Гюльнара Мягьямедова

19-пи августди Дагъустандин Глава Сергей Меликовдин регьберваликкди РД-йин Террориствализ аькси комиссияйин ва Гьяракатнан штабдин сатIи заседание кIули гъубшну. Душваъ асас вуди гьял гъапIу месэла интернет арандиъ террориствалин ва экстремиствалин идеология тарабгъбаз аьксивал улупуб вуйи.

 

Сергей Меликовди заседаниейиъ къайд гъапIганси, интернетдиъ экстремистарин вакилари гъабхурайи ляхни жямяаьтлугъдиз чIуру тясир апIура. Дугъан гафариинди, жигьиларин арайиъ адлу вуйи социальный сетариъ чIуру идеологияйин терефкрари терроризмдин пропоганда гъабхура ва чпин жергйириз цIийи терефкрар жалб апIура.
Республикайин Главайи гъапиганси, региондиъ саламатвал уьбхбак мялуматарин дакьатари важиблу пай кивра. «Социалин сетариъ экстремизмдин тереф уьбхюрайидари агьалйириз важиблу ляхнарикан дюз дару мялуматар туври шулу», – гъапну Сергей Меликовди. Дугъу къайд гъапIганси, агъзрариинди инсанар лигру телграмм-каналари инсанарин фагьум чIуру терефназ илтIибкIури, дюз дару мялуматар тарагъури, гьюкмиз къаршу вуйи заказар тамам апIура.
МВД-йин мялуматариинди, гьаму йисандин 6 вазлин арайиъ интернетдиъ гьадму жюре 710 материал ашкар дапIна, дурарикан 604 экстремизмдин ва терроризмдин мяна айидар ву. Дурар хъяркьбан бадали, Роскомнадзорин Управлениейиз 704 материал хътаъну.

Сергей Меликовди къанун уьбхру органарикан, гьюкмин жара органарикан, муниципалитетарикан ляхин гужал апIуб, асас вуди социальный сетариъ дугъри мялуматар тувбан ляхин жанлу апIуб ккун гъапIну. «Гьюкуматдиз мялуматар тувбаъ кюмек апIуз гьязур вуйи, ужуб ляхин гъабхурайи блогерарихъди аьлакьйир яркьу апIуб лазим ву», – гъапну дугъу. Думу ляхниина илимдинна экспертарин тешкилатар, интеллигенция ва машгьур касар жалб дапIну ккунду.
Заседаниейиъ гьацира терроризмдин гьюжмихьан транспортдин инфраструктура, образованиейинна сагъламвал уьбхбан идарйир ва гьацира инсанар гизаф уч шлу йишвар уьрхбан месэлйир гьял гъапIнийи.