Гюльнара Мягьямедова
Дербент шагьриъ Гьюкуматдин табасаран театрин дараматдиъ му идарайин директор Аьлимурад Алимурадовдин регьберваликкди табасаран композитор, Урусатдин искусствйирин лайикьлу гъуллугъчи Кьасум Мягьямедов бабкан духьну 80 йис тамам хьпаз бахш дапIнайи гьюрматнан серенжем гъабхбан тешкиллувалин комитетдин совещание гъабхьну.
Совещаниейиъ пианист, Урусатдин искусствйирин лайикьлу гъуллугъчи Хан Баширов, Д.Аьшуровдин ччвурнахъ хъайи Дербентдин музыкайин училищейин директор Камил Мягьмудов, Кьалухъ Мирзайин ччвурнахъ хъайи фонднан председатель Исамудин Рамазанов, меценат, жямяаьтлугъ кас Айваз Рамазанов, РД-йин лайикьлу артист Марьям Къазиева иштирак гъахьнийи. Дурарикан гьарсари серенжем гъабхбан гьякьнаан чпин фикрар ачмиш апIури, жюрбежюр теклифар дивнийи. Варидарин разивалиинди, серенжем цци ноябрин вазли гъабхувал планламиш гъапIнийи.
«Табасарандин нурар» газатдин журналист табасаран театрин директор Аьлимурад Аьлимурадовдихьна, композиторин юбилей тешкил апIбан теклиф шли дивуб вуш, думу наан гъабхбанди вуш ктибтувал ккун апIури, илтIикIну. Дугъан жаваб исихъ туврача.
«Гьаму йисан Кьасум Мягьямедов бабкан духьну 80 йисандин юбилей къайд апIурайивализ дилигну, май вазлин аьхириъ Табасаран райондиз культурайин идарйир ачмиш апIбахъди аьлакьалу вуди РД-йин культурайин министр Зарема Бутаева дуфнайи вахтнаъ, дугъахъди гафар-чIалар гъахьнийич. Кьасум Мягьямедовди чан уьмур музыкайиз бахш гъапIну. Думу, ухьуз аьгъюганси, Урусатдин ва Дагъустандин культурайин лайикьлу гъуллугъчира ву, Гьюкуматдин премияйин, Лениндин комсомолин премияйин, жюрбежюр наградйирин сагьибра ву. Дугъан ччвур Табасаран райондин Хючна гъулаъ айи искусствйирин мектебдиз тувна.
Ич гюрюшдиъ Дагъустан Рес-публикайин музыкантарин союздин председатель Хан Башировди къайд гъапIганси, Кьасум Мягьямедов Дербент шагьрин педучилищейиъ урхурира гъахьну, дугъаз Дербент ккуни шагьурра вуйи, душваъ гъябгъру гьар фуну серенжемдиъра думу аьхю ашкьниинди иштирак шуйи. Гьаддиз, Хан Башировди юбилейин серенжемар Дербентдиъ гъахувалин теклиф дивнийи. Теклиф варидариз кьабул гъабхьнийи.
Сентябрин вазли Расул Гьямзатовдин 100 йисандин юбилей къайд апIурайивализ дилигну, Кьасум Мягьямедовдин юбилей цIиб кьандиси, ноябрин вазлиъ гъабхувал планламиш апIурача. Ихь композиторин музыка-йихъди мяълийир апIру табасаран артистариз – Марьям Къазиевайиз, Аьбдулла Мирзакеримовдиз, Сефьяханум Муртазаевайиз – рягьятди вуйи йигъ кадабгъну, серенжем гъабхру йигъкан саб ваз ккимиди мялумат тувдича. Гьацдар ужудар ниятар айич.
Серенжемдин тешкилатчйир Табасаран гьюкуматдин театр ва РД-йин музыкантарин союз ву», – гъапнийи Аьлимурад Аьлимурадовди.
