагъустандин улихь улупу гьунарариз лигну вуйи орден», сержант Закир Гьяжимягьямедовдиз «Дирбаш’вализ лигну» медаль тувну, дурариз Ватандин улихь чпин буржи тамам апIбаъ кIубанвал улупбаз чухсагъул мялум гъапIну.
«Гьарсар дагъустанлуйиз Урусатдин маракьар уьрхбаз ва Ватан бадали жан тувуз гьязур вуйивализ чухсагъул кIураза.
Ухьуз аьгъяхьуз, гьяйифки, вари хизанариъ ЦIийи йисахъди аьлакьалу вуйи машквран йишван шадвал хьибдар. Ухьу вари сатIиди, сарун кьяляхъ дяргъру эскрарин хизанариъ айи пашманвал гьисс ва думу игит эскрариинди дамагъра апIурахьа.
Уьлкейиз Дагъустанди 13 Урусатдин Игитар тувну. Чпиин али буржи тамам апIури, СВО-йиъ иштирак шулайи агъзрарииндикьан вуйи дагъустанлуйир медалариинди, орденариинди лишанлу дапIна. Гъи, гьаму гъагъи гъуллугъ тамам апIурайи касар гьарсаб дакьикьайиъ хатIайин улихь дийигънайи игитар ву», – гъапнийи наградйир тувбан серенжемдиъ Сергей Меликовди.
«Табасарандин нурар» газатдин редакцияйин коллективдира, ихь вари ватандашар лайикьлу пешкешарихъди ва улубкьурайи ЦIийи йисахъди тебрик апIури, дурариз гележегдиъ хъана заан хъуркьувалар хьуб ккун апIура. Ихь дявдин гъуллугъчйирихъди учву багахьди таниш апIбан бадали, газатдин гъюру нумрйириъ дурарикан макьалйир чап апIидича.
