Умгьанат Сулейманова
Улихьна вахтариси дарди, гъийин девриъ Урусатдин Яракьлу Кьувватариъ йикьрариинди ватандаш’валин буржи ва эскервалин гъуллугъ тамам апIури гъузнайидар гизаф а. Дагъ. Огни шагьриан вуйи Аьли ва Вели гъардшарра гьадрарикан ву. Мурар кьюридра Украинайиъ гъябгъюрайи хусуси метлеб айи операцияйиъ иштирак шула. Вели гьамусяаьт гъизгъин женгарин варитIан кIакIнаъ айи жергйириъ а.
Улихьнаси Вели Ибрагьимовдиз Дагъустандин Республикайин глава Серегей Меликовди «Дагъустандин халкьдин Игит» ччвур тувну.
Вели Ибрагьимов Дагъ. Огни шагьриъ 2000 — пи йисан аьдати хизандиъ бабкан гъахьну. Мугъан адаш Исабала – тикилишчи, хъа дада халачачи ву. Дурариз шубур велед а: кьюр бай ва сар риш. Мектеб ккудубкIбалан кьяляхъ Велди чан зегьметнан рякъ Яракьлу Кьувватарин жергйириъ йикьрариинди давам апIуз кьаст гъапIну. 2021-пи йисан, думу чан аьхюну гъардаш Аьлди гъуллугъ апIурайи Новочеркасскдиъ ерлемиш дубхьнайи Урусатдин Яракьлу Кьувватарин, танкарин дивизияйин частнаъ гъуллугъ апIуз учIвру. Велдин дада Гюльпери ич гюрюшмишдиъ чан балин хъуркьуваларикан, дугъан инсанваликан, юкIв лап шаддира, пашмандира вуйиз кIури, гьамци гъапнийи:
– Кьюрид баярра дявдиъ айи бабан юкIв фици хьибди. Аьхюну бай Аьли Новочеркасскдиъ контракт йибтIну гъуллугъ апIурайиз. Ва Велира гьадушваз душну, дурари кьюридарира саб частнаъ гъуллугъ апIури гъахьну. Дяви ккебгъу йигъланмина Аьлира, Велира Украинайиъ айидар ву. Гьар ражари, таниш дару номериан зенг апIру вахтна, фу хабар вуйкIа кIури, гучIвал кади за апIури шулза телефон. Йиз юкIв гьацира иццури айиб вуйиз, хъа гьамус кIваъ дерд-хажалат айи вахтна, хъана артухъ аьзиятвал казуз. Хъа Велди, узу гьар ражну зенг гъапIу вахтна, шубуб ражари аьжаликкан ккудучвIунза, дада, кIури, узу сикин апIури шулу. Думу машинариин гизаф аьшклур вуйиз. Хъа Украинайиъ айири, чаз хъапIуз кIури, саб кьялан машин гъадабгъну. Кьюбриб машинара гъутIуркIну. Чав чан дустрахъди наана-вуш чпин ляхин ади гъушдар гъафиган, фу лигурва, саб бицIи манзил вахт гъабхьундар баяр машиндиан удучIвну, гьадму сяаьтна гъутIубкIну. Кьюбпи ражарира гьамциб дюшюш гъабхьну, ва чав танкнлиъ айи вахтнара.
Узу му ихь баярихъди телефондианкьа гаф-чIал апIуз ният гъапIунза. Амма Аьлдихъди аьлакьайиз удучIвуз гъабхьундарзухьан, гьаз гъапиш дугъан телефондин аьлакьа адайи. Вели варитIан читин йишваъ ашра, мумкинвал дабгну, думу узухъди аьлакьайиз удучIвнийи.
Узуз саб 20 дакьикьайин вахт тувназуз, кIури, дугъу жикъиди гьамциб мялумат туву:
– Узу сабпи йигъланмина Украинайиъ гъябгъюрайи хусуси метлеб айи операцияйиъ иштирак шулаза. ЦIийина узу танкарин кьушмарин дивизияйиъ гъахьунза. Хъа ич дивизияйиан вуйидар сар-кьюр кастIан имдруган, жара дивизияйианра гъадагъну, дявдин гъизгъинвал айишв’ан ерли агьалйир жара йишваз адаъру десте тешкил гъапIнийи. Гьелбетда, му ич десте гьаммишан кIакIнаъ ади шлуб ву. Гъабшиб ибшри дупну, душман багахь шулайи йишв’ан агьалйир жара йишваз адауз кюмек апIури шулча. Фукьан зийнар духьнайи эскрар, гъийихдар адагъунча дявдин айтIан. Мушван мусибат шлуб дар. Завариан мархь фици убгъуруш, гьадму саягъ дронар тIирхури шулу. Телевизориан «гьавайин кьушмар» кIури, кино улупури шулуки. Учвуз телевизориан рякьюри шул, хъа учуз дурар ачухъди ич улихь рякъюри ачуз. Гъи ихь эскрариз айи асас хатIа заварилан гъюрайиб ву. Жилиин гъябгъюрайи дяви вуйиш, ич дурариз апIруб шуйич. Дурарин кьушмар гизаф пай жара гьюкуматариан кирайихъ гъуллугъ апIурайи эскрар ву. Му дявдикан бикIуз хъюгъиш, йиз фикриан, йисар гъягъиди. Украинайиъ дуламиш шулайи халкьдин сар-сарихьна айи даккнивал, сар-сарихьна вуйи янашмишвал, шлин хал гъарабгъну, шлин хизан ккадабхъну – яна халкьдин гележегдиз мяишат артмиш апIбан планар вари чIур гъахьну. Мушваъ вари терефарихъанди инкарди ву. Дурарин фикрар увухьна лигбан саягъну улупура.
Кьюб ражари контузия гъабхьнийиз. Мумкинвал гъабхьиган, капельницйир апIури, хъанара дявдин женгариз гъягъюраза. Сарун учу ихь Ватанди уч’ин илипнайи вазифа, жилариъ учIвнура, тамам дапIну ккунду.
Урусатдин Яракьлу Кьувватарин жергйириъ гъуллугъ апIурайи вари жигьилариз кIул’ин гьарган марцци зав, дюньяйиъ ислягьвал ва мясляаьт, багъри инсанарихьан ужувлан ва шадвалин хабрар ерхьуб ккун апIурхьа.
