Мейлан Нежефов
Вахтарик иццру шулу дявдин зийнар,
Вахтну дурар сагъ апIуру явашди.
Амма вахтнахьанна сагъ апIуз шулдар,
Дявдин зийнар, эскру гъахи чан кIваъди.
Дявдин зиянвахтну сагъ дапIну илцифишра, дидин учIврушин эскран кIваан саб вахтнахьанра ккядябхъюз даршул. Дугъу гьадму кьягьял эскрарин уьмрикан чан худлар-гудлариз ктибтури, дурарин бедендиъ ватанпервервалин гьиссар уягъ апIуру.
Мурадхан Мурадханов гьацдар игит абйирикан ву. Думу 1917-пи йисан 15-пи майди Кюре округдиъ Мажвгларин гъулаъ бабкан гъахьну. Ккергъбан классарин аьгъювалар багъри гъулаъ гъадагъну, хъасин райондин Зилдикк, ГъванцIил гъулариъ урхуб давам апIуру. Мектеб кудубкIган, Буйнагъск шагьрин рабфакдик урхуз кучIвру. 1939-пи йисан 15-пи июнди чан хушниинди СССР-ин Яракьлу кьувватарин жергйириз гъуллугъ апIуз гъягъюру. 1940-42-пи йисари стрелокди, курсантди, минометдин батареяйин командирди гъуллугъ гъапIну. Курсар ккудукIбахъан, 1943-пи йисан стрелковый ротайин командирин вазифйир кIули гъахури гъахьну. 1944-пи йисан Актюбинск шагьриъ дявдин комендантди гъилихну. Дидлан савайи, думу 2-пи Прибалтикайин фронтдин 37-пи армияйин 127-пи кIул’инди вуйи стрелковый аьлакьайин бригадайин офицерди, дявдин майднарин дирбаш женгчи вуди гъахьну.
Фронтдиъ улупу игитвализ лигну, Мурадханов «Уьру хяд», «Ватандин Аьхю дявдин 1-пи дережайин» орденариинди ва саб кьадар медалариинди лишанлу дапIна. Дугъаз И.В. Сталиндихьан хусуси «чухсагъул» мялум апIбан кагъазра а.
Дявдин кьяляхъ йисари багъри ругариина гъафи фронтовикдиз гъуландарин арайиъ аьхю гьюрмат айи. Сифте думу партияйин Хив райкомдин инструкторди, хъасин гьадушваъ председателди гъилихнийи. Т. Юзбеговдин ччвурнахъ хъайи Ярккарин ва «Уьру хяд» ччвур тувнайи Мажвгларин гъуларин колхозарин председательра гъахьнийи. 1960-пи йисан Ташкентдин тикилишдин техникум ккудубкIну, багъри райондин мяишатариъ хайлин йисари прорабди гъилихну.
Дирбаш абайин ччвурнаккди Мурадхановарин хизандиз 1987-пи йисан 20-пи феврали бицIи малайик гъафну. Мурадхан Керимханович, 2005-пи йисанбагъри гъулан 11-пи класс ккудубкIну, гьадму йисан армияйин жергйириз гъягъюру. Армияйин кьяляхъ жюрбежюр тикилишчивалин ляхнариъ лихури, хъасин телефонар, компьютерар рас апIру салонариъ чан мадар апIурайи живан 2022-пи йисан Уьлкейин Яракьлу кьувватарихъди контракт йибтIну, Урусатди Украинайиъ гъабхуз хъюгъю хусуси метлеб айи дявдин операцияйиъ, иштирак хьуз гъушну. 2023-пи йисан Запорожский областдин багахь гъягъюрайи женгариъ гъагъи зиян гъабхьи Мурадхан вазариинди аьзарханайиъ дахъну гъахьнийи. Гьадму йисан, лезги миллетдикан вуйи Эльмира кIуру шурахъди дугъу чан уьмурра ккабалгнийи.
Дявдин майдандиъ чаз бакар гъахьи дустар кIваин али Мурадхан хъана дявдиз гъушну. Жюрэтлувализ лигну, дугъаз «Хусуси метлеб айи дявдин иштиракчи», «Дирбаш’вализ лигну» медаларра тувна.
Дирбаш уьмрин юлдаш гъюру рякъ улариъ уьбхюрайи Эльмирайи Мурадхандин уьмриз Амир кIуру байра гъахну. Гъит дурарин уьмриъ дявди ипнайи фигъан дубхьну, гъалибвалин аьхир айиб ибшри ва хьадукран кюкдихъ хъайибси рябкъюрайи хизандиз аку йигъар кьисмат ишри!
