Наргиз Гюлечова
Дагъустандин Глава Сергей Меликовдин жягьтлувалиинди 2022-пи йисхъанмина республикайиъ «Гъалибвалин пайдагъ» акция кIули гъябгъюра. Гьар йисан му акцияйик цIийи регионар ктикьура. Сач акцияйиъ Кафари Кавказдин республикйирра, Ставрополь крайра иштирак гъахьнийи, хъа цци дидик 200 йишвандинна йигъандин арайиъ гъагъи женгар гъахьи Волгоград шагьурра кбикьну – 8-пи майди Гъалибвалин пайдагъ Мамайдин кургандиин али «Баб-Ватанди дих апIура» ядигарин улихь гьатIабцциди. Ва гьамусдихъантина, Урусатдин имбуну регионариъра гьамциб акция гъабхьан бадали, му пайдагъ уьбхюри гъибтди.
5-пи майдиъ акцияйин дахилнаъди Каспийскдиан Волгограддизкьан «Гъалибвалин пайдагъ» гъабхьбан серенжем шагьрин Кьялан майдандиин кIули гъубшну. Му мярака саки Гъалибвалин Йигъандин параддиз ухшар вуйиб гъабхьнийи, ва дидиз лигуз хайлин гьюрматлу хяларра дуфнайи. Гьадрарин арайиъ Дагъустандин Глава Сергей Меликов, Ватандин Аьхю дявдин ветеран Муса Багьаутдинов хусуси метлеб айи дявдин операцияйин иштиракчйирна дурарин хизанар ва хайлин жара касарра айи.
«Гъалибвалин пайдагъ» республикайин 45 муниципалитетариъра гьатIабццну, акцияйиъ 100 агъзуртIан артухъ дагъустанлуйир иштирак гъахьну.
Каспийск шагьрин Кьялан майдандиина аьдати жюрейин Урусатдин пайдагъ ва Гъалибвалин пайдагъ хьади, Каспийский флотилияйин офицер удучIвнийи. Хъа лап аьхю кьадарнан Гъалибвалин пайдагъ волонтерари гьатIабццнийи. Гъалибвалин пайдагъ за апIуз Урусатдин Игит Тамерлан АбутIалимовдиз, «Афгъандин гьядисйирин ветеранарин, инвалидарин ва эскрар гъийиху хизанарин тешкилатдин координационный совет» кIуру ДРОО-йин председатель Мягьямед Ариповдиз ва Мягьячгълайин 39-пи нумрайин лицейин 9-пи классдиъ урхурайи Аьбдулгьяким Исмяиловдиз ихтияр тувнийи. Дупну ккундуки, Аьбдулгьяким Исмяилов Ватандин Аьхю дявдин ветеран Аьбдулгьяким Исмяиловдин гудул ву.
Серенжемдин аьхириъ Гъалибвалин пайдагъ РД-йин Халкьдин Собраниейин хусуси метлеб айи дявдин операцияйин ветеранарин ва иштиракчйирин ляхнариз лигру Комитетдин председатель Аьбдуллагь Мягьямадовди кьабул гъапIну. Каспийскдиан Волгограддиз пайдагъ хьади гъягъюрайи автопробегдиъ иштирак шулайидарихъди сатIиди, думу рякъюъ учIвну. Гъалибвалин Пайдагъ гъабхурайи машинарин жерге СКФО-йин ва ЮФО-йин регионариантина гъябгъиди ва 8-пи майди Волгограддиз хъубкьди.
