Гюльнара Мягьямедова
2023-пи йисандин августдин 14-пи йигъ Дагъустандин агьалйириз лап гъагъиб, кIваълан дурубшруб гъабхьнийи. КIваин илмийиз: Мягьячгъалайин саб кIулихъ яшамиш шулайи узуз тмуну кIулихъан дявдиъ гъутIубкIу тупранубсиб сес гъеебхьнийзуз. ЦIиб вахтналан гьамлин-гьатлин гъюрайи телефондин зенгариан мялум гъабхьиси, машинар рас апIру станцияйиз аьхю мусибат гъядябхьнийи: тIубкIувал, цIа кабхъувал, йицIдариинди гъийиху ва варжариинди зийнар гъахьи инсанар. ВуйиштIан, машинар рас апIру станцияйиъ сваркайин ляхнар гъахурайи вахтна машиндик цIа кабхъну.
ЦIиб арайилан цIа багахь хьайи АЗС-диин алабхъну, кьюб цистерна гъутIуркIну. ТIубкIувалин кьувват гьадмукьан аьхюб гъабхьнийики, гьятта рякъюн тмуну терефнаъ айи селитрайин шишлар айи складдиинра алабхънийи. Хъа цIа кабхъу селитрайи фициб тIубкIувал арайиз хуруш, багарихь хьайи гизаф мертебйирин хуларин гьядахьу раккнарина унчIвари улупну. Сабпи тIубкIувалин кьяляхъ инсанар кюмек апIуз гьялак гъахьну, гьадму арайиъ кьюбпи тIубкIувалра гъабхьну. Хьадан йигъан Мягьячгъалайин гъирагъдиъ, Карамандин райондиъ, манишин яваш хьпан кьяляхъ кючейиз ва багахь хьайи тукандиз удучIвнайи инсанарикан хатIалу дюшюшдиъ 37 кас гъийихнийи, 120 касдизкьан зийнарра гъапIнийи. Хъайигъан, 15-пи августди, республикайиъ пашманвалин йигъ мялум гъапIнийи.
Магьа думу пашман гьядисайихъан кьюд йисра гъубшну.
14-пи августди Мягьячгъалайиъ машинар рас апIру станция гъутIубкIу йишв’ин гъийиху инсанарин гьюрматназ ядигар дивну ва чру набататариинди дабалгнайи рягьятвал гъадабгъру багъ ачмиш гъапIну.
Ядигар ачмиш апIбан серенжемдиъ РД-йин Глава Сергей Меликов, Мягьячгъалайин мэрин вазифйир тамам апIурайи Жамбулат Салавов, жямяаьтлугъ тешкилатарин вакилар, меркездин агьалйир ва гьацира жарадар иштирак гъахьнийи.
Сергей Меликовди нубатнан ражари, жвуван хатIасузваликан фикир дарапIди, зарар гъабхьидариз кюмек тувуз гъажаргъу дагъустанлуйирин игитваликан кIваин гъапIнийи.
«Бедбахтвалин дюшюшну йицIда-риинди инсанар уьмрихъ мягьрум гъапIнйи. БицIидар йитим гъахьнийи, абйир-бабарин веледар, багахьлуйир, дустар сакьат гъахьнийи.
Гъийихдарин гьюрматлу багахьлуйир, учу учвухъди сабси ичв хажалат пай апIурача. Думу ихь уртахъ хажалат ву. Фукьан ужудар гафар узу гъапишра, ичв гъянаъ айи учIврушин яваш хьибдар. Гъи ухьу ядигар ачмиш апIурахьа, гьаму йишв бедбахтвалин дюшюшнан натижайиъ уьмриан гъушдар гьаргандиз кIваинди уьрхру йишв хьибди.
Дерд ва хажалат туву думу вахтна, ухьу инсандин рюгьнан, инсан мюгьтал апIру кьувватнан, Кавказдин, Дагъустандин хасият улупбан шагьидарра гъахьнийхьа. ТIубкIувалин сес кубкIиган, дина шагьрин жа-жара терефариан агьалйир гъюз хъхюгънийи. Дурар, чпин хатIасузваликан фикир дарапIди, жвуван жандилан хил алдабгъну, зийнар духьнайидариз сабпи кюмек тувуз ккунди, цIин ялавнягъ гъярхьри гъахьну», – гъапнийи республикайин кIулиъ айири.
Дагъустандин главайи Мягьяч-гъалайин гъирагъдиъ улубкьу бедбахтвалиъ зарар гъабхьидариз кюмек туву духтрариз, къанун уьбхру органарин гъуллугъчйириз, цIа ктIубшврудариз чухсагъул мялум гъапIнийи.
«Сарпидарди йишв’ина гъафи цIа ктIубшвру ва кюмек тувру гъуллугъарин пишекрариз, медицинайин идарйириъ лихурайи духтрариз, полицияйин вакилариз, дадаргънайи йишвар марцц апIури йишвнура-йигънура лихури гъахьи волонтерариз аьхю чухсагъул.
Ядигар дивуз кюмек тувдаризра, багахь йишв ккабалгдаризра, пулин кюмек туву ихь меценатаризра чухсагъул мялум апIураза. Ичв кюмекну халкьдин сабвал улупура.
Мягьячгъалайин администрацияйи, Жамбулат Салавов кIулиъ ади, бедбахтвалин дюшюш гъабхьи йишв’ина дуфну, гъийихдар кIваин апIру йишв ккабалгбан месэлара гьял гъапIну.
Узуз варидарихьна илтIикIну пуз ккундузуз: гьюрматлу ватангьлийир, ичв жанар, веледар, багахьлуйир уьрхяй! Думу жюрейин пашман дюшюшар зат текрар даришри. Бедбахтвалин дюшюш кIваинди уьбхювали ухьуз чиб-чпихьна ужуди янашмиш хьуз, хъугъвалиъ ва сабвалиъ мюгькамди гъузуз кюмек тувди. Учвуз ислягьвал, уж’вал ва мюгькам сагъвал ккун апIураза», – гъапнийи Сергей Меликовди.
Ядигар ачмиш апIбан серенжемдиъ 2023-пи йисан 14-пи августди гъабхьи бедбахтвалин дюшюшнаъ кьюр худул гъийиху Аьйшат Муртузялиевара удучIвну гъулхнийи. Дугъу гьадму читин йигъан зарар гъабхьидариз кюмек гъапIу гьарсар касдиз чухсагъул гъапнийи. «Гъит, гьаму ядигар хатIасузваликан, сабваликан, чиб-чпиз кюмек тувуз гьязур вуйиваликан, уьмрин гьарсаб дакьикьа багьалу вуйиваликан кIваин апIру йишв ибшри. Гъийихдарин гьюрмат уьбхюри, думу жюрейин хатIа-балйир текрар дархьбан бадали, ухь’ан удукьруб вари апIурхьа.
Гъийихдарин рюгьяриз сикинвал бихъри, хъа ухьуз гележегдин уьмур хъапIуз фагьум ва кьувват туври», – гъапнийи дугъу.
Саб дакьикьайиъ ккебехъну гъузбиинди ва ядигарихъ кюкйир дивбиинди, уч духьнайидари гъийихдарин рюгьяриз чпин гьюрмат улупнийи.
