Мейлан Нежефов

Авгъустдин 8-9-пи йигъари, Хив райондин 90 йисандин юбилейин гъаншариъ, бажаранлу ариш-веришчи, Волгоград областдин Устюжна шагьриъ яшанмиш шулайи Хирижв гъулан агьали Марат Загьировдин пешкешариз вуйи футболин турнир кIули гъубшну.

 

Талитариъ райондин гъулариан уч духьнайи 14 командайи иштираквал гъубхну. Гъизгъинди ва маракьлуди кьюд йигъандин арайиъ кIули гъушу талитарин натижайиъ Хив гъулан «Дарган» командайи 1-пи йишв, Асккан Яракк гъулан команадйи 2-пи йишв ва Чювекк гъулан командайи 3-пи йишв гъибисну.
Гъалибчи командйир ва футбол ужуди уйнамиш гъапIу кIул’инди касар пулин пешкешариинди, тялукь дережйирин медалариинди ва кубокдиинди лишанлу гъапIну.

Талитарин гьякьнаан чан фикрар ачухъ апIуб ккун апIури, узу меценат Марат Загьировдихьна илтIикIунза.

«Жвув багъри юрдхьан ярхла айиган, гьарган багъри йишвар кIваъ ади, ватандин гележегдикан ва дидин кьисматнакан фикир кади шулу. Думу гьиссар гьамус йиз кIваъра уягъ гъахьну. Улихьна йигъари, сагъламвалиин машгъул вуйидарин йигъ къайд апIури, гьамциб турнир кIули гъабхуз фикир гъабхьнийиз. Саб улхуб-рахубра адарди турнир гьамциб тешкиллувалиинди ва баркаллагьниинди кIули адабгъуз кюмек туву иштиракчийирин ва йиз чвйирин юкIв шад ибшри. Убхърубдихьан, зигрубдихьан ярхла духьну, ихь жигьилар гьарган чвевалиинди гьамциб сагъламвалин гъаразнаъ ишри!» – гъапнийи М. Загьировди.