Мейлан Нежефов
Ухьуз мялум вуйиганси, республикайин саки вари шагьрариъ ва районариъ зирзибилин, штун вая рякъюн суалар лап учIруди дийигъна. Гьадму гьисабнаъ Хив райондин Мажвгларин гъулра а. Убхъру штухъ дурар тамарзуди магьа швнуд-сад йисар ву. Мидин гьякьнаан дурар илтIитIику ва ктруркIу йишвар амдайи. Амма вари идарйириъ, гаф туври дурар архаин апIури гъахьнийи.
Хъа гъи сабди шад апIура – гъулан жямяаьтдин арайиъ сабвал ади, жумартвалин ляхнар арайиз хури, читин дакьикьайиъ сар-сариз даягъ вуди бакар шулайивали. Яна, улихьганси дарди, гъи гьаму суалар гьял апIуз халкьди чав чарйир агура. Гъи гьякимари апIурайи мани гафар закур ляхниз илтIикIну кIулиз удучIвайиз йисар гъягъюрайивалиан ва хъана юкIв дарабграйивалиан, жара чара адру агьалйири чпин маважибдикан кюмек туври, ватанпервервалин хатI улупура. Гьаци, гьаму йигъари бина Мажвгул гъул’ан вуйи Мягьямедбеговарин хизанди гъуландар штухъди тямин гъапIнийи.
Ктабхъурайи йисандин 16-пи декабрь Мажвгларин гъулан тарихназ гъябгъиди. Гьадму йигъан тазади гъул’ина гъабхи шид деебтнийи. Узу му серенжем кIули гъубху Мевлудин Аьлескеровдихьна, газатдин дустариз чан фикрар ачухъ апIуб ккун апIури, илтIикIнийза.
«Шюкюр ибшри аьзиз Аллагьдиз, гъуландариз му йигъра кьисмат гъабхьну. Мая Мягьямедбеговайи ва дугъан риш Айина Балалиевайи учуз гъапIу му пешкешназ вари гъуландарин терефнаан аьхю аферин. Чпин вахтсузди уьмриан гъушу бай ва чве Замирин ччвурнахъ Раси гъярихъ 35 метр буругъ дапIну, 2,2 км манзилнаъди 50 ммйин шланг ккивну, гъул’ина гьаму уьмарат гъабхну. Суткайин арайиъ 80 тонн шид ккадабгъура. Гьадлин гъулаз гъяйиз шубуб гъазма дивна. Гьар гъазмайиъ насосар алди 15 тонн гъябгъру кью-кьюб цистернйир а. Трансформаторарра хъади 60 бетондин дестйир итна. Гьаму вари аьламат гьюкуматдианкьа удукьудайи. Гъит гьаму штун цIадларкьан ужувлар ишри чпиз. ГъапIу харжар кьюбдри гъазанмиш апIуз жандиз мюгькам сагъ’вал туври чпиз.
Гъуландаризра сифтена сифте шид гьамци уьмаратлувалиинди уьбхюз, хъасин ишлетмиш апIуз хайирлу, мясляаьтнан ва ислягьвалин мяракйир ккун апIураза», – гъапнийи гьюрматлу мялимди.
Райондин главайин сарпи заместитель Агъамирзе Гьямзабеговди, меркездиан дуфнайи хизандин дуст, профессор, физикайинна математикайин илмарин доктор Мюгьюмед Ризахановди ва жара ярар-дустари хизандин терефназ мани гафар гъапнийи.
Райондин имамарин советдин председатель Шябан Салихьовди, хялар ва гъуландар тебрик апIури, ягъурлу гафар гъапIну ва, чан гъарашугъарихъди нашидар урхури, му шаду мяракайиин хъана артухъ мешреб алапIну.
Чаз гаф туву вахтна Айина Балалиевайи, чан сарпи кюмекчйир вуди ва гьарган телефондиин алди гъахьи Вагиф Гьясанбеговдиз ва Низами Эфендиевдиз баркаллагь гъапнийи ва дурарин жафа дайиш шид аьхирихъна хуз даршлубдикан хабар тувнийи.
Аьхириъ райондин депутатарин къарарниинди Айина Балалиевайиз Хив райондин гьюрматлу ватандаш ччвур тувнийи. Жямяаьтдин йикьрарниинди му хизандиз саб халачи пешкеш гъапIнийи. Хъа профессор Ризахановди Айина Балалиевайиз варитIан аьхю ва гьюрматлу – Мажвгларин Айина – ччвур тувнийи.
