Урусатдин правительствойи яшайишдин выплатйир, пособйир ва компенсацйир за (индексация) гъапIну. Дидин гьякьнаан министрарин кабинетдин мялуматарин гъуллугъну хабар тувра.

Урусатдин Президентдин табшуругъниинди, 1-пи февралихъанмина яшайишдин 40-рилан зиина выплатйир ва пособйир 9,5 процентдиинди за апIбанди ву. Дурарин арайиъ Ватандин Аьхю дявдин ва жара дявйирин женгарин ветеранариз, Чернобылиъ гъилихдариз, Урусатдин Игитариз, Зегьметнан Игитариз, вари шубуб дережайин инвалидариз гьар вазли гъюрайи пулин выплатйир а.

БицIидар айи хизанариз гъюрайи пулин кьадарра за дапIна. Дадавалин капиталин кьадар сарпи бицIириз 690,3 агъзур манат, кьюрпи ва думутIан артухъ вуйи бицIидариз 912,2 агъзур манат тувди. БицIир бабкан гъахьиган саб ражари тувру пособие 26,9 агъзур манатдиина за гъапIну.
Владимир Путиндин табшуругъниинди инвалид бицIидариз ва бабкан гъахьихъанмина сабпи дережайин инвалидариз хъайивал апIуз гьар вазли туврайи пулин кьадар гьар йисан за апIиди. Улихьна дидин кьадар дигиш апIурадайи.
Гьам ляхин апIури имбу, гьам рягьятвалиъ айи пенсионерариз гъюрайи страховой пенсйирра, 2024-пи йисан инфляция хьайиз айи дережайин улупбариз дилигну, за дапIна. Пенсионерариз иливнайи ва январин вазли тувну адру пул февралин вазли тувди.

«Гьаму вари мажбурнамйир тамам апIбаз лазим вуйи пулин дакьатар, федеральный бюджетдиъси, социалин фонднаъра улупна. Гьасаб региондиъ инсанариз лазим вуйи кьадарнаъди ва вахтниинди пулин дакьатар тувуб важиблу ву», – гъапну Урусатдин Правительствойин кIулиъ айи Михаил Мишустинди.