Наргиз Гюлечова

Гьаму йисан майдин вазлихъанмина агьалйирихьан саспиган мобильный интернет либхурадар кIури, аьрзйир ерхьури шулу. Магьа мициб аьгьвалат Дагъустандизра хъубкьну.

 

8-пи августдихъанмина республикайиъ, хъа асас вуди гьюлин гъирагъарихъ хъайи шагьрариъ мобильный интернет либхурадар.

Мициб читин аьгьвалат арайиз гъюбан метлеб, пилот хъадарди тIирхурайи аппаратарин (БПЛА) хатIалувалихьан уьрхюб ву. Гьамусяаьт ВСУ-йи ихь уьлкейиз деетурайи БПЛА аппаратар мобильный интернетдихъди лихурайидар ву кIури, чан Телеграм-каналиъ республикайин Глава Сергей Меликовдира мялумат тувну ва агьалйирикан цIиб аьгь апIубра ккун гъапIну.

Аьгьвалат гьелелиг читинди гъубзра. Гьаддиз асас вуди гьюлин гъирагъарихъ хъайи шагьрариъ МФЦ-йин офисариъ инсанариз интернет ибшри кIури, пулсузди вуйи Wi-Fi дивра.