Зубайдат Шябанова
Гьаму йигъари Урусатдин вари телеканалариъ, социалин сетариъ ва махлукьатлу хабрарин дакьатариъ шубуб гьяфтайин арайиъ ялгъузди, ВСУ-йин гьюжмарихьан блиндаждикк учв уьрхюри, учв ккагъуз гъидритди гъахьи Дагъустандиан вуйи эскер Закар’я Аьлиевдикан мялуматар ва видеороликар улупури гъахьну.
Му мялуматарин кьяляхъ Дагъустандин глава Сергей Меликовди Къизлар райондин Косякино гъул’ан вуйи эскер Закар’я Аьлиев машгьур писатель Борис Васильевдин Брестдин гъала уьбхюри гъахьидарикан вуйи «Сиягьдиъ адайи» кIуру романдин игитрихъди тевнийи.
Шубуб гьяфта улихьна Закар’я Аьлиевди гъуллугъ гъабхурайи гьюжмин десте нубатнан буйругъ тамам апIуз гьаъру. ВСУ-йин артиллерияйин гюллйириккди, дронариан ирчрайи гранатариккди, минйир кивнайи хутIлариантина швнуб-саб километр манзил гъягъбан кьяляхъ, эскрар ВСУ-йихъди женгнаъ учIвру ва дурарин опорный пункт бисуру.
БицIи вахтналан украинайин нацистари думу пункт жилихьди саб апIуру, ва кьюбиб терефаризра ихь вари эскрар дагъитмиш гъапIуваликан хабар шулу.
Швнуд-сад йигълан ихь разведчикари деету дронариан украинайин эскрари чпи кьяляхъ гъибису опорный пунктдиз цIа уьлюбхну рябкъюру. ВуйиштIан, Урусатдин сар эскер чIивиди амийи. Думу я убхъру шид, я ипIру уьл адарди, шубуб гьяфтайин арайиъ сарна-сарди душмнихъди женгнаъ ади гъахьну.
Гьамусяаьт госпиталиъ айи Закар’яйиин Запорожский областдин сенатор Дмитрий Рогозинра улукьнийи.
Хъа аьгьвалат гьамци гъабхьиб вуйи…
Закар’я Аьлиев Запорожский терефнаъ «Днепр» дестейин дахилнаъ айи разведчик-сапер вуйи. Дугъан вазифа рякъярикк минйир ккивуб ва ихь разведчикариз душмнарин минйирихьан рякъяр марцц апIуб вуйи.
Чвлин эвелиъ командованиейи дестейин улихь душмнарин хилиъ айи гьюжмиккан уьрхру йишв бисбан месэла дивру. Ихь эскрари игитвалиинди думу буйругъ тамам апIуру, амма кьяляхъна дурар артиллерияйин гужли цIин гьюжмикк ккахьру.
«Думу йишв’ина учу ухди хъуркьнийча. Женгарра ярхидар гъахьундайи. Позиция гъибисунча, амма душмандиз учу фуну сенгриъ дуснаш аьгъяди, дурари дина цIа уьлюбхну», – кIваин апIура Закар’яйи.
Йивбар ккудукIну, цIин ялав яваш гъабхьну. Эскрарикан чIивиди гъузур сар Закар’ятIан дайи. Дугъан кIул’ин сикин дарди йивру ва гюзчивал гъабхру беспилотникар тIирхури гъахьнийи. Амма дурар фунуб терефнандар вуш, Закар’яйиз аьгъю шуладайи.
Артиллерияйин йивбариан хъадабкнайи хутIилси айи чюлиъ Закар’яйи гьацI шишал гулйир уч апIуру, дугъаз сацIиб шидра бихъуру. Гьаддиинди думу кьюб гьяфтайи окопдин блиндаждикк яшамиш гъахьну.
Кьюб гьяфтайилан гулира ккудубкIу. Думуган эскри кагъзик смайлик дизигну, учв гьитIикIурайи йишвахь ачухъди дипру. Бахтсузвалианси думу ВСУ-йин эскрариз рябкъюру. Дурари нубатнан ражари Закар’я айи сенгриина цIа уьлюбхюз хъюгъру.
