Дул ужуб хьибди

Дагъустан Республикайиъ гьар йисан дагълу районарин марччар, кьюрдун вазар адаъбан бадали, галариз хъаъбан къайда а. Душваъ дурар апрель-май вазаризкьан гъузри шулу. Галариъ айи марччари ччилар апIру вахт асас вуди мартдин вазли ккебгърайиб ву. Аммаки цци кьюрдун гьавйир манидар ва марччариз туврайи ипIруб ужуб вуйивализ лигну, галариъ айи мяишатарин марччари ччилар апIру вахт цIиб ухдиси гъафну. Йисандин эвеларин гьисабариинди, гъийин йигъаз саспи мяишатариъ ччилар апIуз хъюгъхъанмина, 33 агъзур баб-марччари 13 агъзуртIан артухъ ччилар дапIна. Гъахьи ччиларикан 98% чIивиди ими.

ЦIиб кьадар балугъар ккадагъну

Дагъустандиъ айи Росрыболовствойин Кафари Кавказдин Управлениейиан тувнайи мялуматариинди, ккудубшу йисандин натижйириинди, Дагъустандиъ Каспий гьюликкан 30 агъзур тоннатIан зиина балугъар ккадагъну.
Гьюликкан ккадагъу балугъарикан 22,5 агъзур тонна килька ву. Къанундиинди ляхин апIури, гьаму кьадар балугъар гьюликкан гъадагъбаъ 20 гими иштирак гъахьну.
Эгер 2024-пи йисандин натижйир 2023-пи йисандарихъди тевиш, 2023-пи йисан гъюликкан ккадагъу балугъарин кьадар 33,6 агъзур тонна вуйи. Ццийин улупбар сурчантIан 3 агъзуртIан артухъ тоннайин камди ву.

Йикк ва никк артухъ гьясил гъапIну

Дагъустандин гъулан мяишатдин ва ипIру-убхъру сурсатарин министерствойиан тувнайи мялуматариинди, 2024-пи йисан республикайиъ гьясил гъапIу йиккунна никкун ва пеэрин муртйирин кьадар сурчантIан артухъ гъабхьну.
Сач республикайиъ 270 агъзур тоннатIан артухъ мал-къарайин ва пеъ-шюхъран йикк гьясил гъапIну. Хъа ккудубзу никкдин кьадар 952 агъзур тонна ва пеэри ахьу муртйирин кьадар 254 миллион гъабхьну.

Мидланра гъайри, малдарвалин цирклиъ ляхин апIурайи касари ккудубшу йисан чарвйирилан 14,5 тоннатIан артухъ хьа ултIубкъну.