Айгуль Мягьямедова

Дагъустандин Глава Сергей Меликов гьаму гьяфтайиъ Москвайиъ Урусатдин Правительствойин председателин сарпи заместитель Денис Мантуровдихъди гюрюшмиш гъахьну. Дурари региондиъ промышленность ва гьясиллувалин карханйир артмиш апIбан важиблу месэлйир гьял гъапIнийи.

 

Асас фикир Мантуровдина Меликовди инвестицйирин проектар уьмриз кечирмиш апIуз ва гьясиллувал цIийи алапIуз мумкинвал тувру Дагъустандин промышленностдин артмиш’валин фонднан ляхниз тувнийи. Гъийин йигъаз му фондну Дагъустандиъ 34 проектдиз саки 790 миллион манатдин кюмек тувна.

Чпин гюрюшмиш хьувалин натижйирикан улхури, Сергей Меликовди республикайиъ промышленность дурумлуди артмиш шулайиваликан гъапнийи. Гьаци, гъубшу йисан инвестицйирин проектарин дахилнаъди агьалйириз лихру 500-кьан йишвар арайиз гъахну, Кьибла Сухокумскдин электромеханикайин заводдин бина-йиин микIлан установкйир гьясил апIуз хъюгъну, СтIал Сулейман райондиъ «Эксонор» турбйир гьясил апIру завод ачмиш гъапIну.

Сергей Меликовди республикайин промышленностдин артмиш’валик лайикьлу пай киврайи чIатху карханйирин – «КЭМЗ» концерндин, «Дагдизель» ва «Дагестан Стекло Тара» заводарин кIулиъ айидариз, гьацира промышленный карханйириъ Дагъустандин гележег бадали зегьмет зигурайидариз чухсагъул мялум гъапIнийи. «Гьарсаб цIийи кархана, гьяракатнаъ айи гьарсаб проект ухьуз важиблу ву. Гьаддиз дурариз вари терефариан кюмек тувра. Мисал вуди гъадабгъиш, гъубшу йисан республикайин промышленностдин 11 карханайиз 92 миллион манатдин кьиматнаъди цIийи оборудование гъадабгъуз субсидйир тувну», – гъапну региондин кIулиъ айири.

Сергей Меликовди Дагъустандин промышленностдин карханйири вари жюре бюджетариз 15 миллиард манат налогар тувуваликанра гъапнийи. Думу дакьатари яшайишдин ва инфраструктурайин проектар уьмрин гьяятдиз адагъуз, больницйир, мектебар ва рякъяр тикмиш апIуз мумкинвал тувди. «Федеральный кюмекниинди Дагъустан чан промышленность, инсанар ва уьлкейин гележег бадали либхурайи регион хьибди кIури, умуд кивраза», – къайд гъапIну Сергей Меликовди.