Зубайдат Шябанова

Гьаму йигъари Мягьячгъала шагьриъ республикайин гьевескрарин (добровольцы) дестйирин региондин форум кIули гъубшну. Душваъ жигьиларихъди ляхин гъабхурайи пишекрар, республикайин гьевескрарин дестйирин вакилар иштирак гъахьну.

Форумдиъ «Дагъустандин гьевескрар» АНО-йин директор Аьгьмед Аьбдурягьмановди чпи гъабхурайи ляхникан, 2025-пи йисан республикайиъ гьевескрарин тешкилатарин улихь хьайи месэлйирикан ва муниципалитетарин хъуркьуваларикан ктибтну.
Гьелбетда, Дагъустандин муниципальный образованйириъ варитIан жанлуди лихурайи гьевескрар форумдиъ дипломар тувбиинди лишанлу гъапIнийи. Дурарин арайиъ Табасаран райондин гизаф игьтияжар гьуркIру жигьиларин центрин директор Руслан Керимовра (шиклиъ гагул терефнаъ) айи.
Форумдин ляхниъ Ватандин Аьхю дявдин 80 йис хьпаз бахш вуйи региондин халкьарин арайиъ вуйи корпусдин презентацияра гъабхьну.
Агьмед Аьбдурягьмановдин гафариинди, Гъалибвалин 80 йис хьпахъди аьлакьалу серенжемариъ муниципалитетарин центрариан вуйи волонтерар иштирак шулу. Багарихьди думу серенжемар гъахьуз хъюгъди.