Наргиз Гюлечова
Дагъустандиъ инсанар яшамиш шлу хулариз ва яшайишдин объектариз пулсузди газ зигбан бадали юрутмиш апIурайи программайиинди шагьрариъ, гъулариъ айи хуларизси, гьамус дачйирин тешкилатаризра газ зигуз мумкинвал тувна. Дидин гьякьнаан вуйи къарар гьаму йисан апрелин вазли Урусатдин Правительствойи адабгъну. Думу къарарназ асас вуди дачйиризра сяргьятариинакьан чIанади газ зигуз шулу. Аммаки, думу участокариин дивнайи яшамиш даршулайи тикилишар яшамиш шлу хулар вуйивализ илтIикнайи документар гьязур апIуб чарасуз лазим ву. Мидин гьякьнаан улихьнаси гъабхьи пресс-конференцияйиъ «Газпром газораспределение Дагестан» ООО-йин генеральный директорин капитальный тикилишарихъна ва хуларихъна газ зигбахъди аьлакьалу вуйи месэлйир гьял апIру заместитель Расул Юнусовди гъапнийи.
Дугъан гафариинди, дачйириъ айи хулариз программайиинди газ зигбан бадали, думу дачйир (СНТ) инсанар яшамиш шулайи шагьрар, гъуларин сяргьятарин гъваларихъ хъади ккунду. Гьацира дачйир программайик каъбан бадали, гьадму СНТ-йирин гьисабнаъ дачйир айи вари агьалйири, чиб-чпихъди йикьрар дапIну, дина газ зигуз рази вуш-дарш протокол жюрейиинди сесер тувну ккунду. Хъасин, туву сесерин кьадар 51%-тIан артухъ гъабхьиш думу СНТ программайик кипру.
«Гъийин йигъаз республикайин муниципалитетарин дачйирин жямяаьтлугъар гъадагъиш, чпиз газ зигай кIури гьелелиг 6 СНТ-йиан 45 аьрзатIан дуфнадар. Гьадрарикан 15 хулариз сарун газ дизигна», – ктибтнийи Расул Юнусовди.
Гъийин йигъаз догазификацияйин программайиинди хулариз газ зигуз ккунди аьрза дибикIнайи касарин кьадар 10 азуртIан артухъ дубхьна, хъа сач 2400 агьалйирин хуларихъна газ гъизигну. Газ зигбан бадали, республикайиъ 6 агъзурна 700-тIан артухъ аьрзйирин гьякьнаан технический мумкинваларин ляхнар вари гьязур дапIна.
Дупну ккундуки, газ зигбаз льготйир айи хизанарра а. Мисал вуди гъадабгъиш, читинвал кайи, янаки сарди яшамиш шулайи инвалид касариз, читин гьялнаъди яшамиш шулайи гизаф бицIидар айи хизанариз, газ зигруган удучIву харжар ккеркбан бадали, 100 агъзур манатдин субсидйирра улупна. Мидланра гъайри, хусуси метлеб айи дявдин операцияйин иштиракчйирин хизанариз, нубатнахъ дидригъди, аьрза тувубси, газ зигура.
Гьацдар хизанарикан саб Самурхановарин хизан ву.
Хусуси метлеб айи дявдин операцияйиъ чан жан туву Наврузбег Самурхановдин уьмрин юлдаш Маринат Самурхановайи узуз туву мялуматариинди, дурарин хуларихъна саб читинвалра адарди, программайин дахилнаъди газ гъизигну.
«Дюзди кIуруш, узуз программа айиваликанра хабарра адайзуз. Узуси, СВО-йиъ жилар гъийиху шубар республикайин Главахъди гюрюшмиш хьуз гъягъюрайи вахтна, вари сатIиди айи Ватсапдин группайиъ, суалар айидари бикIай кIури, гъапнийи. Гьадмуган, дурарикан йиз месэлайин гьякьнаан Главайиз пуб ккун гъапIнийза.
Дидин кьяляхъ цIиб вахт гъябгъяйизра узуз зенг гъапIнийи ва ич хулар наан айидар вуш, гьерхнийи. Хулар ерлешмиш духьнайи йишв гъапнийза. Саб документра ккун дарапIди, йиз жилири Ватан бадали СВО-йиъ чан жан гъурбан апIбаз лигну, дурари, узу хъадаршра, чпи хулар али участокдин аьтрафарихънакьан газ гъизигнийи. Дурари гьапIраш лигуз гъушиган, газ зигурайидариз хулариъ акв адрувалин гьякьнаанра гъапнийза. Дюзди кIуруш, гьаци гъапиб вуйиз. Сабансан ражари узу участокдихъна гъюруган, йиз хулариз аквра дизигнайи. Мюгьтал гъахьнийзу. Чухсагъул мялум апIураза варидиз», – аьлава гъапIнийи Маринат Самурхановайи.
