Зубайдат Шябанова
Хив райондиъ 2024-пи йисан налогарин ва налогарин дарди бюджетдиз гъафи гъазанжар пландиъ улупнайибдин 106,2 процент тамам гъапIну, хъа райондин бюджетдиз финансарин вари чешмйириан 235,5 млн манат инвестицйир гъафну. Дурарикан асас капиталин бюджетдин инвестицйир – 153,5 миллион манат, хусуси касарин инвестицйир 82,2 млн манат ву. Гьаму ва жара мялуматар улихьна йигъари Хив райондин администрацияйиъ райондин глава Ярмет Ярметовдин регьберваликкди кIули гъубшу яркьу заседаниейиъ тувну.
Хив райондиъ яшайишдинна экономикайин артмиш’валин натижйирихъди, гъубшу йисан муниципальный бюджет тамам апIбахъди, райондин культурайин идарйин кадрйирихъди ва материалинна техникайин цирклиан тяминвалихъди аьлакьалу месэлйирикан ва райондиъ Урусатдин «Сарпидарин гьяракат» тешкилат артмиш апIбакан вуйи докладар хьади, райондин администрацияйин главайин заместитель Агъамирза Гьямзабегов, райондин финансарин ва налогарин отделин начальник Аьбдулгьямид Бегов, культурайин, спортдин, жигьиларин политикайин ва туризмдин отделин начальник Казбек Къазиев, образованиейин отделин начальник Назаряли Тарланов удучIвну гъулхну.
Дурари чпин докладариъ къайд гъапIганси, гъубшу йисан райондиъ 2400 квадратдин метр яшайишдин тикилишар дивну, промышленностдин тешкилатари 25,2 млн манатдин сурсатар гьясил гъапIну. 2024-пи йисан январиан декабриз гьясил гъапIу гъулан мяишатдин валовый сурсатарин кьимат 1,108 млрд манатдихьна удубчIвну, дурарикан набататчивалин цирклиъ – 547 млн манатдин, малдарвалин цирклиъ – 561 млн манатдин. 2024-пи йисан набататчивалин ва малдарвалин цирклар артмиш апIури, гьюкуматдин кюмек тувру программайин бинайиинди Хив райондиъ гъулан мяишатдин сурсат гьясил апIрудари 5,1 млн манатдин субсидйир гъадагъну.
2024-пи йисан Хив райондин рякъярин мяишатдиъра хайлин ляхнар тамам гъапIну. Гьаци, республикайин ва муниципальный мяна айи машинар хъаъру 15 километр рякъяр рас гъапIну. ГъуштIил гъул’ан Ляхла гъулахьна республикайин Дербент-Хучни-Хив машинар хъаъру рякъ рас апIуз 200,1 миллион манат харж гъапIну.
Сач Хив райондиъ ерли мяна айи рякъярра рас апIуз мумкинвал гъабхьну. Мисалназ, Хирижв гъулан кьюб кючейин рякъ рас апIуз 3 млн манат, Кугъ гъулан кьюб кючейин рякъюз 2,8 млн манат, Асккан АрхъитI гъулан кючейин рякъюз 1,977 млн манат харж гъапIну.
Яшайишдин мяна айи объектар дивувалра давам гъабхьну. Гьаци, Гъвандикк гъулаъ модульный цIийи ФАП ва мини-футболин майдан, хъа Хив гъулаъ сейир апIру багъ ачмиш гъапIну.
Райондин культурайин цирклиъ Хив гъулан РКДЦ-йиз, ЦБС-диз, ЦТКН-диз ва музейиз, Цнал, Асккан АрхъитI, Зилдикк, Хирижв, ЦIинитI, ЧIилихъар гъуларин клубариз уьмуми кьадар 3 млн манатдин мукьмар йивру алатар, оргтехника ва мебель масу гъадабгъну.
2024-пи йисан Хив райондиъ 142 кас ляхнихъди тямин апIувал ва дурарихъди зегьметнан йикьрар йитIувал сабсан важиблу хъуркьувалси йисаб апIуз шулу.
Заседаниейиъ уч духьнайидари райондиъ гъубшу йисан гъубху ляхнарин натижйир йивбан кьяляхъ, улубкьнайи йисан улихь дивнайи планарикан ва дурар гьял апIру рякъярикан гъулхну.
