Зубайдат Шябанова
Гьаму йигъари Табасаран райондин администрацияйиъ нубатнан ражари райондин кIулиъ айидарин ва РД-йин тикилишчивалин, архитектурайин ва ЖКХ-йин Министерствойин гьюкуматдин сабвуйи заказчик-застройщикдин дирекцияйин вакилар гюрюшмиш гъахьну. Му ражари арайиз адабгънайи месэла убхъру штухъди аьлакьалу вуйи.
Мягьямед Къурбанов ва райондин ЖКХ-йинна тикилишчивалин кIулиъ айидар Мягьячгъалайиан дуфна Аьлимурад Бахривовдихъди ва Имран Темиркаевдихъди гюрюшмиш хьпан себеб «Табасаран район штухъди тямин апIбан» проектдиинди гъахурайи ляхнарин кьюбпи пай ккебгъуз кьан апIурайивал гъабхьну. Турбйир ккивбиинди Хючна, Хюрикк, Хянягъ, Ругуж, Пилигъ, ЦIантIил, Къужникк, Улуз, Хьарагъ, Шила, ГьепIил, ТIаттил гъулар убхъру штухъди тямин апIуру.
КIваин апIуз ккундучуз: «Марцци шид» милли проектдин дахилнаъди райондиъ штун турбйир ккивбан ляхнар 2019-пи йисан ккергънийи. Му вахтнан арайиъ Къужник гъул’ан Хючна гъулаз 23 километр манзил ади штун турбйир гъизигну.
Цци февралин вазли РД-йин гьюкуматдин закупкйирин Комитетди турбйир зигбан кьюбпи пайнан подряддин ляхнар гъахуз торгар мялум гъапIнийи. Конкурсдин натижйириинди подрядчикар тяйин гъахьну. Думу тешкилатдихъди йикьрар гьеле мартдин вазли имиди гъийитIнушра, ляхнар гъира ккергънадар. Ляхнарин заказчик РД-йин сабвуйи заказчик-застройщикдин Дирекция ву.
Проектдин бинайиинди подрядчикди райондин Къужникарин, Хюрккарин, ГьепIларин ва Хючнаарин 4 поселениейин 12 гъулаз марцци шид хпан бадали вари инфраструктура арайиз дубхну ккунду.
Сюгьбатнаъ Мягьямед Къурбановди шид зигбан ляхнар ккергъуз кьан апIурайивалиан чан наразивал улупну.
«Учу гъуларин агьалйирихьна марцци шид хъубкьайиз ккилигурача. Подрядный тешкилат тяйин гъабхьну, амма мялум дару себебариан ляхин гьамусра ккебгънадар. Думу штуз 10 агъзурихьна агьалйир ккилигура. Хьадан вахтна шид гьубкIрадар. Ляхнар вахтниинди ва ужуб ери ади ккудукIну ккунду», – гъапну райондин главайи.
Дирекцияйин вакилари цци мартди 2025-2027-пи йисари гъахру ляхнарин йикьрар йитIнайиб тасдикь гъапIну ва гъябгъюрайи йисан гъахру ляхнариз 45 миллион манат жара дапIнайиваликан гъапну. Дурарин гафариинди, подряддин тешкилатди лазим вуйи вари алатар масу гъадагъна, ва гьаму йигъари ляхнар ккергъди.
