Гюльнара Мягьямедова

Чпин хушниинди жюрбежюр ужувлан ляхнариз кюмек тувуб ихь жямяаьтлугъдин уьмрин саб пай дубхьна. Инсанвалин думу тереф COVID-19 тарабгънайи вахтнаъ лапра яркьуди ашкар хьуз хъюбгънийи. Хъа Урусатди Украинайиъ хусуси метлеб айи дявдин операция ккебгъиган, чпин хушниинди кюмек туврударин кьадар хъана артухъ гъабхьнийи. Пуз ккундузузки, редакцияйиз гъафи хусуси метлеб айи дявдин операцияйин иштиракчйирин гафариинди, гьюкуматди ихь эскрар лазим вуйибдихъди бегьем тямин дапIна. Гьаци вушра, гизафдари эскрариз кюмек тувуб чпин буржиси гьисаб апIура: дишагьлийири мани атIнар ургъура, мектебариъ айи мялимари бицIидарихьди ужудар гафар кайи кагъзар дикIуз гъитра, гизафдари фронтдиз чпин сад йигъандин маважиб хътапIура.

Дагъустандин «Дадйирин кьувват» кIуру жямяаьтлугъ тешкилатдин вакилари хусуси метлеб айи дявдин операцияйин иштиракчйириз тепловизорарихьан (манишин гъюру йишв улупру аппарат) ва дронарихьан уьрхру плащар ва лазим шлу жара алатар гьязур апIура. Дидин гьякьнаан республикайин правительствойин мялуматарин дакьатари хабар тувра.

Дишагьлийири чпи гьязур апIурайи алатар Избербаш шагьриз жигьиларин «Каспий» образовательный форумдиз дуфнайи Дагъустандин Правительствойин председатель Аьбдулмуслим Аьбдулмуслимовдиз улупну.
Тешктилатдин вакилари хусуси метлеб айи дявдин операцияйиъ айи эскрариз фицдар шей’ари кюмек апIураш, ктибтну. Улупдарин арайиъ плащар, дубгънайи чул, сенграриъ айиган кархьру шамар айи. Тешкилатдин вакил Мегьрибан Муслимовайин гафариинди, шамар форумдиъ гьязур дапIнайидар вуйи, дурар гьеле манидира имийи.