Умгьанат Сулейманова
ЦIиб улихьнаси Дагъустандин парламентдин председатель Заур Аскендеров хусуси метлеб айи дявдин операцияйиъ иштирак шулайи шубур эскрин дада, ТIаттил гъулан агьали Багьарат Мягьямадовайихъди ва дугъан риш Зумруддихъди гюрюшмиш гъахьну.
– Ватандиз вафалу шубур кас, шубур кьягьял эскер тербияламиш апIбаз увуз чухсагъул кIурача. Гъи дурари чпин вари кьувватар Урусатдин милли хатIасузвал уьбхбаз бахш апIура. Мицисдар хизанариинди гъи ихь республикайи дамагъ апIура. Гьар йигъандин яшайишдиъ учвуз алахьурайи читинваларикан пуб ккун апIураза, ичв фунуб тIалаб вушра тамам апIуз гьязур вуча», – гъапнийи Заур Аскендеровди Багьарат Мягьямадовайиз.
Гьелбетда, гъулаъ яшамиш шулайи касариз ккуниб яшайишдин гъулай шараитар ву, гьаддиз Багьарат Мягьямадовайи ТIаттларин гъулан кьялан кючейиин асфальт улубзуб ккун гъапIнийи. Республикайин парламентдин председатели дугъан тIалаб тамам апIуз гаф тувнийи.
Багьарат Мягьямадова ТIаттил гъулаъ 1958-пи йисан бабкан гъахьну. Дугъаз сар чи ва хьур чве а. Мектеб ккудубкIбалан кьяляхъ Багьарат гъулабай Саидягьмад Мягьямадовдиз жвуваз гъягъюру.
«Хизан бицIидарилан ккебгъруб ву. Дюн’яйиъ варитIан аьхю бахт дада хьувал вушул. Дишагьлийин уьмрин мяна ужудар гъиллигъариинди тербияламиш дапIнайи веледар, наслар ву. Албагу мюгькам хизанариъ веледар тербияламиш апIбаъ намуслувализ, эдеблувализ эгьемият тувра. Мициб янашмиш’вал гьякьлуб ву», – гъапну машгьур прозаик, философ ва публицист Александр Герценди. Урус литературайин классикдин гафар гьякьлудар вуйиб Мягьямадоварин хизанди субут апIура. Багьаратди ва Сеидягьмадди хьур велед, шубур бай ва кьюр риш, аьхю ва тербияламиш гъапIну, хъа гъи 13 худлиз чпин уьмрин тажрубайин дарсар тувра.
Аьхю хизан арайиз адапIуб рягьят ляхин дар, гьаддиз Багьарат халайи, чан кьюрид шубар, чан кюмекчйир, табасаран дишагьлийин аьдати кесп вуйи халачачивалиин машгъул хьуз гъитну.
Дидлан савайи, дурарихьди заан образование гъадабгъузра гъитну. Мягьямадоварин вари веледариз чпин хал-хизан а. Аьхюну риш Зумруд Мягьячгъалайиъ, Аксана Анапайиъ яшамиш шула.
Мягьямадоварин шубрид баярра абйир-бабари чпиз туву тербияйиз лайикьлудар гъахьну, ва гъи дурар гьюкуматдин, хизандин, багъри инсанарин умудлу даягъар ву. Аьхюну бай, Мухтар Мягьямадов, 1981-пи йисан ТIаттил гъулаъ бабкан гъахьну. Мектебдиъ, хъасин ДГПУ-йиъ дурхну, думу армияйиз гъягъюру. Эскервалин бурж тамам апIбан кьяляхъ дугъу контрактдиинди Чечен республикайиъ гъуллугъ апIури гъахьну. Мухтар шубуб дявдин ветеран ву. 1999-пи йисан Чечен республикайиъ гъахьи дявдин гьяракатариъ, 2008-пи йисан Кьибла Осетияйин дявдин гъярхьувалариъ иштирак гъахьну. 2025-пи йисан 7-пи авгъустдихъанмина Мухтар Мягьямадов хусуси метлеб айи дявдин операцияйиъ украинайин миллетчйирихъди женгнаъ учIвна. 15-пи октябри дугъаз зиян гъабхьну, ва гьамусяаьт Мухтар Луганск республикайин кьушмарин аьзарханайиъ а.
Мягьямадоварин кьюрпи бай, Мягьямадов Мейлан, 1983-пи йисан бабкан гъахьну. Мягьячгъалайиъ ДГПУ-йин физкультурный факультет ккудубкIну, Мейланди Ватан уьбхрударин жергйириъ учIвуз кьаст гъапIну. Сифте дугъу контракдиин къул дизигну, армияйиъ гъуллугъ апIуру. Саб кьадар вахтналан думу Чечен республикайиз гьаъру. 2025-пи йисан 22-пи январихъанмина лейтенант Мейлан Мягьямадов СВО-йиъ иштирак шула.
Заур Мягьямадов 1988-пи йисан бабкан гъахьну. Мектеб ккудубкIну, думу 2005-пи йисан Дагъустандин гьюкуматдин халкьдин мяишатдин университетдиъ экономикайин факультетдик урхуз кучIвну. 2011-пи йисан Чечен республикайин Шали гъулаъ ерлемиш дубхьнайи оборонайин министерствойин 71718-пи нумрайин эскервалин частнаъ 2017-пи йисазкьан контрактдиинди инженервалинна сапёрвалин ротайиъ пропорщикдин вазифйир тамам апIури гъахьну. Нубатнан контрактдин вахт ккудубкIбалан кьяляхъ Заур Мягьямадов Ростовдиз 72-пи нумрайин танкарин батальондин командирин гъуллугъниина гьаъру. Саб бицIи вахтналан дугъу Кьибла Осетияйин Цхинвал шагьрин 4-пи нумрайин военный базайиъ старшинайин гъуллугъ апIуз хъюгъру.
2022-пи йисан 20-пи майдиъ Заур хусуси метлеб айи дявдин операцияйиз танкарин взводдин командирди гьаъру. 2023-пи йисан 23-пи январи Зауриз лейтенант ччвур тувну. Жвуван халкь, Ватан бадали намуслувалиинди эскервалин буржи тамам апIурайивализ лигну, думу хайлин медалариинди лишанлу дапIна, гьадму гьисабнаан «Георгиевский хачран 200 йис» кIуру мухрик кибтIру лишниинди, Жуковдин, «Эскервалин жюрэтлувализ лигну», «Женгнан дуствал мюгькам апIбаз лигну», «Хусуси метлеб айи дявдин иштиракчи» медалариинди.
Гъит, Мягьямадоварин баяр, хусуси метлеб айи дявдин операцияйиъ гъалиб духьну, ислягь йигъар хьади кьяляхъ гъюруганси ибшри.
