Мейлан Нежефов

Ихь уьлкейин Халкьарин сабвалин йигъандин гъаншариъ Хив райондизди учIвру биржвликкансина гъябгъюрайи рякъюхъди керхнайи баннерар таза алаъну. Му ляхин тешкил гъапIу райондин культурайин, спортдин, жигьиларин политикайин ва туризмдин кIулиъ айи Казбек Къазиевди узуз баннерар цIийи алаъбан метлебнакан ктибтнийи.

 

– Аргъаж шулайи наслари ватанпервервал гьисс апIбан бадали, гьамцдар жямяаьтлугъ ляхнариз ухьу кми-кмиди фикир туври ккунду. Му ляхнин тешкилатчи райондин администрация ву. Дилин уз’ина табшурмиш гъапIуб ич гъарашугъарихъди кIулиз адабгъунча. Юкьуб метр яркьушин, кьюб метр ягълишин алди 5 баннер гьязур гъахьнийи. Муганаз урснайи турбйирра, рамкйирра таза алаъган, гьамус дурар саб утканди рякъюра. Баннерариъ ихь уьлкейин ва республикайин кIулиъ айидарин, СВО ккебгъхъанмина гъахьи дагъустандин 12 Игитрин суратар ва ватандихъан, жвувандарихъан юкIв убгру дурарин гафар-чIалар атIагна, – гъапнийи Казбек Къазиевди.

Мюгьлет ккабхъну имиди, йиз сюгьбатчийи Хив райондин агьалйир 4-пи ноябрин машкврахъди тебрик гъапIнийи: «Дустар, гьарсар касдиз, Халкьарин сабвалин йигъ марцци кIваан тебрик апIури, жандин сагъвал, жил’ин ислягьвал ва хизандиъ хушбахтвал ккун апIураза». Казбек Къазиевди ватанагьлийириз райондиъ машкврахьна тешкил дапIнайи жюрбежюр серенжемариъ иштирак хьуз теклиф дивнийи.