Гюльнара Мягьямедова
12-пи ноябриъ «Урусат – йиз тарих» тарихи паркдиъ Урусатдин журналистарин союздин Дагъустандин региондин отделениейин 65 йисандин юбилей къайд гъапIну.
«Урусатдин журналистарин союздин Дагъустандин отделениейин тарих кьалам хилиъди апIру ляхниз вафалу вуйи устадар Галина Бейбутовайи, Феликс Астратьянцди, Илман Аьлипулатовди, Азнаур Аджиевди, Гьарун Къурбановди ва хъана жарадари гъибикIну. Гъи Урусатдин журналистарин союздин Дагъустандин отделениейиъ 500-дилан зиина членар а. Дурар – жигьилар, яшлуйир, Дагъустандин вари миллетарин вакилар – телевидениейин, радиойин, чап апIбарин ва жара цирклариъ лихура. Гъийин девир читинуб ву, ригъ алабхъру терефнан идеологари дюн’яйиъ айи аьгьвалат чIюбгъбан бадали «цIикк цIирцIар» ккитруган, мялуматарин дакьатарин вакиларизра ляхин апIуз рягьятди дар. Журналистар фунуб аьгьвалатнаъра чпин пишекарвалин буржи намуслувалиинди тамам апIуз буржлу ву. Ихь улихь дийибгънайи уьмуми месэла заан пишекарвал улупури, тешкиллувалиинди ляхин апIуб ву», – гъапну Урусатдин журналистарин союздин Дагъустандин отделениейин 65 йис тамам хьпаз бахш дапIнайи серенжемдиъ Республикайин мялуматарин ва чап апIбарин агентствойин кIулиъ айи Аьбдуразакь Жамалутдиновди.
Юбилейин серенжемдиъ СЖР-ин ДРО-йин председатель, «Лезги газетдин» кIулин редактор Мягьямед Ибрагьимов, Урусатдин журналистарин союздин ляхнар идара апIрур – СЖР-ин секретариатдин кIулиъ айи Денис Токарский, Мягьячгъала шагьрин администрацияйин главайин заместитель Мавлидин Маликов, РД-йин Халкьдин Собраниейин депутат Шамил Уьмаров, РД-йин цифрайин артмиш’валин министр Юрий Гьямзатов ва хъана жарадар удучIвну гъулхнийи.
Чан улхбаъ Мягьямед Ибрагьимовди региондин отделение-йин ляхникан, тешкилатди юрутмиш апIурайи проектарикан, отделениейин улихь дийигънайи месэлйирикан ктибтнийи.
«Региондин отделениейин терефнаан Республикайин чапханайин багахь гьюкуматдин программайиинди албагурайи кючейин саб пай Журналистарин аллеяси тешкил дапIну, пишекарвалин вазифйир тамам апIури гъийиху журналистарин ччвурнахъ кивнайи гьарар айиси дюрхну, Йисандин фаслар («Времена года») кючейин терефназди айи бару уьбхюб, газатаринна журналарин комплексдин улихь гъийиху журналистарин ччвурар кайи тахта дивуб ккун апIури, Мягьячгъалайин администрацияйиз илтIикIунза. Юсуп Уьмавов кIулиъ ади, шагьрин администрацияйи ич теклифар кьабул апIур кIури, умуд кивраза», – гъапнийи дугъу.
Шадлугънан серенжемдиъ ляхниъ хъуркьувалар гъазанмиш гъапIу журналистариз гьюрматнан ччвурар, грамотйир, дипломар тувнийи. СМИ-йин артмиш’валик пай кивбаз ва Урусатдин журналистарин союздин Дагъустандин отделение арайиз дуфну 65 йис тамам хьпахъди аьлакьалу вуди, Урусатдин журналистарин союздин диплом «Табасарандин нурар» газатдин дизайнер-бицIину редактор Эльмира Багъдаевайизра (шиклиъ) тувнийи. Къайд апIуб лазим вуки, ич гъарашугъ Эльмира Багъдаевайи, дугъриданна, заан пишекарвалиинди чан ляхин тамам апIура. Газатдин коллективдин терефнаан чаз туву дипломдихъди тебрик апIури, дугъаз мюгькам сагъвал, ляхниъ хъана заан хъуркьувалар ккун апIурача.
