Мейлан Нежефов
Гьаму йигъари Хив райондиъ Фурдагъ гъулан аьтрафариин хизанари рягьятвал гъадабгъру майдан ачмиш гъапIну. Гъунна терефназ гъягъру рякъюхъди вуйи ярквраъ успагьи майдан ачмиш апIбан жягьтлувал Хив райондин культурайин отделин кIулиъ айи Казбек Къазиевдинуб вуйи.
Ич сюгьбатнаъ Казбек Къазиевди къайд гъапIганси, душв хизанари веледарихъди рягьятвал гъадабгъру йишвси, агьалйири таниш’валин, дуствалин ва хялижв’валин аьлакьйирра артмиш апIуз мумкинвал тувру майданра хьибди. Къайд дапIну ккундуки, Казбек Къазиевди му рягьятвал йивру йишв вари харжар чан жибдиан ахьри ва чав тикмиш апIури, арайиз гъабхну.
«Гьаму кьаст кIваъ ади хайлин йисар вуйиз. Ихь гъулар ккадахьурайивал, гъулариан жигьилар жара йишвариз кюч шулайивал ва гъулариъ айи дишагьлийиризна бицIидариз рягьятвал гъадабгъру, юкIв алдапIру йишв адрувал рябкъюри, юкIв иццру дубхьнайиз. Гьаму йисан, аьзиз Аллагьди амур дапIну, йиз мурадарихъ хъуркьунза. Му база узу бадали ваъ, ихь жямяаьт бадали абццуб ву. Мушв абццу йигъланмина сад-кьюд йигътIан дубшнадар, хъа гъи вари райондиъ Фурдгъарин гъулкан улхуз хъюгъна, мина жара гъулариан хизанариинди гъюра. Узхьанра шуйзухьан жара йишвариъ хал гъадабгъну, гьадушвариъ саб фу-вуш дивуз. Мумкинвалра азуз. Хъа йиз фикир гьамциб вуйиз: наан уву бабкан гъахьнуш, уву ватандиз, багъри гъулаз вафалу вуш, сабпи нубатнаъди гъулхъан, райондихъан хъюгъну ккунду.
Му проектдихъ, райондин жара гъулариан вуйи ва пулин мумкинвал айи жигьилариз нумуна ибшри кIури ва жигьиларин ва бицIидарин юкIв шад апIурза кIури, фикрар ади хъюгъюнза. Майдан ачмиш апIру мажлиснаъ иштирак гъахьи йиз дустарин, хяларин кюмекниинди му ляхин ухьу хъана мюгькамди артмиш апIур кIури, умудлу вуза.
Сабансан текрар апIураза, майдан ички убхърудариз вуйиб дар. Думу хизанарин чпин веледарихъди рягьятвал гъадабгъуз абццнайиб ву.
Гъи ихь райондиъ туризмдин цирклизра фикир тувра. Йиз фикриан, туристаризра му йишвахь рягьятвал гъадабгъуз мумкинвал хьибди. Чухсагъул Ургъа гъулан поселениейин глава Тельман Гьюсеевдиз. Йиз кIваъ айи хияларикан ва гьаму ляхин кIулиз адабгъуз ккундузуз гъапиган, думу йиз гафнахъди рази гъахьну. Кьюд-шубуб йислан му йишв лапра яркьуди ва успагьиди хьибди. Фицики хайлиндари кюмек апIуз гаф тувну», – гъапнийи Казбек Къазиевди.
Ккилигурхьа, белки гьаци хьузра шул. Хъа узу гъи хябяхъган йиз хизанра хъади райондиъ сабпи ражари ачмиш дапIнайи успагьи ярквраъ ккабалгнайи кIапIлиз гъягъюрза.
