Мейлан Нежефов
Гьаму йигъари Хив райондиъ, тарихдиъ сабпи ражари вуди, гьяйвнар жаргъбаан талитар кIули гъушну. Дурар Хив райондин администрацияйи, «Даглар» ООО-йи ва ва хусуси предприниматель Багьатиловди тешкил гъапIдар вуйи.
АрхътIан Хивна гъябгъюрайи рякъюн гъвалахъ хъайи хутIлиз талитариъ иштирак хьуз Кьибла Дагъустандин районариан чпин гьяйвнариинди къарилан зина атлуйир гъафнийи. Дурариз тамаши апIуз кьюдварждихьна гьевескрарра дуфнайи.
Талитарин шартIариинди иштиракчйир кьюб дестейиз жара гъапIнийи. Сабпи дестейиъ чиб-чпихъди бягьсназ дагълу (ерли жинснан) гьяйвнарин эйсйир, хъа кьюбпи дестейиъ марцци жинсарин вая гъидикьнайи жинсарин гьяйвнарин эйсйир (гизафси гъирагъдилан дуфнайидар) удучIвнийи.
Натижайиъ ерли жинснан гьяйвнар жаргъбаан сабпи йишв Кьурагь райондин Хпюхъ гъул’ан вуйи Гьязим Къурбановди гъазанмиш гъапIнийи, кьюбпи йишв Хив райондин Хив гъулан агьали Гьясан Гюльмягьямедовди гъадабгъну, хъа шубубпи йишван сагьибра Хпюхъ гъулан агьали Ферзуллагь Аьлиев гъахьну.
Марцци жинсарин вая гъидикьнайи жинсарин гьяйвнар талитариъ цIибтIан адайи, гьаддиз думу дестейиъ саб 1-пи йишвтIан тяйин гъапIундайи – Агъул райондин Тпигъ гъулан агьали Рамазнан ГьюсукIаевдиз. Мидланра савайи, талитариз гъюз кьан гъабхьи, амма гьяйвнар жаргъбариъ иштирак хьуз аьхю аьшкь ади ярхи манзил ккадапIу Дукъузпара райондин Усухчай гъулан агьали Рязан Везирхановра кIваин гъубзру пешкешниинди лишанлу гъапIну.
Гьацира му йигъан гьяйвнар жаргъбан талитариз лигуз дуфнайи тамашичйирин арайиъ деккуйиан чIимрар йивбан талитра кIули гъубхнийи. ЯгъчIвурилан зиина иштирак гъахьидарин арайиъ шубби йишварра Хив райондин агьалйири гъадагънийи. Гьаци, сабпи йишв Хив гъулан агьали Фарид Аьбдурягьмановди гъазанмиш гъапIнийи, кьюбпи йишван сагьиб АрхътIан вуйи Даир Шябанов, хъа шубубпи йишван сагьиб – Чювккен вуйи Шябан Сялигьов гъахьнийи.
Спортдин серенжемарин натижйир Хив райондин кIулиъ айи Ярмет Ярметовди гъивнийи. «Гьяйвнар жаргъбаан ва деккуйиан чIимрар йивбан талитар гъи ихь райондин сяргьятариин сабпи ражари кIули гъахурахьа. Къайд апIуз ккундузузки, ухьу фукIа цIийиб тешкил гъапIундархьа. Саб лик кьяляхъ хъадакну, ухьу ихь тарихдихьна илтIикIиш, му талитар ихь ата-бабйирилан гъузнайи ирс вуйиб мялум шулу. Йирси архнаъ шид ипганси, гъи ухьу спортдин му жюрйир таза кIултIан тешкил апIувализ лигну, ухьухьна магьа гъунши гъуларианра талитариъ иштирак хьуз хялар дуфна. Гъит гьарсаб талитнаъ варитIан зирекур гъалиб ишри ва ихь арайиъ гьарган гьамци дуствалин, чвевалин аьлакьйир гъузри. Баркаллувалиинди йискьубак сабан му талитар кIули гъахидихьа», – гъапнийи Ярмет Ярметовди.
Уч духьнайидарин арайиан талитарин тешкилатчйириз чухсагъул мялум апIури, Хив райондин имамарин советдин председатель Шябан Сялигьовра удучIвну гъулхнийи.
«Гъи ухькан гъалиб даршир сарра имдар. Ухьу гьамина гъювал ва талитариъ иштирак хьувал гъалибвалик гьисаб ву. Марцци кIваан му серенжемарин тешкилатчйириз ва вари иштиракчйириз чухсагъул кIураза. Дуствал, сар-сарихьна вуйи хатир-гьюрмат уьбхюз ва гъунши районарин агьалйирихъди цIийи таниш’валар ккергъуз ухьуз мумкинвал туву тешкилатчйириз сабсан ражну баракаллагь. Ихь Пайгъамбрин гьядисариъ дупна: «Аргъаж шулайи наслариз сирнав йивуз, гьяйван жабгъуз ва деккуйиан чIимрар йивуз улупай». Гъи магьа Пайгъамбрин гьядисариъ дупнайи кьюб насигьят тамам дапIну, насларихьна рукьуз амур гъапIунхьуз. Шюкюр Аллагьдиз. Гъит ихь варидин гъийин бизарвалин ликар алдагъувал гьяждиз гъягъбан гьисабариз гъадагъри, гьюрматлу дустар», – гъапнийи чан улхбаъ Сялигьовди.
Талитариъ пешкешнан йишвар гъадагъдариз тешкилатчйирин ччвурнахъан вуйи гьюрматнан кагъзар, кубокар ва пул айи конвертар тувнийи.
Шиклиъ: Гьяйвнар жаргъбаан талитарин гъалибчи Гьязим Къурбанов.
