Гюльнара Мягьямедова 

27-29-пи августди Дагъустандиъ Вариурусатдин милли вещаниейин «Евразияйин сес» кIуру VI фестиваль кIули гъубшну. Серенжем республикайин кIулиъ айирин вазифйир вахтназ вуди тамам апIурайи Федор Щукиндин кюмекниинди ВГТРК-йин ГТРК «Дагъустан» филиали кIули гъубхнийи.

Фестивалин метлеб журналистарин пишекарвалин дережа за апIуб, телевидениейин ва радиойин милли чIалариинди вуйи проектар арайиз хуз кюмек тувуб, жюрбежюр регионарин журналистар сатIи апIуб ва гьацира Урусатдин халкьарин культурайин тафавутлувал уьбхюз кюмек тувуб ву.
Фестиваль ачмиш апIруган, Дагъустандин цифрайин артмиш’валин, мялуматарин ва чап апIбарин министрин вазифйир вахтназди тамам апIурайи Юрий Гьямзатовди фестивалин иштиракчйириз Федор Щукиндин тебрикнан гафар гъурхнийи.
«Гъи Урусатдиъ журналист, гьюкмин улихьси, ватандашарин улихьра гизаф жавабдар пишекар ву. Гъит «Евразияйин сес» сюгьбатар гъахру, гьякьлу ва жавабдар журналистикайин сес аьхюди ва умудлуди ебхьру адлу майдан вуди гъубзри», – дупнайи тебрикнан кагъзиъ.

 
ВГТРК-йин генеральный директорин заместитель ва ВГТРК-йин регионарин департаментдин кIулиъ айи Рифат Сабитовди фестиваль гъабхурайи региондикан гьамци гъапну: «Дагъустан дагълу уьлке ва чIаларин дагъ ву. Мушваъ 30-илан зиина миллетар аьсрариинди албагну яшамиш шула. Фестивали, уьлкейин жюрбежюр регионарин радиойихъ хъпехъурайидар ва телевизорариз лигурайидар уьлкейин халкьарин культурайихъди ва тарихдихъди таниш апIури, дурарин Ватандихьна вуйи ккунивал мюгькам апIура, регионарин арайиъ аьлакьйир уьрхбан мянфяаьтлувал улупура».
Фестивалин йигъари Дербент шагьриъ айи Азербайжан драмайин театриъ Урусатдин халкьарин сабвалин йисаз бахш вуйи конференция кIули гъубшну.

 
Форумдин иштиракчйир жюрбежюр мастер-классариъ, хялар кьабул апIру «Джами» комплексдиъ ккатIабццнайи Дагъустандин художественный сяняаьткарваларин ярмаркайиъ иштирак гъахьну.
Жюрийи, уьлкейин вари регионариан хъадаънайи 200-тIан зиина фильмйириз, репортажариз ва передачйириз дилигну, гьарубдиз лайикьлу кьимат дивну. Фильмйирин арайиъ асас фикир Урусатдин халкьарин сабвалин йисаз бахш дапIнайи, гьацира хусуси метлеб айи «Ихьдарихъан» («За наших») кIуру проектари чпиина жалб гъапIнийи. Гьарсаб номинацияйиъ шубуб ужударсдар передачйир гъядягънийи.

 
Милли редакцйирин варжариинди журналистариз фестиваль сюгьбатар гъахру, тажрубайикан ктибтуз мумкинвал туву майдан гъабхьнийи.
Фестивалин ккудубкIру пай 29-пи августди Мягьячгъалайиъ Урус драмайин театриъ кIули гъубшнийи. Душваъ номинацйириъ гъалиб гъахьидариз пешкешар тувнийи.