Наргиз  Гюлечова

 Дагъустандин Главайин вазифйир вахтназди тамам апIурайи Федор Щукин, мартдин аьхирариъ ва апрелин эвелариъ аьхю мархьар-селлер дургъну, табиаьтдин заваликк ккахьу Мамедгъалайиъ ва Хасавюрт райондин гьулариъ гьягъюрайи ляхнарихъди таниш хьпан бадали, гьадму гъулариз гъушну.

Хасавюрт райондин гъуларикан варитIан гизафси шид улубчIвуб Аьдил'отар гъул ву. Душваъ 150 яшамиш шлу хулар гьадахьну ва варжтIар артухь хулариз зарар гъабхьну. Гьацира гъулаъ 300-тIан артухь баяр-шубар урхурайи мектебра абхъну. Гьамусяаьт улихь дивнайи месэлйирикан варитIан асасуб мушваъ цIийи мектеб тикмиш апIуб ву. Багарихьди дициб мектеб ачмиш апIиди. Федор Щукин мектеб диврайи объектдиина гъушну тикилиш’валарин ляхнар сентябрин вазлиз ккудукIуз планариъ а. .
Райондин ЦIилитль гъулан аьгьвалатра гьамциб ву – гъургъу мархьари мектеб ипну. Мушваъра цIийи модульный мектеб тикмиш апIура. Лазим вуйи алатар, тикмишназ лазим шлуб вари дубхну, гьязурди а. Гъулаъ, жаргърудариз вуйи рякъра, волейбол апIру майданра хьибди. Мектебдин тикилишчивалин ляхнар фици гъягъюраш, Федор Щукинди чав ляхин апIурайи кабинетдиан гюзчивал гъабхура.

 
Аьдил’отар ва ЦIилитль гъулариъ тикмиш апIурайи мектебар гьяракатниинди уч апIру конструкцйирикан апIурайидар ву. Гьамусяаьт му объектариин монтаждин ляхнар гъахура. Аьдил’отар гъулаъ мектебдин дараматдихъди сабси фубтолин майдандиз ва спортзализ жара дапIнайи площадкара гьязур дапIна. Хъа ЦIилитл гъулаъ, кIуруш, мектебдин гъвалахъ волейбол апIру майданра ва жаргърудариз вуйи рякъра хьибди.
Му райондин агьвалат дигиш апIбан бадали, улихь дивнайи варитIан асас вазифйирикан саб зарар гъабхьи агьалйириз кюмек апIуб ву.

 
Гьюкуматдин терефнаан кюмек ккун апIури, 16 агъзуртIан артухъ агьалйирихьан аьрзйир гъафну. Гьадрарикан гъийин йигъаз 64 аьрза тартиб апIури ими.
Хасавюрт райондиз гъягъбан кьяляхъ республикайин главайин вазифйир тамам апIуайи Федор Щукин Дербент райондин Мамедгъалайизра гъушну. Мушваъ табиаьтдин завали хулар ахьу касариз яшамиш шлу цIийи микрорайон тикмиш апIура. Гьелелиг мушван цIийи кючйириан гьябгъюрайиб тикилишчивалин ляхнариъ ишлетмиш апIурайи техникатIан дар. Хулар дивбан ляхнар сарун аьхирихъна гъюра.

 
Федор Щукин тикмиш апIурайи цIийи хулариз гъилигну. Типовой жюрейиинди диврайи хуларикан гьарсабдиъ шубуб дахъру хал, хялар кьабул апIру аьхю хал, манишин тувру гъурулуш а. Аьхю хизан яшамиш хьуз варибдихьди тямин апIура. Хуларин улихь гьяятра эйсийиз чаз фици ишлетмиш апIуз ккуниганси гьязур апIура.
Гьавайин манишназ ва улупнайи бицIи вахтназ дилигди, тикилишчйирин дестйири ляхнар гьяракатниинди ва ужуб ерийиинди гъахура. Мидин гьякьнаан Щукиндира разивалиинди гъапну.

 
Федор Щукиндин регьберваликкди вуйи совещаниейиъ Дербент райондин глава Эльман Аллагьвердиевди гъийин йигъаз мушваъ тамам дапIну ккудукIнайи ляхнарикан мялуматар тувнийи. Дугъан гафариинди, объектариин 350 кас лихура. Гьамусяаьтна 10-дар хуларин чIатан цалар катIна ва 25-дар хуларин цIаларин декоративный штукатурка дапIна. Мидланра гъайри, 12-дар хуларин айтIан штукатуркара дапIну ккудубкIна, гьаму йигъари раккнарра гъивуз хъюгъди. АйтIан ляхнар тамам апIури, кьюб десте лихура.
«Мина шид ва акв зигбан ляхнарра аьхирихъна дуфна.

 
Гьамусяаьт улихь хьайи асас месэла газар зигуб ву. Мина газар зигбан бадали, жилар эйсйирин ликрихь хъитIуб чарасуз шартI ву», – гъапну райондин главайи.
Дупну ккундуки, мушваъ диврайи микрорайондихъди сабси Мамедгъала поселокдиъра миржидар хулар тикмиш апIура. Думу хулар мяълийирин устад Жасминдин дакьатарихъ апIурайидар ву. Вари ляхнар кьюбрид объектариъра сабси гьягьюра.
Хулар тикмиш апIурайи подрядчикдин планариинди, мушван вари тикилишчивалин ляхнар 15 августдиз ккудукIиди. Хъа эйсйирихьна хулар 1-пи сентябри шадлугъниинди тувди.