Зубайдат Шябанова
Дагъустан аьхю мархьари ккапIиган, вари уькейиан ихь республикайиз кюмек гъюри гъахьну. Хайлин жигьилар, блогерар, машгьур касар дерднаъ ахьнайи инсанарин гъвалахъ, дурарин дерди жвуванубси гьял апIури, дийигъну. Гьадрарин арайиъ хайлин ихь табасаран баярра а. Учу, агьалйирин гьарай-сузайиъ, дерди-балайиъ кюмекнан хил гьачIабккури, сабпи дихнахъди кюмек тувуз гьязур вуйи гьарсар ихь ватандашдикан жа-жаради бикIуз гьязур вуча. Хъа гъийин макьалайин игит Москва шагьрин МГИМО-йин финансаринна экономикайин факультетдин 3-пи курснан студент Марат Аьлимурадов ву.
Вари студентаринси, дугъанра лекцйир, семинарар, сессйир гьарйигъандин аьдати уьмур вуйи. Хъа дугъан абйирин ччивар Москва шагьрихьан ярхла, дагълу Дагъустандин Табасаран райондиъ а. Гьадму саб вахтна дугъан адаш Руслан ва дада Лейла Табасаран райондин Туруф гъул’ан Москва шагьриз кюч гъахьнийи. Амма багъри ватандихьна вуйи рафтар ва багахьлуйирихъди вуйи мани аьлакьйир дурари гъудургундар. Гьар йисан хьадну Аьлимурадовар багъри ватандиз гъюри шулу.
Дагъустандиъ шид улубчIвбан бедбахтвал арайиз гъафиган, Маратдихьан гъирагъдиан лигури гъузуз гъабхьундар. Дугъу, му хабар гъеебхьубси, Инстаграмдин (Урусатдиъ гъадагъа дапIнайи тешкилат) чан страничкайиъ ва дустариз чав Дагъустандин агьалйириз кюмек апIуз гъягъюрайиваликан гъапнийи. Дугъахьна МГИМО-йиъ урхурайи студентари ва дустари дагъустандин агьалйирин кюмекназ уч гъапIу 230 агъзур манат тувру. Думу пулра хьади, Марат Мамедгъалайиз гъафну.
«Йиз ими Жаруллагь Аьлимурадов шид улубчIву сабпи йигъланмина Мамедгъалайиъ ади гъахьну. Ихь халкьди, саб хизанси гъудужвну, бедбахтвалиъ ахьнайидариз сатIиди кюмек апIурайи видеороликариз лигури гъузуз гъабхьундарзухьан. Яни йиз юкIв думу инсанариз кюмек апIуз Дагъустандиз гьялак шулайи. Я дарсар, я хураг, я ляхин рябкъюри адайзуз.
Узу кюмек апIуз гъягъюрайибдикан хабар гъабхьи хайлин жигьилари, узухьна гъагъи аьгьвалатнаъ ахьдариз тувуз пул хътапIну. Уч гъабхьи 230 агъзур манат йиз имийихъди швнуб-саб хизандигъна пай гъапIунза. Дурарин арайиъ жилир хътарди 2-3 бицIир сарди уьрхюрайи дишагьлийир, вая майиф веледар, кьаби абйир-бабар айи хизанар айи.
Узу мюгьтал гъапIуб гьадму вуки, учу кюмек апIурайи йишваъ бязи касарин хулар зат имдарди шту гъухнийи. Хъа гьадму хуларин дердну ва хажалатну ккагънайи эйсйир, гъуншйириз кюмек апIуз дуфнайи. Вари девлет, хал-йишв, мал-къара сабйишв’инди гъудургу саспи инсанарин улар ва дурарин чашмиш духьнайи лигуб уларихь дийибгъну имийиз. Дурарин лигуб жарадаринубдиз ухшар айиб дайи. Дурар шту гъубху мутмуйихъ ва ккадахьу хуларихъ ишурадайи. Дурарин дерди гележегдикан вуйи. Хъа инсанарин терефнаан чпиз апIурайи кюмекну дурар кьувватлу апIурайи.
Учу узухьна уч дубхьнайи пул гъагъи аьгьвалатнаъ айи хизанариз пай дапIну гъюрайиган, сар кьаби баб, чан хтулра хъади, ич улихьна гъафнийи. Дугъу узуз лигури, варидариз кюмек апIурачва, узузра кюмек апIинайчва, жан баяр, гъапнийи. Думуган узу дугъаз 20 агъзур манат тувунза», – ктибтура Маратди.
Марат гьамусяаьт чан дарсариъ а. Ич сюгьбатнаъ дугъу чахьан артухъ вахтна Дагъустандиъ гъузуз дархьиваликан пашманди гъапнийи. ЖвувкантIан, жвуван хизандикантIан ва дарсарикантIан, жарадарин дерди-гьялнакан фикрар апIурайи Марат табасаран халкьдин вакил ву. Узу гьацдар баяр айи халкьдин риш хьувал, йиз бахтси гьисаб апIураза. Гъит йиз миллетдигъ гьацдар игитар хъана артухъ ишри. Хъа узу дурарикан макьалйир дикIуз йигъ-йишв гьязур вуза. Гьязур йихь, цIийи рубрикайин нубатнан игит!