Гьарсаб улубкьу цIийи йигъ улихьганубдиз ухшар айиб вуйи. Ихь игит айи сенгриз гаубицйириан, танкариан йивури, дронариан, беспилотникариан минйир ирчри гъахьну. Хъа Закар’яйи дурариина чан автоматдиан цIа уьлюбхюри гъахьну.
«Пагь, швнубан дурари узу чIивиди имиди ругдикк ккивну! Гьар гвачIнинган узу хъергруган, юкьв’ина гъяйиз жан ругди ккапIну шуйиз. КкудучIвуйза, багахь йишварин гюзчивал гъабхуйза, узу чIивиди дяркъну, дурари хъана тазатIан йивбар ккергъуйи», – ктибтура Закар’я Аьлиевди.
Хъа гьадму вахтна Закар’яйин дадайиз дугъахъди «Днепр» дестейиъ гъуллугъ апIури гъахьи эскрари зенгар апIури гъахьнийи. Дадайихьна хулаз башсагълугъвал ккун апIури, гъакIи балин текелиф капIуз военкоматдин вакиларра гъафнийи.
Балин дада Халисат Аьлиева сифте улхуб фтикан гъябгъюраш гъаври шуладайи. Дугъан фикриинди, бай Москва шагьриъ саб тешкилатдиъ гъаравулди лихура. Закар’яйи чан дадайиз учв СВО-йиъ айиваликан дупнадайи. Дугъу дада аьхиризкьан му хабрихьан уьрхюрайи. Бай гъакIиваликан гъапнушра, дада хъугъундайи. Бабан юкIву велед чIивиди имбувал гьисс апIурайи. Дугъан бай гъваларихъ варжариинди минйир тIуркIурашра, швнуб-сабан ругари ккаъну гъахьнушра, саб фициб-вуш мялум дару сюгьрин кьувватну уьрхюрайи.
Нацистари чпин хилиъ айи опорный пунктназ сикин дарди гюллйир йивурайивализ ихь разведчикарира фикир тувну. Гюзчивал гъабхру беспилотникдин операторариз блиндаждин хамхрариккан душмнарин терефназди бицIи нубатариинди автоматдиан йивурайи инсан рякъюру.
«Узу хьайишвахьинди ихь дрон гъафну. Дурари узуз шид айи бутылка ипну. Дидик кагъаз кабснайи. Кагъзик: «Учхьан увухьна гъюз шуладарчухьан. Багахь хьуз мумкинвал затра адар», – дибикIнайи. Узу хиларихьди ишарйиинди «Гьялак махьан», кIури улупунза. Кагъзик: «Узуз рякъ улуп, узу яв кьяляхъди гъюрза», – гъибикIунза. Нацистарин «жакьвар» кьяляхъ гъушубси, узухь хьимбу шидра духну, минйирин чюлиантина гъажаргъза. БАРСарихьна (Урус эскрарин десте) гъурукьган, дурар узу душв’анмина фици гъафнуш, мюгьтал гъахьнийи. Эскрарин гафариинди, думу чюлиан-мина сар касра чIивиди гъафундар», — ктибтура Закар’я Аьлиевди.
Швнуд-сад йигъан Закар’яйи душмнарин дронариз фикир туври, дурар фила, фуну вахтна тIирхуруш, суракь апIури гъахьну. Хъа минйирин чюлиъ рякъ дугъаз беспилотникдин оператори улупну.
Госпиталиъ Закар’яйи сабпи нубатнаъди дадайиз зенг гъапIну ва учв сагъди айиваликан гъапну.
«Закар’яйилан гъайри узуз кьюр ришра азуз. Шубар швувахь хьайиз. Узу уьрхюрайир, узуз лигурайир йиз бай вузуз. БицIидихъанмина дугъаз архитектор хьуз ккундийи. Думу варидариз кюмек ва гьюрмат апIуз ккунир, сабурлур, аькьюллур вуйиз. Узу йиз балхъан ва СВО-йиъ айи вари ихь эскрарихъан, дурар сагъ-саламатди чпин дадйирихьна, хизанарихьна рукьуз, дурариз тербия туву абйир-бабарихъан гьар йигъан дюъйир урхураза. Гъит му дяви ухди ккудубкIри», – гъапну Закар’яйин дада Халисат Аьлиевайи.
Госпиталин кьяляхъ СВО-йин игитриз, багъри гъулси, вари Дагъустанра ккилигура.
