Феруза Рамалданова
Мялум вуйиганси, Хив райондин МФЦ-йин улихь «Шагьрарин гъулай аьтрафар» метлеблу программайин дахилнаъди тамам апIурайи тикилишчивалин ляхнар улупнайи вахтназ аьхирихъна гъюра.

Хив райондин администрацияйин ЖКХ-йинна тикилишчивалин, саб вуйи заказарин гъуллугънан управлениейин директор Заур Ибрагьимовди субут гъапIганси, улупнайи федеральный программа Урусатдин шагьрариъ гьяракатнаъ ади хайлин йисар ву.
– Хив райондин гъулариъра му важиблу программа кечирмиш апIури хайлин йисар ву. Натижайиъ, Дагъустандин саб жерге жара районарихъди сабси, Хив райондизра тялукь шартIар яратмиш апIбаз, агьалйириз эрг’вал йивбаз аьлава йишвар тикмиш апIуз мумкинвал гъабхьну.
КьатI’иди гъапиш, гъябгъюрайи йисан улупнайи программа кечирмиш апIури, Хив МФЦ-йин улихь хьайи майдан ккабалгбан ляхнар тамам апIура. Му программайин дахилнаъди душвахь йишвандин вахтна акварихъди тямин апIбан, аьтрафариин чрушнар кивбан ляхнар тамам дапIна. Дурарилан савайи агьалйириз дусру йишвар тешкил апIувалра фикриъ а. Гъахурайи ляхнар вахтниинди кIулиз адагъубси, дурар ерийиинди тамамра апуб чарасуз ву.
Пуз ккундузуз, улихьна йисари му программайин дахилнаъди рякъяр ккабалгузра шуйи, хъа гьамус жара дапIнайи дакьатар харж апIбаз кьатI’и рякъяр улупна. Программайиъ иштирак хьпан бадали, вахтниинди тялукь дизайн-проект яратмиш дапIну ккунду. Дакьатар гьадму проектдиъ улупнайи метлебариз асас вуди жара апIура, – къайд гъапIну З.Ибрагьимовди.