Мейлан Нежефов
Журналист Буньямин Багъдаев аьхюр-бицIир гюзет апIру, рякъ-хулиъ алахъу касдиз кюмекназ бакар шлу, жарар ва жвуванур дарпиди, дурарин арайиъ дюзвал ккуни, дурарихъди хайир-шейир пай апIру кас вуйи, кIура думу таниш вуйидари.
Улихьна йигъари багъри Мажвгул гъулан культурайин хулаъ Буньямин Багъдаевдин бабкан духьну 75 йис тамам хьпаз бахш дапIнайи серенжем кlули гъубшну.
Гъулан администрацияйи тешкил дапIнайи серенжемдиъ Дагъустандин писателарин союздин табасаран секцияйин кIулиъ айи шаир Гьюсейн Аьбдурягьманов, «Табасаран нурар» газатдин гъуллугъчи Эльмира Багъдаева, зегьметнан ветеран, Дагъустандин лайикьлу мялим Тажудин Мурадханов, Дагъустандин лайикьлу мал-духтир Гьясратяли Керимов, шаир Дельфуруз Ханялиева, композитор Нарудин Амурлаев, гъулан тешкилатарин кIулиъ айидар, райсобраниейин депутатар, мектебдиъ урхурайи баяр-шубар ва юбилярин багахьлуйир иштирак гъахьнийи.
Иштирак хьуз гъирагъдилан дуфнайи хялариз чухсагъул кIури ва серенжем абццри, сифте гаф гъулан кIулиъ айи Мейлан Нежефовди гъапнийи.
«Дагъустанлуйири кIура: Расул Гьямзатовди жараб сарун фукIара гъибикIундашра, саб «Кьарнийир» шиир чIяаьн ву, анжагъ саб гьаддиинди дугъаз халкьдин ва вари уьлкейин шаир ву пуз шулу. Узура, ихь Буньямин Зиявудиновичдикан улхури, дугъан жара зегьметар кIваин дарапIишра, саб «Уьмрин бина Мажвгул» китаб чIяаьн ву кIураза, дустар. Думу китаб ухьуз ва аргъаж шулайи наслариз ккудубшу ва гьамусяаьтдин уьмрикан ктибтурайи ва чалантина гъибтнайи савкьат ву. Дидиъ гъулан тарихдикан, гъулаъ саб вахтна кюкдихъ хъади гъабхьи колхоздикан, Ватандин Аьхю дявдин йисари гъуландари гъалибвалик кивнайи лайикьлу пайнакан, дявдин кьяляхъна йисари гъулаъ мясляаьтниинди шад девран уьмур хъапIрайи агьалйирикан, гъулан машгьур касарикан, гъулан халачйир гьясил апIру фабрикайикан ва жара мянфяаьтлу мялуматар тувна. Гьаддиз дугъаз бахш дапIнайи мициб серенжем тешкил дарапIди гъибтуз гъабхьундарзухьан. Баракаллагь учвуз, серенжемдиз шерик гъахьидариз варидариз! Буньямин Багъдаев ихь фикриъ ва арайиъ гьаргандиз чалантина гъибту ужувлан шилну кIваинди гъитди», – гъапнийи Мейлан Нежефовди.
Юбилярин уьмрикан ва бикIбан хатIнакан Дельфуруз Ханялиевайи ва Гьюсейн Аьбдурягьмановди уч духьнайидариз маракьлу докладар ва чпи рягьматлуйиз бахш дапIну дидикIнайи шиърарра гъурхнийи.
Дурарин улхбариз кьувват вуди, Тажудин Мурадхановди ва Гьясратяли Керимовди аргъаж шулайи наслариз рягьматлуйин уьмрикан ктибтуб давам гъапIнийи.
