Гюльнара Мягьямедова
Августдин 13-пи йигъан Дагъустандин писателарин союздиъ Расул Гьямзатовдин ччвурнахъ хъайи Литературайин музейиъ РД-йин культурайин лайикьлу гъуллугъчи, табасаран шаир Аьбдурягьим Аьбдурягьмановдин (Рягьим Рягьман) Белоруссияйиан вуйи машгьур шаир, таржумачи Анатолий Аврутинди табасаран чIалнаан урус чIалназ илтIикIнайи шиърарикан ибарат вуйи китабдин презентация кIули гъубшнийи. Китабдиъ аьхиримжи йисари шаири гъидикIу ихь уьлкейиъ кьисматнакан, багъри гъулкан, ихь ватан бадали женгар гъахурайи игитарикан шиърар а.
«Гъи ухьу Аьбдурягьим Аьбдурягьмановдин «Аьсрин аьраба» китаб чапдиан удубчIвбахъди, автор тебрик апIуз уч духьнахьа. Китаб чан ччвурназ хас ву, фицики душваъ гизафси автор аьхю гъахьи чан Ватандикан, жямяаьтдикан дибикIна. Гьаддихъди сабси таржумачийира шиърариин хайлин зегьмет дизигна. Китабдиъ айи шиърариъ ихь аьсрин инсандин гъюнариин али вари гъагъишнарикан ачухъди дупна. Авторин шиърар философияйин дериндиан гъюра, шиърар гъурху кас фикрарик кахъуз гъитра. Гъи ухьу, гьамина уч духьнайидари, шиърарин мянайиз фикир туври, ачухъ сюгьбат гъабхурхьа. Анатолий Аврутинди улихьнара Дагъустандин писателарин шиърар таржума апIури гъахьну. Думу Дагъустандизра гъафну, ерли шаирарихъдира таниш ву.
Аь.Аьбдурягьмановдин сабпи китаб удубчIвиган, узу дугъахъди гюрюшмиш гъахьнийза. Китабдин жюрбежюр терефарихъди йиз наразивалра улупнийза. Хъа вахтарилан, думу авторин яратмиш апIбарихъди бегьем таниш гъахьиган, табасаран, кьибла дагъустандин поэзия лирикайин терефнаан Дагъустандин уьмуми поэзияйихьан тафавутлу шулайибдин гъаври гъахьнийзу. Ухьу ригъ гьудубчIвру терефнан классикайин поэзияйихъди багахьди таниш вухьа, хъа Аь.Аьбдурягьмановдин бикIбан саягъ улихьна ихь табасаран шаирариз адрубсиб ву. Дугъу урус литературайиан табасаран литературайиз С.Есениндинстар гьиссар гъахну. УдубчIвнайи яв цIийи китаб ихь Дагъустандин дамагъ вуди гьисаб апIураза», – гъапнийи Дагъустандин писателарин союздин табасаран секцияйин кIулиъ айи Сувайнат Кюребеговайи.
Китаб Москвайиъ «Урусатдин писатель» чапханайиъ удубчIвну, диди чаина китабариин юкIв алидарин фикир жалб апIура.
«Гьарсар авториз чан удубчIву китаб бабкан гъахьи веледси шулу. Рягьим Рягьмандин чапдиан удубчIву китаб, табасаран литературайизси, Урусатдин гизаф миллетарин литературайизра саб гьядиса ву. Узу улихьнара аьхю ашкьниинди Рягьим Рягьмандин шиърар таржума гъапIунза. Дугъан шиърар учв багъри ругарихьан ярхла духьну адрувалин гьиссари, учв гьадму ругарин саб пай вуйивали ацIна. Автори гъийин деврин хажалатну абцIнайи вахтнакан, Ватан бадали жан туврайи игитарикан, дурарихъан ургурайи бабарин юкIварикан шиърар дидикIна. Гьяйиф, Дагъустандин шаирари уьлкейин игитарикан цIибтIан бикIурадар, гъи ухьу ватанпервервалин тема яркьуди ккатIабццну ккунду», – гъапнийи РД-йин писателарин союздин председатель Марина Аьгьмедовайи.
Презентацияйиъ Дагъустандин писателарин союздин милли чIаларин секцйирин кIулиъ айидар, аьлимар, журналистар удучIвну гъулхнийи. Дурари Аь.Аьбдурягьмановдин шиърарин гьякьнаан чпин фикрар ачухъ гъапIнийи. Белоруссияйиан видеозенг дапIну, Анатолий Аврутинди Аьбдурягьим Аьбдурягьмановдин шиърар таржума апIури, чпин сатIиди гъубшу вуйи ляхникан ктибтнийи.
ЦIийи китабдин аьхириъ автори «Гьясайин шилнаъди» кIуру поэма тувна. Эгер йиз фикир ачухъ апIуруш, китабдиъ варитIан гьаму поэма кьабул гъабхьунзуз. Поэма гъулаъ йирси дубхьну ялгъузди гъубзнайи абайин хулкан вуйи пашман гьиссарилан ккебгъра. Авторин фикрар бицIивахтназ, жигьил вахтназ тIирхура, хъа абайин гьясайи пашман фикрар гъитну, улихьна, ужуб гележегдиз гъягъюз рякъ улупура.
