Мейлан Нежефов
Якьинди кIурза, аьгъязуз,
Аьсрариъ дарчIиди гъузру
Дявдиз гъушу Ватан уьбхюз
Игитар, чпин жанар туву.
Б. Митаров
Дугъриданра, Ватандин гъуллугънаъ вафалувалиинди жанар туву игитар аьсрариинди ихь кIваълан гъягъидар. Гьацира яснаъ ва Ватандихъди юкIв убгури жюрбежюр фикрарикк ккайи Хив райондин агьалйириз гъубшу гьяфта хъана мучIуб гъабхьну. Украинайиъ гъябгъюрайи хусуси метлеб айи дявдин операцияйиъ жюрэтлувал улупури талаф гъахьи Гъвандикк гъулан агьали, лейтенант Рамазан (Низами) Къазимягьямедов, Хиварин гъул’ан вуйи рядовой Адам Назарялиев ва Ккугъан вуйи рядовой Степан Аьлимурадов багъри райондин ругариина духну фаракьат гъапIну.
Я бахт, я вахт бегьем дархьиди уьмриан гъушу игитарин дердну дачIаркIнайи багъридарихъди райондин миди вуйи агьалйирра яснаъ ахьну. Райондин администрацияйин ва агьалйирин терефнаан сабсан ражну башсагълугъвал ва кIван сабур ккун апIури, дерднаъ айи хизанарихьна райондин глава Ярмет Ярметов илтIикIну.
«Украинайиъ кIули гъягъюрайи женгариъ, кIваълан дурушру гьунарар улупури, ватанпервервалин рюгь кайи Абйирин бинайиинди гъи Хив райондиан вуйи шубуд агъзурилан зиина кьягьялар иштирак шула. Дявди баяр хурдар, дявди баяр йихуру – халкьдин айтуйин гьякьлувал гъи кIулиъ гъягъюрайи гьядисйири, гьяйифки, ухьуз сабсан ражари субут апIура. Ав, райондиан талаф гъахьидарин гъамлувалин сиягьнак хъана шубурсан кас артухъ гъахьну.
Гьюрматлу игитарин абйир-бабар ва багахьлуйир! Аьгъязуз, я саринра мани гафар-чIаларихьан, я вахтнахьан ичв кIваз дявди гъахи зийнар сагъ апIуз даршул. ГьапIхьахъа? Гьациб гъуллугъ а – Ватан уьбхюб. Ичв баяри, вафалувалиинди гьадму гъуллугъ гъабхури, чпин жанар фида гъапIну. Аферин учвуз, гьацдар кьягьял баяр ихь уьлкейиз бахш гъапIдариз. Му мучIу йигъарин учIврушин учвухъди сабси гьисс ва пай апIурача. Уьлкейин ва закурин насларин гележег бадали уьмриан гъушу игитар вари халкьдиз ва насларихьан наслариз, дурарин уьмрикан кьягьялвалин дарсар туври, нумунади гъузди», – гъапнийи чан улхбаъ райондин главайи.
Чпин хушниинди дявдиз гъушу игитарин уьмриканра кьюб келима дибрикIди гъузуз шулдар.
Рамазан (Низами) Къазимягьямедов 1984-пи йисан 22-пи апрели Гъвандикк гъулаъ бабкан гъахьну. Багъри гъулан мектеб ккудубкIну, дугъу эскервалин буржи Мурманск шагьриъ 2173-пи дявдин частнаъ баркаллагьниинди кIулиз адабгъуру. 2004-пи йисан Рамазан Къазимягьямедовди, Урусатдин яракьлу кьувватарихъди контракт йибтIну, Чечен Республикайиъ гъуллугъ апIури гъахьнийи. 2011-пи йисан заочно вуди Белгороддин гьюкуматдин университетдин юридический факультетдик урхуз кучIвнийи. 2013-пи йисхъанмина райондин ОВД-йиъ жюрбежюр гъуллугъарихь лихури гъахьну.
Уьмрин юлдаш Расмияйихъди кьюр велед тербияламиш апIурайи бахтлу хизандик, кьюркьлин цIаси, дявдин хабар кубкIнийи. 2022-пи йисан 10-пи ноябриъ чан хушниинди Луганск Халкьдин Республикайиъ 44444-пи дявдин частнаъ Халкьдин милицияйин жергйириъ гъуллугъ апIуз аьрза гъибикIнийи. 2023-пи йисан лейтенантдин ччвурназ лайикь гъахьи Рамазан Къазимягьямедовди Урусатдин Миноборонайихъди цIийикIултIан контракт гъийибтIнийи. Дявдин женгариъ чахъди хъайи эскрари дугъаз «Гъарз» кIуру ччвур (лакIам) тувнийи. Гьяйифки, дирбаш адашдиз умудлуди ккилигурайи хизандиз яснан палат кьисмат гъабхьну.
Адам Назарялиев 1994-пи йисан 17-пи октябриъ Хиварин гъулаъ бабкан гъахьну. Ккергъбан классариъ дугъу Хиварин мектебдиъ гъурхнийи, хъасин, хизан Дагъ.Огни шагьриз кючмиш гъабхьиган, гьадушваъ урхуб 7-пи нумрайин мектебдиъ давам гъапIнийи. Адам набалугъди имиди, дугъан адаш Зафир кечмиш гъахьнийи. Гьаци думу чан чи Сунайихъди Имирхан абайи ва Мислимат бабу аргъаж гъапIнийи. Ибадат дадара веледарин гъуллугънаъ гъахьнийи.
Мектебдин кьяляхъ Москва шагьриъ Хусуси ачмиш вуйи институтдиъ – Пишекарвалин заан мектебдиъ гъурхнийи. 2018-19-пи йисари Волгоград областдин Камышин шагьриъ эскервалин буржи тамам апIури гъахьнийи. Армияйи кьяляхъ, Ватандиз гъуллугъ апIуб чан ифдиъ айиб субут апIури, Адам Назарялиевди гьадушваъ контрактдиин къул дизигну, эскервалин буржи давам гъапIнийи. Гьадлин, чан аьшкьниинди, 2023-пи йисан 23-пи феврали миллетчйирин аьхир-диван апIуз кьаст ади, хусуси метлеб айи дявдин операцияйиъ иштирак хьуз гъягъюру. Хаин душмнар ккуршври айи Адамдиз гъалибвал хьади дявдиан кьяляхъ гъюб ва жвуван хизан ккебгъуб дибикIнадайиштIан.
Cтепан Аьлимурадов 1972-пи йисан 11-пи июнди Ккугъарин гъулаъ Шагьмурад ва Зумрият Аьлимурадоварин аьхю хизадиъ бабкан гъахьну. Дурарин хизандиъ ургур байна сар риш а. Степан хизандиъ варитIан бицIинур ву. Гъулан мектеб ккудубкIбалан кьяляхъ 1990-1992-пи йисари эскервалин буржи тамам гъапIу жигьили хайлин йисари Казахстандиъ тикилишчивалин ляхнар апIури гъахьнийи. 2024-пи йисан дугъу чан хушниинди Урусатдин Миноборонайихъди контракт гъийибтIнийи ва Урусатдин Яракьлу кьувватари Украинайиъ гъабхурайи хусуси метлеб айи дявдин операцияйиъ иштирак гъахьнийи. Душмнихъди вуйи женгариъ гъагъи зиян гъабхьи Степан уьмриан гъушну.
Шиклиъ: гагвлахъан арчлахъинди – Р. Къазимягьямадов, А. Назарялиев, С. Аьлимурадов.
