Гюльнара Мягьямедова

 
7-пи сентябри Дагъустандин главайин вазифйир вахтназ вуди тамам апIурайи Федор Щукин Урусатдин Президент Владимир Путиндихъди гюрюшмиш гъахьну.

Федор Щукинди гьюкуматдин кIулиъ айириз республикайиъ айи аьгьвалатнакан ктибтну. Асас вуди мартдин аьхириъ ва апрелин эвелариъ республикайиъ гъургъу аьхю мархьари зарар туву инсанариз, гьацира хусуси метлеб айи дявдин операцияйин иштиракчйиризна дурарин хизанариз кюмек тувбан месэлйириин дийигъну.

 
Республикайин кIулиъ айири шту ккау йишвариъ рас апIбан ляхнар гъахбакан, зарар гъабхьи агьалйириз пулин кюмек тувбакан, агьалйирин дуланажагъ къайдайиз хпан ляхнариина техника жалб апIбакан ктибтнийи.
Щукиндина Путинди хусуси метлеб айи дявдин операцияйин иштиракчйириз ва дурарин кюлфетариз пулин кюмек тувбан, дявдин операцияйиан кьяляхъ гъафидар ислягь уьмрихьна гьязур апIбан, дурар ляхнихъди тямин апIбан месэлйирра гьял гъапIнийи. Федор Щукинди Дагъустандиъ хусуси метлеб айи дявдин операцияйин Ветеранарин хал тешкил апIбан гьякьнаан къарар адабгънайиваликан ктибтнийи. Диди дявдин гъуллугъчйириз ва дурарин багахьлуйириз кюмек тувру тешкилатар сатIи апIиди. Владимир Путинди учв думу къарарниин рази вуйиваликан ва чав Урусатдин Правительствойиз кюмек тувуб табшурмиш апIруваликан гъапнийи.

 
Владимир Путинди къайд гъапIганси, хусуси метлеб айи дявдин операцияйиъ дагъустанлуйири – аьдати эскрарира, командирарира – игитариси женг гъабхура. Республикайиъ гьамус 20 Урусатдин Игит а. Дугъу гьацира, СВО-йин иштиракчйириз, ветеранариз туврайи кюмек давам дапIну ккунду, гъапнийи.
Федор Щукинди, гьюкуматдин кIулиъ айирихъди гаф-чIал айи вахтна, федеральный идарйирин кюмек дарди гьял апIуз читинди алабхъурайи республикайин учIру месэлйирра гъитIирккну: коммунальный ва транспортдин инфраструктура, милли проектар уьмриз кечирмиш апIуб, экономикайин важиблу цирклариз инвестицйир жалб апIуб ва гь.ж.
Сюгьбатнаъ Владимир Путинди Расул Гьямзатовдин бабкан гъахьи йигъ, 8-пи сентябрь, Урусатдин халкьарин чIаларин йигъ вуди тяйин апIбаканра гъапнийи.

 
«Думу аьхю машквар ву. Аьхю шадвалиинди вари дагъустанлуйирихьан ич машгьур ватанагьли Расул Гьямзатовдихьна вуйи гюрматназ чухсагъул кIураза. Гьаму йисандин арайиъ вари Урусатдиъ культурайин, спортдин, чIаларин 75-тIан артухъ серенжемар гъахбанди вуча. Гьаму йис Урусатдин халкьарин сабвалин йисра ву, думу гизаф кьиматлу вучуз, сабвал уьбхюз чалишмиш шулача», – гъапну республикайин кIулиъ айири.
«Президент Дагъустандихьна гизаф ужуди янашмиш шулу. Дугъан кюмек гьар вахтна рябкъюрахьуз – табиаьтдин завалариан удучIвуз кюмекналан гъадабгъну, агьалйирин дуланажагъдин ери за апIру яркьу проектар уьмриз кечирмиш апIбахьнакьан. Ихь республикайиз гьаммишан гьамциб кюмек туврайивализ дилигну, Владимир Владимировичдиз чухсагъул кIураза», – гъапну Федор Щукинди.
***

Москвайиз душнайи вахтна республикайин кIулиъ айирин вазифйир тамам апIурайи Федор Щукин ихь машгьур ватанагьли, Урусатдин Игит, генерал-лейтенант Эседулла Абачевдиин улуркьуз госпитализ гъушну. Дугъу Эседулла Аьбдулмуъминовичдиз вари дагъустанлуйирихьан мани саламар гъапну ва дугъаз ухди сагъ хьуб ккун гъапIну. Генерал, госпиталиъ чан зийнар сагъ дапIну, Ватан бадали чан гъуллугъназ кьягъял гъюз гьязур шула.