Наргиз Гюлечова
2021-пи исхъан мина Дагъустандиъ дюгю убзурайи хутIларин кьадар хайлин артухъ дубхьна. ХутIларихъди сабси, ккадабцIурайи сурсатдинра. Кьюд йис улихьна республикайиъ айи дюгдин хутIларин кьадар 27 агъзур гектар вуйиш, гьамус саки 32 агъзур гектар дубхьна.
Гъадабгъурайи бегьернакан кIу-руш, 2021-пи йисан Дагъустандиъ уч гъапIу дюгдин кьадар 119 агъзур тонна, хъа 2022-пи йисан 129 агъзур тонна вуйи. Цци тахил хъанара артухъ ккадабцIуз планариъ а.
Республикайин гъулан мяишатдин ва ипIру-убхъру сурсатарин министерствойин пресс-гъуллугънаан тувнайи мялуматариинди, гьаму йисан региондиъ 140 агъзур тоннайинкьан дюгю уч апIиди. Дюгдин бегьер артухъ хьпаъ асас вуди кюмек апIурайиб, Къизлар ва Бабаюрт районарин арайиъ Каргалийин шид пай апIурайи йишв’ан зигурайи шид ву. Гъулан мяишатдиъ ишлетмиш апIурайи хутIлариз гьамушв’ан шид зигбан ляхнар гъюру йисан аьхирихъна гъиди. Гьаддин кюмекниинди, республикайин кафари терефназди айи 114 агъзур гектарин хутIлариз читинвалар адарди шиз тувуз мумкинвалра хьибди. Гьаддихъди сабси, бегьер ккадабцIбан натижйирра ужудар хьувал планламиш дапIна.
Къайд апIуб лазим вуки, 2025-пи йисхъан мина, республикайиъ дюгдихъди ляхин апIурайи мяишатариз чпин хутIлариъ «Дагъустан – 2» дюгдин сортра убзуз мумкинвал шула. Думу сорт улихьдин вахтари ади гъабхьиб ву, амма саб вахтна гъудубгнийи. Аьхиримжи йисари илмин вакилариз му сортнан дюгдин тумар гъидихъну, ва дурари сорт цIийи алапIну. Йисариинди му сортнан зиин ляхин гъабхбан натижайиъ, дюгдин 300 кило тумар уч гъапIну. 2025-пи йисхъан мина республикайин хутIлариъ думу дюгюра убзиди. Гьадму сортнан дюгдин бинайиин Дагъустан Республикайин гъулан мяишатдин Федеральный илмарин центриъ айи илмин гъуллугъчйири, ихь региондин тябиаьтдин гьавайиз хас вуйи хъанара жара сортар арайиз хувалиинра ляхин гъабхура.
