Мейлан Нежефов
Вари Урусатдиъси, ихь республикайиъра хусуси метлеб айи дявдин операцияйиъ иштирак шулайи эскрариз, дурарин хизанариз асас фикир тувра. Дупну ккундуки, ихь Дагъустандин глава Сергей Меликовди эскрариин, дурарин багахьлуйириин алахьурайи му вахтнан читинваларин артухъди гъаври айивали ва гьацира кюмек дапIну ккуни гьюкуматдин, жямяаьтлугъ тешкилатарин пишекрари хайлин ляхин гъабгъура.
Ухьуз рябкъюрайиганси, багъри веледар, жилар, чвйир му гъагъи гьядисйириъ иштирак шулайи вахтна, абйир-бабарихьинди ва хизанарихьинди гьарсаб терефнаан ужуб гафниинди, кюмекниинди илтIикIруган, дурарин юкIвар рази шулу, гъалабулугъвал яваш шулу.
Октябрин 5-пи йигъан ихь республикайин «СатIи вуйи Урусат» кIуру партияйин Хив райондин политсоветдин член Наила Агъасиева ва райондин больницайин кIулин духтир Индира Багъичева Ургъа гъулаъ яшамиш шулайи Гьясановарин хизандихъди гюрюшмиш гъахьну. Му гюрюшдиъ дурари хизандиз гьюрматнан гафар дупну, чпин терефнаан тувуз шлу кюмек апIуз гьязур вуйибдикан гъапну.
Агъабала Эфендиевичдинна Мю-гьюббат Садировнайин юкьур баликан шубур бай гьамусяаьт хусуси метлеб айи дявдин операцияйиъ иштирак шула. Садпи йигъариланмина миллетчйирихъди женгариъ айи Апрел ва Арсен Гьясановар, чпи улупу кIубанвалариз дилигну, «Дирбаш’вализ дилигну», «Хусуси метлеб айи дявдин операцияйин иштиракчи» ва Жуковдин медаларихъди лишанлу дапIна. Гьамус, кьюриддинра документар Суворовдин ччвурнахъ хъайи медализ гьязур дапIну тувна. Шубурпи чве Рафик Гьясанов Ханкалайиъ эскервалин гъуллугънаъ айир, чан хушниинди му хусуси метлеб айи дявдин операцияйиъ иштирак шула. Думу кьюр веледдин адашра ву. ВартIан аьхю гъардаш Радик Гьясанов Анапа шагьриъ чан хизандихъди яшамиш шула. Дугъаз сар ришра а. Гъардшар Ватандин гъайгъушнаъ айиган, Радик Гьясановди абйир-бабариз артухъди фикир туври, чаз вахт ккабхъубси, дурарихьна гъюри, чахьан шлу кюмек апIура ва учвтIан бицIи гъардшарра кIваълан гьаърадар.
«Хизанна багахьлуйир эскрариз вартIан гизаф фикир тувру ва читин вахтна рюгь капIрудар ву. Кьягьялвал ва Ватандихьна вуйи ккунивал хизандиъ арайиз гъюрайиб ву. Агъабалайина Мюгьюббатди чпин веледарихьна вуйи ккунивал жин дарапIри, дурариинди дамах апIури, сюгьбат гъабхуйи. Му хизандин кIубан баярик, багъри хизандиси, гъулан агьалйирира, ватанагьлийирира рюгь капIра. Гьацира Хив райондин глава Ярмет Ярметовдин тешкиллувалиинди, дявдин операцияйиъ иштирак шулайидариз багъри райондиан ипIру сурсатар, уьмриъ герек шлу шей’ар хъади-хъади хътаура.
Му хизандин арайиъ гьапIу вахтна учу му читин вахтнан вари месэлйир гьял апIуз шлубдин, сабхилди ухьхьан вари удукьрубдин гъаври гъахьича», – гъапну Наила Агъасиевайи.
Дупну ккундуки, гизафси мицдар хизанариз чпи кIваълан гьадрархрайивали, чпин баяри Ватан бадали зигурайи зегьмет имбударизра рябкъюрайивали сабур тувра, кIваан вуйи сюгьбатари дурарин рюгьяр рази апIура, гевюл ачухъ апIура.
Му йигъан гьацира, Гьясановарин хуларихъна вуйи рякъ рас апIуз гаф тувну.
«Ухьуз аьгъюганси, сагъламвалин тешкилатари ихь эскрариз, дурарин хизанариз артухъди фикир тувра. Узура йиз ва вари ич пишекрарин терефнаан ичв хизандиз кюмек апIуз гьязур вуза», – гъапну чан терефнаан Индира Муминовнайи.
Вари женгар ихь Ватандин гъалибвалиинди ккудукIну, му хизандин игит баярра, вари жигьиларра сагъ-саламатди кьяляхъ дуфну, ихь уьмриз ислягь йигъар ухди гъюрубси ибшри!
