Мейлан Нежефов
Гъулан администрацияйин кIулиъ айири жвуван ватандихъ юкIв убгури, жямяаьтдин улихь учIруди дийигънайи месэлйириз иб йивури, дурар гьял апIуз чарйир агруган, гъулан агьалйирин дугъ’ин ихтибарвал алди ва закурин йигъак миж кади, умудлувалиинди ликар алдагъуз юкIв гъюру.
Хив райондин Хиварин гъулаз регьбервал туврайи Фахрудин Рамазанов гъи гьацдар главйирикан сар ву.
– Фахрудин Гьяжиризаевич, икибаштIан, Хиварин гъул райондин меркезси гьисаб апIурайиб ву. Гъулан яшайиш гъи фициб ву?
– Ав, дугъриданра гъул райондин маш ву. Йислан-йисаз цIийи хулар тикмиш апIури, гъул аьхю ва яркьу шула. Гъийин йигъаз гъулаъ 768 мяишат дуланмиш шула. Дурарин арайиъ цIиб хьнура гьюкуматдин ляхнарихь ва идарйириъ жюрбежюр гъуллугъарихь лихурайидар а. Бязидари алвер апIури, гъулан мяишатдин, багъ-бахчайиъ нежбервалин ляхнар апIури, мал-къара уьбхюри, мадар апIура. Саб пай агьалйир гъул’ан вахтназ вуди гъирагъдизди душну, дилихну, кьюб кепек хьади гъюра. Янаки гьарур чахьан шлуси хизан уьбхбан гъайгъушнаъ а.
– Жиниб дар. Гъулариъ гьарган штун, рякъюн, акварин ва зирзибилин суалар учIруди дийигъну шулу. Хиварин гъулаъ дурар фици гьял апIурачва?
– Гьар мягьлайиъ чюрх-чIувал уч апIру йишв улупну, дилин гьяфтайиъ кьюбанра машиндиъди думу шагьриз гъабхура, гьадушваъ дидин ккудубкIруб апIура. Саб улхуб-рахубра адарди гъулан агьалйири хизандиъ нуфусдин кIулихъ кепкер туври, ухди имиди му суал гьял апIбан къарар адабгънача. Гьамусди магьа гъябгъюрайи гьяфтайилан башламиш дапIну, вазлин аьхириз гъулаъ алакIнайи тукарин йирси шалмнар ва симар гьюдюхбан ляхнар гъягъюра. Гьаци, Б. Ражабовдин ва М. Керимовдин ччвурнахъ хъайи мягьлйириъ рякъяр трахтури алцIахури-ккацIахури, хяхял абхьри, уликкна хурача. Асккан мягьлайиъ айидар мектебдин гьяятдиантина накьварихъна дурушбан бадали, гьамус таза рякъ дапIну, ляхнар аьхирихъна хурача. Шид гьарганси гъулан аьхю булагъариина гъюра. Аьсрин тIалабариинди имид-амдар шид варидарин икрариз ва хулариз гъюра. Юкьубсан штун кIул гъулаз хуз планламиш дапIнача. 750 метр 100 мм диаметрин турба гъадабгъну Дулмакент терефназди шид зигбан гъайгъушнариъ ача.
– Украинайин жилариин гъябгъюрайи хусуси метлеб айи дявдин операцияйиъ Хиварин гъулан агьалйири фициб роль уйнамиш апIура?
– Контракт йибтIнайи жигьиларихъди сабси, мобилизацияйин дахилнаъди ва чпин хушниинди душваз душнайидар вари гьисабназ гъадагъиган, гъул’ан вуйи жигьиларин кьадар миржцIурилан заина ву. Хушниинди дявдиз гъягъюб гъапиган, аьжайибдира рябкъюру. Хъа бедендин табариъ дагълу ифи либхурайи ихь баяр сарихьанра дерккуз ва ккагъуз хьидар. Гьяйифки, гюллдихь мухур гьивнайи кьягьяларин арайиан инсафсуз аьжали юкьур кас уьчIюгъну: Заур Идрисов, Рафик Магьмудов, Керим Идрисов ва Давид Рамазанов. Игитарин ччвурар гьаргандиз ихь юкIвариъ ва фагьмиъ марцциди гъузди. Дурар юкьридра багъри гъулаъ фаракьат дапIна.
Сикин дарди райондиан хътапIурайи гуманитарный рягьимлувалин кюмек уч апIбаъ, гьяйифвал ва бизарвал адарди, гъулан агьалйир иштирак шула. Бедбахтвал кубкIнайи ва дявдиъ баяр айи абйир-бабарихьна гъягъюри, жвув’ан удукьруб ва шлуб абгури, кюмекнан хил гьачIабккури шулза.
– Ихь улхбан аьхириъ гъулан агьалйириз фу пуз ккундувуз?
– Гьарганси гъийихъантинара, гъулахъ юкIв убгури, жямяаьтлугъ ляхнариъ иштирак хьуб. Хъана текрар апIураза, райондин агьалйириси, гъирагъдилан гъафи касдира гъул райондин маш вуйиб гьисаб апIура. Гьаддиз гъулан агьалйирикан марццишнан ва тербияйин шартIар гьарган заанди дисуб тIалаб апIураза.
– Интервью тувбаз чухсагъул, Фахрудин Гьяжиризаевич. Гъулахъ ишри аьхюр, увуси юкIв убгрур. Халкь бадали улихь дивнайи хайирлу ляхнар юрутмиш апIуз увуз мюгькам сагъ’вал, кьувват ва ужудар сяътар ккун апIураза.