«Буньямин 1950-пи йисан 3-пи январиъ Хив райондин Мажвгул гъулаъ бабкан гъахьну. 1964-пи йисан Мажвгул 8 йисандин, хъа 1966-пи йисан ГъванцIил гъулан кьялан мектебар ккудукIну, дугъу 1973-пи йисан Мягьячгъалайиъ Дагъгосуниверситетдин математикайин факультет, 1976-пи йисан Москвайиъ ВЛКСМ-дин ЦК-йин ВКШ-йин журналиствалин отделение ккудукIну. Мажвгларин кьялан мектебдиъ аьхюну пионервожатыйди ва мялимди, ВЛКСМ-дин Хив райкомдин сифте кьюрпи, хъа сарпи секретарди гъилихну. Дагъустандин комсомолин обкомдин аппаратдиъ, профсоюзарин органариъ ва гьацира республикайин радиовещаниейин редакторди, хъасин республикайин «Табасарандин нурар» газатдин редакторин заместителди, Мягьячгъала шагьрин муниципальный гъурулушдин газатарин редакторди гъилихну. Саб вахтна халачйир гьясил апIру «Хив» объединениейин генеральный, хъасин коммерческий директорди, халкьдин мяишатдин жара гъуллугъариъ гъахьну. Гьяйифки, дилавар ва ширин мелз айи жямяаьтлугъ кас, фициб ляхнихь учв гъахьишра, ягъалмиш дарди, я фурс ктарди, анжагъ жавабдарвалиинди ихь халкь бадали чахьан шлу зегьмет зигурайи Буньямин 2019-пи йисан 13-пи сентябри вахтсузди ихь арайиан гъушну. Гъит женнетдин нивкI’ан уягъ даришричав», – кIура юбилярин дустари.
Буньямин Багъдаев учв гьарган хялижв ккуни, чавра хялижвди гъягъюз ккуни кас вуйи, шадвал, мяъли, ялхъван дугъан улдукьу дустар вуйи. Гьаддиз Дагъустандин лайикьлу артист Физули Маллаевди ва мяълийирин устад Фаина Абдуллаевайи чпин мяълийириинди му серенжем хъана уткан гъапIнийи.
«Халис вари табасаран хизанариъси, учузра гъардаш далу вуйчуз. Адашдиси ва дадайиси, учуз, миди вуйи чвйир-чйириз, илим тувуз, учкан гележегдиз адмйир ктауз, бахтлу рякъюъ тIауз, хизандин эйсир ктауз аьхюну гъардши ва дугъан уьмрин юлдаш Зебиржат Зенгиевнайи гизаф чарйир гъизигну. Гьаци гьялал зегьметниин юкIв алидар вуйи кьюридра. Гьич гъачIи накьвариъкьан чIур даришри чпи», – ктибтнийи юбилярикан дугъан чвуччву Алекбру.
Серенжемдин аьхириъ юбилярин бай Шамили, риш Зульфияйи ва швушв Эльмирайи вари иштиракчйириз чпин аьхю хизандин терефнаан чухсагъул мялум гъапIнийи.
Буньямин Багъдаев Ватан гизаф ккуни ватанпервер кас вуйи. Думу кIул’инди 3 китабдин автор ву, 7-8 китабдиз дугъу сифтейин гафар гъидикIну. Мидланра савайи, Хив райондин 80 йисаз бахш дапIнайи китабдин авторарикан сар ву. Багъир Ражабовдин «Намуснан сир» роман табасаран чIалнаан урус чIалназ таржума апIбакра аьхю пай кивну. Чан зегьметназ ва устадвалин ляхнариз лигну, думу комсомолин ЦК-йин, эскервалин частнан, Мягьячгъалайин администрацияйин ва ветеранарин советдин, Дагъустандин журналистарин союздин терефнаан гьюрматнан грамотйириинди лишанлу дапIна.
Зегьметнан ветеран, РФ-дин журналистарин союздин член Буньямин Багъдаевди гизаф вахтна «Табасарандин нурар» газатдиъ ва «Дагъустандин бизнес» журналиъ чан юкIв али пише – журналиствалин ляхин апIури гъахьну. 2013-пи йисан апрелихъанмина 2016-пи йисазкьан газатар, журналар адагъру «Дагъустандин бизнес» центрин генеральный директорди гъилихну. Дугъан варжариинди макьалйир республикайин газатариъ ва журналариъ чап дапIна.
Дупну ккундуки, дугъан кIваъ ихь халкь, Дагъустан бадали вуйи зегьметнан планар гизаф имийи. Гьадму гьисабнаан, Мажвгларин ва Зилдккарин гъуларикан чапдиан адагъуз гьязур дапIнайи китабарра. Мицир бажаранвал кайи кас арайиан гъягъюб, багъридаризси, багахьлуйиризси ва табасаран халкьдизси, вари дагъустанлуйиризра учIврушин ву. Гъит дугълантина вуйидариз ярхи ва шаду уьмур туври.
