Наргиз Гюлечова

Аьхиримжи йисари республикайиъ электроэнергияйихъди аьлакьалу гьядисйир гизаф шула. Саки гьар йигъан наан-вуш аквар кутIушвну швнуд-сад йигъ ву, наан-вуш гуж дубхьну трансформатор гъубгну ва гьацдар жара гафар ерхьура. Му аьгьвалат фикриз гъадабгъну, циркил цIийи алапIуз хайлин ляхин гъабхура. Гьадму гьисабнаъди цIийи электростанцйирра дивра. Гъийин йигъаз Урусатдиъ варитIан аьхю кьувват айи (300 МВт) микIрахъди либхру электростанция Дагъустандиъ дивра. Думу проектдиз удучIвурайи харжарин кьадар 50 миллиард манат ву, ва гьаму йисан аьхириз проектдин гьацI пай ляхник кипуз планламиш дапIна.

 

Мидланра гъайри, республикайиъ ригъдин электростанцйирра яратмиш апIура. Гьадрарикан саб Кьибла Дагъустандин районариз вуди, Дербентдиъ 100 Мвт кьувват ади диврайиб ву. Думу гъюру йисан сабпи кварталиъ ляхник кипуз планариъ а.
Му проект Дербентдин багарихь 305 гектар жилиин «ЦIийи энергия» ООО-йин жягьтлувалиинди тешкил апIурайиб ву. Дидиз удучIвурайи инвестицйирин дакьатарин кьадар 6 миллиардна 200 миллион манат ву. Душваъ 25 гьаммишандиз ва 200-сана вахтназди вуйи лихру йишварра ачмиш апIура.

Дагъустандин энергетикайинна тарифарин министерствойиан туврайи мялуматариинди, гъийин йигъаз электростанция диврайи йишвлан арчил илтIибкIна, ва тикилишчивалин ляхнар гъахурайи инсанар яшамиш шлу йишвар гьязур дапIна. Гьацира жиликкди гъахру коммуникацйирра дизигну ккудукIна.
Му проект уьмриз кечирмиш апIбиинди, респубдикайин бюджетдиз гьар йисан 60 миллион манатдин налогарра ахмиш хьиди.